ހެޕިނަސް އިންޑެކްސް ތަންފީޒު ކުރާނީ ކައުންސިލްތަކާ ގުޅިގެންކަމަށް ވަޒީރު އާދަމް ޝަރީފް ވިދާޅުވެއްޖެ

ދިވެހިރާއްޖޭގެ އުފާވެރިކަން މިންކުރުމަށް އެކުލަވައިލާ "ހެޕިނަސް އިންޑެކްސް" ތަންފީޒު ކުރުމުގެ މަސައްކަތްތައް ކުރިޔަށްދާނީ ކައުންސިލްތަކާ ގުޅިގެންކަމަށް ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ. ވަޒީރު މިހެން ވިދާޅުވީ، ހެޕިނެސް އިންޑެކްސް އިފްތިތާޙު ކުރުމަށް އާދީއްތަ ދުވަހު ބޭއްވި ޙާއްސަ ރަސްމިއްޔާތުގައެވެ.

މި ރަސްމިއްޔާތުގައި ވަޒީރު ދެއްކެވި ވާހަކަފުޅުގައި، ހެޕިނެސް އިންޑެކްސް އެކުލަވައިލެވުމުން އެކަން ތަންފީޒު ކުރެވިގެން ދާނީ ކައުންސިލްތަކާ ގުޅިގެން ކަމަށާ، އެކަމަށްޓަކައި ކައުންސިލްތައް އަހުލުވެރި ކުރުމުގެ މަސައްކަތްތައް ސިޓީސް މިނިސްޓްރީން ކުރިއަށް ގެންދާނެކަމަށް ވެސް ވިދާޅުވިއެވެ. އަދި މީގެ އިތުރުން ހެޕިނެސް އިންޑެކްސްގެ ދަށުން ކުރިއެރުން ހޯދާ ރަށްތަކަށް އެވޯޑް ދެވޭނެ ގޮތްތަކެއްވުމަކީ މުހިއްމު ކަމެއްކަމަށް ވެސް ވަޒީރު ވިދާޅުވިއެވެ.

މީގެ އިތުރުން، ހެޕިނެސް އިންޑެކްސް މިންކުރުމުގެ ޙާލަތު ދެނެގަތުމުގައި ތަބީޢީ ގޮތުން ރަށްރަށުގެ ޙާލަތު އޮތް ގޮތުގެ މައްޗަށް ރިޢާޔަތް ކުރެވެން ޖެހޭނެކަމަށް ވެސް ވަޒީރު ވަނީ ވިދާޅުވެފައެވެ. ނަމަވެސް ދިރިއުޅުމުގެ ފަސޭހަޔަށްޓަކައި ހަދާ ބަނދަރުތަކާއި، މަގުތަކުގެ ސަބަބުން ޤުދުރަތީ ގޮތުން ރަށްރަށް އުފެދިފައި އޮތް ތިމާވެއްޓާ ރަށްޓެހި މާހައުލު މިހާރު އެ ގޮތުގައި ނެތްކަމަށް ވިދާޅުވިއެވެ.

ދިރިއުޅުމުގެ ފަސޭހަޔަށް ޓަކައި ހަދާ ބަނދަރުތަކާއި މަގުތަކުގެ ސަބަބުން ޤުދުރަތީ ގޮތުން ރަށްރަށް އުފެދިފައި އޮތް ތިމާވެއްޓާ ރަށްޓެހި މާހައުލު މިހާރު އެ ގޮތުގައި ނެތް. ރަށްރަށް ތަރައްޤީ ކުރުމުގައި ޤުދުރަތީ ގޮތުން އުފެދިފައި އޮތް އޮތުން ދެމެހެއްޓޭނެ ފަދަ ގޮތަކަށް ކަންކަން ބައްޓަންކުރުން މުހިންމު. އެހެންކަމުން ހެޕިނެސް އިންޑެކްސް މިންކުރުމުގެ ޙާލަތު ދެނެގަތުމުގައި ތަބީޢީ ގޮތުން ރަށްރަށުގެ ޙާލަތު އޮތް ގޮތުގެ މައްޗަށް ރިޢާޔަތް ކުރެވެން ޖެހޭނެ.

ވަޒީރު އާދަމް ޝަރީފު ވިދާޅުވިއެވެ.

އާދީއްތަ ދުވަހު ލޯންޗްކުރެވުނު ހެޕިނަސް އިންޑެކްސްގެ ރިސާޗް ޕާޓްނަރަކީ ދިވެހިރާއްޖޭގެ އިސްލާމިކް ޔުނިވަރސިޓީއެވެ. ދިވެހިރާއްޖޭގެ އުފާވެރިކަން މިންކުރުމަށް މިންގަނޑެއް އެކުލަވައިލުމުގެ މަސައްކަތަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިރުޝާދާއި ލަފާފުޅުގެ މަތިން ކުރިޔަށް ގެންދަވާ މަޝްރޫޢެއްކަމަށް ސިޓީތަކާއި އިދާރީ ދާއިރާތަކާއި އާންމު ޚިދުމަތްތަކާއި ބެހޭ ވުޒާރާއިން ވަނީ ހާމަކޮށްފައެވެ.