ޤުދުރަތީ ކާރިސާތަކުން ދަނޑުވެރިކަން ސަލާމަތް ކުރެވޭނީ ވިލުންތެރި ނިޒާމެއްގެ ތެރެއިން: މެޑަމް ސާޖިދާ

ޤުދުރަތީ ކާރިސާތަކުން ދަނޑުވެރިކަން ސަލާމަތް ކުރެވޭނީ ވިލުންތެރި ނިޒާމެއްގެ ތެރެއިންކަމަށް ރައީސުލްޖުމްހޫރިއްޔާގެ އަނބިކަނބަލުން، މެޑަން ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމިކް އޯގަނައިޒޭޝަން ފޮރ ފުޑް ސެކިއުރިޓީ، އައިއޯއެފްއެސް ގުޅިގެން ކުރިއަށްގެންދާ ކާބޯތަކެތީގެ ޔަޤީންކަން ކަށަވަރުކުރުމަށް، މޫސުމީ ބަދަލުތަކަށް ވިލުންތެރި ދަނޑުވެރިކަމެއްކުރުމާ ބެހޭ ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

މެޑަމް ސާޖިދާ ވިދާޅުވީ، މޫސުމީ ބަދަލުތަކަކީ ދިވެހި ދަނޑުވެރިކަމަށް އޮތް ގޮންޖެހުމެއް ކަމަށާއި، މި ކަމުގެ ސަބަބުން ދަނޑުވެރިކަން ދެމެހެއްޓުމަށް އުނދަގޫވާކަމަށެވެ. އެގޮތުން، މީރުފެން ފަށަލަ ލޮނުވުމާއި ދުނިޔެ ހޫނުވުންފަދަ ކަންކަން ފާހަގަކުރައްވައި، މިފަދަ މޫސުމީ ބަދަލުތަކުންނާއި ޤުދުރަތީ ކާރިސާތަކުން ދިމާވާ ދަތިތަކުން އަރައިގަނެވޭނީ ވިލުންތެރި ނިޒާމެއް ޤާއިމްކޮށްގެންކަމަށް އެ ކަމަނާ ވިދާޅުވިއެވެ. 

އަދި ރާއްޖޭގައި ބޭނުންކުރާ ކާބޯތަކެތީގެ %90 ރާއްޖެއިން ބޭރުން އެތެރެކުރާއިރު، މި އަދަދު މަދުކޮށް، ރާއްޖޭގައި ދަނޑު ހެއްދުމަށް އިތުރު މަސައްކަތްތައް ކުރަންޖެހޭކަން ކޮވިޑް-19ގެ ހާލަތުގައި އެނގިގެން ދިޔަކަަމަށް ވެސް އެ ކަމަނާ ވަނީ ވިދާޅުވެފައެވެ.

މީގެ އިތުރުން، ދަނޑުވެރިކަން ދެމެހެއްޓުމަށްޓަކައި، ދަނޑުވެރިކަމުން އުފައްދާ ތަކެއްޗަށް މާކެޓު ހޯދައިދިނުމުގެ މުހިންމުކަމަށް ވެސް މެޑަމް ސާޖިދާ އަލިއަޅުވާލެއްވިއެވެ. 

ރާއްޖެ މިއޮންނަނީ ޖަޒީރާ ރަށްތަކެއްގެ މައްޗަށް. އެހެންވެ، ޑިމާންޑު އޮންނަ މާކެޓުތަކަށް ކާބޯތަކެތީގެ އުފެއްދުންތައް ވާޞިލުކުރުމުގައި އެބަ ދަތިތައް ދިމާވޭ. ދެމެހެއްޓެނިވި ގޮތެއްގައި ދަނޑުވެރިކަމުގެ އުފެއްދުންތަކަށް މާކެޓު ހޯދޭނެ ގޮތްތަކެއް ޤާއިމްކުރަން އެބަ ޖެހޭ.

ރައީސުލްޖުމްހޫރިއްޔާގެ އަނބިކަނބަލުން ވިދާޅުވިއެވެ.

އެކަމަނާ ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވާފައިވާ 5 މިލިޔަން ގަސް އިންދުމުގެ ޕްރޮގުރާމަކީ، ކާބޯތަކެތީގެ ޔަޤީންކަން އިތުރުކުރުމަށާއި ދަނޑުވެރިކަމަށް އެމަނިކުފާނު ދެއްވާ އަހަންމިއްޔަތު ހާމަވާ ކަމެއްކަމަށެވެ.

އޭޝިއަން ޑިވެލޮޕްމަންޓް ބޭންކުން ރާއްޖެއަށް ދީފައިވާ 21.95 މިލިޔަން ޑޮލަރުގެ އެހީގެ ދަށުން ރާއްޖޭގައި ކާބޯތަކެތީގެ ޔަޤީންކަން ކަށަވަރުކުރުމަށް މަސައްކަތްތަކެއްކުރުމަށް ސަރުކާރުން ވަނީ ނިންމަވާފައެވެ. އެގޮތުން ކާބޯތަކެތީގެ ނިޒާމުގެ ދެމެހެއްޓެނިކަން ހޯދުމަށް ކްލައިމެޓް ސްމާޓް އަރބަން ފާމިންގެ ވަސީލަތްތައް ރާއްޖެއަށް ތަޢާރަފްކޮށް އެ ވަސީލަތްތައް ބޭނުންކުރާނެ ގޮތް ހއ. އަތޮޅާއި އައްޑޫ ސިޓީގެ ރައްޔިތުންނަށް ދަސްކޮށްދިނުމަށް ވަނީ ހަމަޖެހިފައެވެ.