ދުނިޔެ
ސީރިއާގެ އިންތިޤާލީ ރައީސްގެ ފުރަތަމަ ބޭރު ދަތުރުފުޅުގައި ސައުދީއަށް ވަޑައިގެންފި

ސީރިއާގެ އިންތިޤާލީ ރައީސް، އަޙުމަދު އަލް-ޝަރާ ސައުދީ ވަލީއަހުދު މުޙައްމަދު ބިން ސަލްމާނާއި ބައްދަލުކުރެއްވުން، ފޮޓޯ: ރޮއިޓާސް
ހުލާސާ
މި ބައްދަލުކުރެއްވުމުގައި ހަކަތައާއި، ޓެކްނޮލޮޖީއާއި، ތަޢުލީމާއި އަދި ސިއްޙީ ދާއިރާއިން ކުރިޔަށް އޮތްތާންގައި އެއްބާރުލުން ހޯދޭނެ ގޮތްތަކަކަށް މަޝްވަރާކުރައްވާފައިވޭ.
ސީރިއާގެ އިންތިޤާލީ ރައީސް، އަޙުމަދު އަލް-ޝަރާގެ ފުރަތަމަ ބޭރު ދަތުރުފުޅުގައި އާދީއްތަ ދުވަހު ސައުދީ އަރަބިއްޔާއަށް ވަޑައިގެން، އެ ޤައުމުގެ ވަލީއަހުދު މުޙައްމަދު ބިން ސަލްމާނާއި ރިޔާޟުގައި ބައްދަލުކުރައްވައިފިއެވެ.
އިންތިޤާލީ ރައީސްގެ މަޤާމާއި މިދިޔަ ހަފްތާގައި ހަވާލުވެވަޑައިގެންނެވި ޝަރާ ވަނީ، އީރާނުގެ ތާއީދާއެކު ވެރިކަމުގައި ހުންނެވި ބަޝާރުލް އަސަދު ވެރިކަމުން ދުރުކުރުމުގައި އިސް ދައުރެއް އަދާކޮށްފައެވެ.
ސައުދީ ދަތުރުފުޅާ ގުޅިގެން ޝަރާ ހާމަކުރައްވާފައިވާ ގޮތުގައި، އެ ބައްދަލުކުރެއްވުމުގައި އިންސާނީ އަދި އިޤްތިޞާދީ ގޮތުން އެއްބާރުލުން ހޯދުމަށް ވާނީ މަޝްވަރާކުރައްވާފައެވެ. މީގެ އިތުރުން، ހަކަތައާއި، ޓެކްނޮލޮޖީއާއި، ތަޢުލީމާއި އަދި ސިއްޙީ ދާއިރާއިން ކުރިޔަށް އޮތްތާންގައި އެއްބާރުލުން ހޯދޭނެ ގޮތްތަކަކަށް މަޝްވަރާކުރައްވާފައިވާނޭކަމަށް ވެސް ޝަރާ ހާމަކޮށްފައިވެއެވެ.
ސައުދީގެ މީޑިއާ އެޖެންސީއަކުން ރިޕޯޓުކޮށްފައިވާ ގޮތުގައި، މި ދެ ބޭފުޅުންގެ ބައްދަލުކުރެއްވުމުގައި ދެ ޤައުމުގެ ސިޔާސީ ގުޅުން ބަދަހިކުރުމާއި، ސަރަޙައްދީ ކުރިއެރުމާ ގުޅޭގޮތުން ވަނީ މަޝްވަރާކުރައްވާފައެވެ.
ޝަރާ އުފަންވެވަޑައިގެންފައި ވަނީ ސައޫދީ އަރަބިއްޔާއަށެވެ. އަދި އެބޭފުޅާގެ ޅަ އުމުރުގެ ދުވަސްތަކެއް އެ ޤައުމުގައި ހޭދަކުރައްވާފައި ވެސް ވެއެވެ.
ފާއިތުވި މަހު، ސަޢޫދީ ޢަރަބިއްޔާގެ ޚާރިޖީ ވަޒީރު ފައިސަލް ބިން ފަރުހާން ދިމިޝްޤަށް ޒިޔާރަތްކުރެއްވިއެވެ. އަދި ސީރިއާގެ އިޤްތިޞާދު ހަލާކުކޮށްލި އިޤްތިޞާދީ ދަތިތައް ނައްތާލެއްވުމަށް، ޔޫރަޕާއި އެމެރިކާއާއެކު މަޝްވަރާތައް ކުރިއަށްދާކަމަށް ވިދާޅުވިއެވެ.