ޚަބަރު
ކައުންސިލްތަކުގެ ނިންމުންތަކުގައި ރައްޔިތުންގެ ބައިވެރިވުން އިތުރުކުރުމަށް މަސައްކަތްކުރަނީ

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު
ލާމަރުކަޒީ ނިޒާމުގެ ދަށުން ކައުންސިލްތަކުން ނިންމާ ނިންމުންތަކުގައި ރައްޔިތުންގެ ބައިވެރިވުން އިތުރުކުރެވޭނެ ގޮތްތައް ދެނެގަތުމަށް އޯޕަން ގަވަރމަންޓް ޕާޓްނަރޝިޕް (އޯޖީޕީ) ބައްދަލުވުމުގައި ޚާއްސަ އިސްކަމެއް ދެއްވާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
ވަޒީރު މިހެން ވިދާޅުވެފައިވަނީ އޯޖީޕީ ބައްދަލުވުމުގައި ބައިވެރިވެވަޑައިގަތުމަށް ފިލިޕީންސަށް ފުރާވަޑައިގަންނަވަމުން މީޑިއާތަކަށް ދެއްވި އިންޓަވިއުއެއްގައެވެ. މި ބައްދަލުވުން ކުރިއަށްދާނީ މި މަހުގެ 5 ވަނަ ދުވަހުން ފެށިގެން 7 ވަނަ ދުވަހާ ހަމައަށެވެ.
އޯޖީޕީ ބައްދަލުވުމުގައި ލާމަރުކަޒީ ނިޒާމުގެ ތެރެއިން ހާމަކަމާއި ދެމެހެއްޓެނިވި ތަރައްޤީއާއި ކައުންސިލްތަކުގެ ނިންމުންތަކުގައި ރައްޔިތުންގެ ބައިވެރިވުން އިތުރުކުރުމާއި މިންހެޔޮ ސަރުކާރެއް ހިންގުމާ ބެހޭގޮތުން މަޝްވަރާކުރެވޭނެ ކަމަށް ވަޒީރު ވިދާޅުވިއެވެ. އަދި އެކި ޤައުމުތަކުގައި ލާމަރުކަޒީ ނިޒާމު ކާމިޔާބުކަމާއެކު ހިންގާފައިވާ ގޮތް ދެނެގަނެ، އެ ބަދަލުތައް ރާއްޖެއަށް ގެނެވޭނެ ގޮތްތަކާ ބެހޭގޮތުންވެސް މަޝްވަރާކުރެވޭނެ ކަމަށް އެމަނިކުފާނު ވިދާޅުވިއެވެ.
ފޯކަސް ހުރީ ކައުންސިލްތަކުން ނިންމާ ނިންމުންތަކުގައި ރަށު ރައްޔިތުންގެ ބައިވެރިވުން އިތުރުކުރުމަށްޓަކައި އަޅުގަނޑުމެންނަށް މަސައްކަތްކުރެވޭނެ ގޮތްތަކާއި މި ނިޒާމުގައި ހުރި މައްސަލަތައް ދެނެގަންނާނީ ކިހިނެއްކަމާއި ނިޒާމު އޮތްގޮތަށް ބަލާއިރު ބަދަލެއް ގެންނަންޖެހޭނަމަ ގެނެވޭނެ ބަދަލުތައް ދެނެގަތުމަށް މަޝްވަރާކުރަން ޚާއްސަ އިސްކަމެއް ދޭން
ވަޒީރު
މި ބައްދަލުވުމުގައި ސަރުކާރުތަކުގެ ވެރިންނާއި އިޖުތިމާޢީ ޖަމްޢިއްޔާތަކުގެ ވެރިންނާއި ސިޔާސަތުތައް ކަނޑައަޅާ ބޭފުޅުންނާއި ބައިނަލްއަޤްވާމީ އެކި ޖަމްޢިއްޔާތަކާއި ސްޓޭކް ހޯލްޑަރުން ބައިވެރިވާނެ ކަމަށް ވަނީ ހާމަކުރައްވާފައެވެ.