ޚަބަރު
ފޭސްބުކް މާކެޓްޕްލޭސް ސްކޭމްތަކަށް ސަމާލުވުމަށް ފުލުހުން އިލްތިމާސްކޮށްފި

ފޭސްބުކް މާކެޓްޕްލޭސް ސްކޭމް ފޮޓޯ:އިންޓަނެޓް
ފޭސްބުކްގައި އޮޅުވާލައިގެން ވިޔަފާރި ކުރާ މާކެޓްޕްލޭސް ސްކޭމްތަކަށް ސަމާލުވުމަށް ފުލުހުންގެ ސައިބަރ ކްރައިމް ސެންޓަރުން އިއްޔެ އިލްތިމާސްކޮށްފިއެވެ. މި އިލްތިމާސްއާއެކު، އޯޓީޕީ އޮތެންޓިކޭޝަންގެ ބަދަލުގައި އިތުރު އޮތެންޓިކޭޝަން މެތަޑެއް ކަމަށްވާ ފްލޭޝް ކޯލްސް ތަޢާރަފްވެފައިވާކަންވެސް ސެންޓަރުން ހާމަކުރިއެވެ.
ސައިބަރ ކްރައިމް ސެންޓަރުން ދެއްވި މަޢުލޫމާތުގައި، ޝައްކު އުފެދޭ ލިސްޓިންގ އަދި ޕޯސްޓްތަކަށް ސަމާލުވުމަށް އާންމުންނަށް ގޮވާލައްވާފައިވެއެވެ. އަދި ލިސްޓްކޮށްފައިވާ އެއްޗެއްގެ އަގު ހެޔޮ ކަމަށް ފެނުނަސް ނުވަތަ ރަނގަޅު ޑީލެއްހެން ހީވިޔަސް، އެ އެއްޗެއް ގަތުމުގެ ކުރިން އިތުރަށް ދިރާސާ ކުރުމަށް އެދިވަޑައިގެންފައިވެއެވެ.
އޮޅުވާލައިގެން ހިންގާ ވިޔަފާރި ޕޭޖުތައް ދެނެގަތުމަށް ބެލިދާނެ ކަންކަމުގެ ތެރޭގައި، ޕޭޖު ހަދާފައިވާ ތާރީޚު، ޕްރޮފައިލްގެ މަޢުލޫމާތު ޙިއްސާކޮށްފައި ހުންނަ މިންވަރު، އަދި އެ ޕޭޖުތަކަށް ފޮލޯކޮށްފައި ތިބޭ މީހުންނާއި ފްރެންޑްސް ލިސްޓުގައި ހިމެނޭ މީހުންގެ އަދަދު ހިމެނެއެވެ. މީގެ އިތުރުން، ޕޭމަންޓް ހެދުމުގައި ޑެލިވަރީ ކުރުމުން ފައިސާ ހަވާލުކުރާ ގޮތްތަކަށް ވިޔަފާރިކުރުން ޚިޔާރުކުރުމަށާއި، ދެ ފަރާތުގެ ރުހުމާއެކު ވިޔަފާރި ފުރިހަމަ ކުރުމަށްވެސް ސައިބަރ ކްރައިމް ސެންޓަރުން އިލްތިމާސްކޮށްފައިވެއެވެ.
އޯޓީޕީގެ ބަދަލުގައި ތަޢާރަފްވެފައިވާ ފްލޭޝް ކޯލްސްއަކީ ގިނަ ކުންފުނިތަކުން މިހާރު ބޭނުންކުރަމުންދާ އޮތެންޓިކޭޝަން މެތަޑެކެވެ. ނަމަވެސް، ފްލޭޝް ކޯލްސްއަކީ ކޮބައިކަން ގިނަ ބަޔަކަށް ނޭނގުމުގެ ސަބަބުން، ފްލޭޝް ކޯލް ސްކޭމްގެ ޝިކާރައަކަށްވާ މީހުންގެ އަދަދު ދުވަހުން ދުވަހަށް އިތުރުވަމުންދާކަމަށް ފުލުހުން ވިދާޅުވިއެވެ.
ފްލޭޝް ކޯލަކީ ކަސްޓަމަރުގެ ފޯނަށް ޚިދުމަތްދޭ ކުންފުނިން ކުރާ ފޯން ކޯލެއް ނުވަތަ ފޮނުވާ މިސް ކޯލެކެވެ. ގުޅާ ނަންބަރު ނުވަތަ މިސް ކޯލް ލިބޭ ނަންބަރުގެ ފަހު އަކުރުތަކަކީ އޮތެންޓިކޭޝަން ކޯޑެވެ. މި ކޯޑު އިތުރު އެއްވެސް ފަރާތަކާ ހިއްސާކޮށްފިނަމަ، އެއީ އޯޓީޕީއާ އެއްވަރުގެ ކޯޑެއް ހިއްސާކުރުން ކަމުގައި ފުލުހުން ވިދާޅުވިއެވެ.
ސްކޭމްތަކުން ރައްކާތެރިވުމަށް، އެއްވެސް އިތުރު ފަރާތަކަށް ތިމާގެ ފޯނަށް ލިބޭ ކޯޑާއި، ގުޅާފައި ހުންނަ ނަންބަރެއްވެސް އަދި މިސްކޯލެއް ލިބިފައިއިން ނަންބަރެއްވެސް ހިއްސާ ނުކުރުމަށް ފުލުހުން ވަނީ އިލްތިމާސްކޮށްފައެވެ.