ޕޮލިސް ފްލެޓުތައް އެޅުމުގައި ހިޔާނާތްތެރިވެފައިވާކަމަށް ތުހުމަތުކުރެވޭތީ އޭސީސީއިން ޕޮލްކޯއަށް ވަދެއްޖެ

ޕޮލިސް ފްލެޓުތައް އެޅުމުގައި ހިޔާނާތްތެރިވެފައިވާކަމަށް ތުހުމަތުކުރެވޭ މައްސަލައަކާ ގުޅިގެން، އެންޓި ކޮރަޕްޝަން ކޮމިޝަން، އޭސީސީއިން ޕޮލިސް ކޯޕަރޭޓިވް ސޮސައިޓީ (ޕޮލްކޯ)ގެ އޮފީހަށް ވަދެއްޖެއެވެ. 

ޕޮލްކޯއަކީ ފުލުހުންގެ ވެލްފެއަރ ކަންކަން ބެލެހެއްޓުމަށް ހަދާފައިވާ ވިޔަފާރި ޖަމްޢިއްޔާއެކެވެ. އަދި މި ތަނުގެ އޮފީސް ހުންނަނީ އިސްކަންދަރު ކޮށީގައެވެ.

ފުލުހުންގެ މީޑިއާ އޮފިޝަލް ހާމަކުރައްވާފައިވާ ގޮތުގައި، ތަޙުޤީޤާ ގުޅޭ ކަންކަން ބެލުމުގެ ގޮތުން އޭސީސީން އަންނަނީ އެ އޮފީހުގައި ހަރަކާތްތެރިވަމުންނެވެ.

ޕޮލިސް ފްލެޓުތައް އިމާރާތްކުރުމުގައި ހިޔާނާތްތެރިވެފައިވާކަމަށް ތުހުމަތުކުރެވުނީ އޮޑިޓް ރިޕޯޓުންނެވެ. އޮޑިޓް އޮފީހުން މިދިޔަ ހަފުތާގައި ނެރުނު ރިޕޯޓުގައި ހިޔާނާތުގެ ގިނަ މައްސަލަތަކެއް ފާހަގަކޮށްފައި ވެއެވެ. އެގޮތުން މަޝްރޫއުއަށް ބިލިއަނަކަށް ވުރެ ގިނަ ރުފިޔާ ހަރަދުކުކޮށްފައި ވާއިރު 355 މިލިއަނުގެ ގެއްލުން ވެފައިވެއެވެ. 

އަދި ކޮންޓްރެކްޓަރުންނާ ހަވާލުކުރާ މަސައްކަތްތަކުގެ އެއްބަސްވުންތަކަށް އެކިފަހަރު މަތިން ބޮޑެތި ބަދަލުތައް ގެނަސްފައިވާކަން ވެސް އެ ރިޕޯޓުގައި ފާހަގަކޮށްފައިވެއެވެ. އަދި އޮޑިޓް އޮފީހުން ތުހުމަތުކުރަނީ، މި ކަމަކީ ވަކި ބަޔަކަށް ފައިދާ ހޯދައި ދިނުމަށް ކޮށްފައިވާ ކަންތައްތަކެއް ކަމަށެވެ. މި މައްސަލަ ކަމާގުޅުންހުރި އިދާރާތަކުގެ ސަމާލުކަމަށް އޮޑިޓް އޮފީހުން ގެނައީ އެ ސަބަބަށްޓަކައެވެ.

މީގެ އިތުރުން މަޝްރޫއުގެ މަސައްކަތްތައް ނުނިމި ލަސްވެގެން ދިއުމާއި ކޮންޓްރެކްޓަރަށް ސީދާ ފައިދާވާ ގޮތަށް އަދި ދައުލަތަށް ގެއްލުންވާ ގޮތަށް އަމަލުކޮށްފައިވާ ކަމަށް ވެސް ރިޕޯޓުގައި އޮތެވެ. އަދި ކަންކަން މިގޮތަށް ދިޔައިރު، ޕޮލްކޯގެ ޑިރެކްޓަރުންގެ ބޯޑުގައި ތިބި ފަރާތްތަކާއި އިސްވެރިން، އެކަމުގައި ބަލަންޖެހޭ ކަންކަން ބަލައި ފިޔަވަޅު އަޅާފައިނުވާތީ އެ ފަރާތްތައް ޒިންމާކުރުމަށް ވެސް އޮޑިޓު އޮފީހުން ވަނީ ބުނެފައެވެ.