ޤައުމުގެ އުފާވެރިކަން އިތުރުކުރުމުގައި، ތަރިކައާއި ބަހާއި ސަޤާފަތަށް އިޙްތިރާމްކުރަން ޖެހޭ: މެޑަމް ސާޖިދާ

ޤައުމުގެ އުފާވެރިކަން އިތުރުކުރުމުގައި، އެ ޤައުމެއްގެ ތަރިކައާއި ބަހާއި ސަޤާފަތަށް އިޙްތިރާމްކުރަން ޖެހޭނެ ކަމުގައި ރައިސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވެއްޖެއެވެ. އެ ކަމަނާ މިހެން ވިދާޅުވީ، ދިވެހިންގެ އުފާވެރިކަމުގެ މިންގަނޑު އިފްތިތާޙްކުރުމަށް އާދީއްތަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، ޢިލްމީ ގޮތުން ބަލާއިރު މާދަރީ ބަހުން އުފާވެރިކަން ލިބޭއިރު، ޤައުމެއްގެ އުފާވެރިކަން އިތުރުކުރެވޭނީ ޤައުމީ ތަރިކައާއި ބަހާއި ސަޤާފަތަށް އިޙްތިރާމްކޮށް، އެ ވަސީލަތްތައް ހެޔޮގޮތުގައި ބޭނުންކުރުމުން ކަމަށެވެ.

ޢިލްމީ ގޮތުން ބަލައި އިރު، އިންސާނާއަށް އުފާވެރިކަން ލިބެނީ ހަމައެކަނި މާދަރީބަހުން. ވީމާ ޤައުމެއްގެ އުފާވެރިކަން އިތުރުކުރުމުގައި ތަރިކައާއި، ބަހާއި، ސަޤާފަތަށް އިޙްތިރާމްކޮށް އެ ވަޞީލަތްތައް ހެޔޮ ގޮތުގައި ބޭނުންކުރުން މުހިންމު. 

މެޑަމް ސާޖިދާ މުޙައްމަދު ވިދާޅުވިއެވެ.

ރާއްޖޭގެ އުފާވެރިކަމުގެ މިންގަނޑެއް ކަނޑައެޅުމުގެ މުހިންމުކަމަށް އަލިއަޅުވާލައްވައި ވާހަކަފުޅު ކުރިޔަށްގެންދަވަމުން މެޑަމް ސާޖިދާ ވިދާޅުވީ، މިއީ ޤައުމަށް ލިބިގެންދާ ބޮޑު އުފަލެއްކަކަމަށާއި އަދި މިއީ ޑިމޮކްރެސީގެ އުސޫލުތަކަށް ހިތްވަރުދޭ ސަރުކާރުތަކުން ބަލައިގަންނަ ކަމެއްކަމަށެވެ.

މީގެ އިތުރުން، ޙަޤީޤީ އުފާވެރިކަމުގެ ކިއްލާއަކީ އިސްލާމީ ނޫރުން އަލިވެފައިވާ ހިތެއްކަމަށް ވެސް އެ ކަމަނާގެ ވާހަކަފުޅުގައި ވަނީ ވިދާޅުވެފައެވެ. އަދި އިންސާނާގެ ހިތަށް ޙަޤިޤީ ހަމަޖެހުމާއި، އުފާވެރިކަމެއް ލިއްބައިދެނީ ހަމައެކަނި މާތްﷲ ހަނދުމަކުރުމުން ކަމަށާއި އަދި ހެޔޮ މިންވަރާއި ނުބައި މިންވަރަށް އީމާންވުމުންކަމަށް ވެސް އެ ކަމަނާ ވިދާޅުވިއެވެ. އެގޮތުން ހަޤީގީ އުފާވެރިކަމުގެ ކިއްލާއަކީ އީމާންތެރިިކަމުގެ ނޫރުން އަލިވެފައިވާ ހިތެއްކަމަށް އެ ކަމަނާ ވިދާޅުވިއެވެ.

މިއީ ދިވެހިރާއްޖޭގައި އުފާވެރިކަމުގެ މިންގަނޑެއް ކަނޑައެޅުމަށް މަސައްކަތްކުރަމުން އަންނަ ފުރަތަމަ ފަހަރެވެ. މީގެ އިތުރުން ވެސް، ދެމެހެއްޓެނިވި ތަރައްޤީއަށް ވާސިލްވުމަށް އިޖުތިމާޢީ ގޮތުން ކުރަންޖެހޭ ގިނަ ކަންކަން ތަންފީޒުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.