މިފްކޯގެ ތާރީޚުގައި ޖަނަވަރީ މަހެއްގައި އެންމެ ގިނަ މަސް ކިރުވުނީ މިއަހަރު

މިފްކޯގެ 28 އަހަރުގެ ތާރީޚުގައި ޖަނަވަރީ މަހެއްގައި އެންމެ ގިނަ އަދަދަކަށް މަސް ކިރުވާފައިވަނީ މިއަހަރުގެ ޖަނަވަރީ މަހުކަމަށް ތަފާސްހިސާބުތަކުން ދައްކައިފިއެވެ. މިފްކޯއިން ހާމަކުރި މަޢުލޫމާތުތަކަށް ބަލާއިރު، 2023 ވަނަ އަހަރުގެ ޖަނަވަރީ މަހު 8،324 މެޓްރިކް ޓަނުގެ މަސް ވަނީ ކިރުވާފައެވެ.

މިއީ 1997 ވަނަ އަހަރުން ފެށިގެން މިހާތަނަށް މިފްކޯގެ ތާރީޚުގައި ޖަނަވަރީ މަހެއްގައި އެންމެ ގިނައިން މަސް ކިރުވި ފަހަރެވެ. މި ރެކޯޑު އަދަދުގެ މަހަށް މިފްކޯއިން ވަނީ 117 މިލިޔަން ރުފިޔާ މަސްވެރިންނަށް ދޫކޮށްފައެވެ. މިއީ 2022 ވަނަ އަހަރުގެ ޑިސެންބަރު މަހާ އަޅާބަލާއިރު 122 އިންސައްތައިގެ އިތުރުވުމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަމުންދާކަން މިފްކޯއިން ފާހަގަކޮށްފައިވެއެވެ. މި އައު އުސޫލު ތަންފީޒުކުރަން ފެށީ މިދިޔަ މަސްވެރިންގެ ދުވަހުގައެވެ. އަދި މި ބަދަލާ ގުޅިގެން މަހަށް ނިކުންނަ ދޯނިތަކުގެ އަދަދު އިތުރުވެފައިވާކަމަށްވެސް މިފްކޯއިން ބުނެފައިވެއެވެ.

ސަރުކާރުން ވަނީ ރާއްޖޭގެ މަސްވެރިކަމުގެ ސިނާޢަތް ކުރިއަރުވައި، މިފްކޯ ރިފޯމްކުރުމުގެ މަސައްކަތް ކުރަމުންދާކަމަށް ބުނެފައެވެ. އަދި މަސްވެރިކަމުގެ ސިނާޢަތަށް ދިމާވެފައިވާ ބޮޑެތި މައްސަލަތައް އަންނަ 3 އަހަރު ދުވަހުގެ ތެރޭގައި ހައްލުކުރާނެކަމަށްވެސް ސަރުކާރުން ވަނީ ވިދާޅުވެފައެވެ.