ފުލުހުން ބަލަމުންދާ މައްސަލައަކާ ގުޅިގެން ދެ މީހަކު ހޯދުމަށް އިޢުލާންކޮށްފި

ޑްރަގް މައްސަލައެއްގައި ހިމެނޭ މީހަކާއި، ވައްކަމުގެ މައްސަލައެއްގައި ހިމެނޭ ބަޔަކު ހޯދުމަށް ފުލުހުން އިޢުލާންކޮށްފިއެވެ. 

އެގޮތުން ޑްރަގް މައްސަލައާ ގުޅިގެން ފުލުހުންގެ ޚިދުމަތުގެ ޑްރަގްސް އެންޑް ސަބްސްޓެންސް އެބިއުސް ކޮންޓްރޯލުން ތަޙުޤީޤުކުރަމުންދާ މައްސަލައިގައި ތަޙުޤީޤަށް ހާޒިރުކުރުމަށް އިޢުލާންކޮށްފައިވަނީ، އިބްރާހީމް މަޤްޞޫދު، ނިޔަދުރުމާގެ / ސ. މަރަދޫ (47އ)އެވެ. 

އަދި ހުޅުމާލެ ފޭސް 1 ޕޮލިހުން ތަޙުޤީޤުކުރަމުންދާ ވައްކަމުގެ މައްސަލައެއްގެ ތަހުގީގަށް ހާޒިރުކުރުމަށް އިޢުލާންކޮށްފައިވަނީ ޙުސައިން ޢަބްދުލްމަޖީދު، ދަފްތަރު ނަންބަރު ރސ 3678/ މާލެ، (26އ)އެވެ. 

މި ދެ މީހުން ވެސް ހޯދަމުންދަނީ މައްސަލައިގެ ތަޙުޤީޤަށް ސުވާލުކުރުމުގެ ގޮތުންނެވެ. ފުލުހަށް ހާޒިރުކުރުމަށް މި މީހުންގެ ވަނަވަރު ޙިއްސާކޮށްފައި މިވަނީ، މި މީހުން ދިރިއުޅެމުންދާ ތަނެއް އެނގިފައިނެތުމުން، ފުލުހުންގެ އިދާރާއަށް ހާޒިރުވުމަށް އަންގާ ޗިޓު ހަވާލުނުކުރެވުމުންނެވެ.

މި ދެ މީހުންގެ ތެރެއިން އިބްރާހީމް މަޤްޞޫދު، ސާރޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގއަށް ހާޒިރުވުމަށް އަންގާފައިވަނީ 2025 ފެބްރުވަރީ 13 ވަނަ ދުވަހުގެ 14:00 އަށް ނުވަތަ އޭގެ ކުރިން ހާޒިރުވެވޭނަމަ، ވީ އެންމެ އަވަހަކަށެވެ.

އަދި ޙުސައިން ޢަބްދުލްމަޖީދު، ހާޒިރުވުމަށް އަންގާފައިވަނީ ހުޅުމާލެ ފޭސް 1 ޕޮލިސް ސްޓޭޝަނަށް، 2025 ފެބްރުވަރީ 12 ވަނަ ދުވަހުގެ 10:00 އަށް ނުވަތަ ވީ އެންމެ އަވަހަކަށެވެ.