ބެޓްމިންޓަނަށް ދިމާވެފައިވާ މައްސަލަތައް ވަރަށް އަވަހަށް ޙައްލުކޮށްދެއްވާނެކަމަށް ވަޒީރު ވިދާޅުވެއްޖެ

ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އަށް ދިމާވެފައިވާ މައްސަލަތަކަށް ދާއިމީ އަވަސް ޙައްލެއް ހޯއްދަވައިދެއްވާނެ ކަމުގައި ކުޅިވަރާއި ހަށިހެޔޮކަމާއި ބެހޭ ވަޒީރު، އަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ، ކުލަބް ރިވައިވަލް އިން މާލޭގައި ބޭއްވި ބެޑްމިންޓަން ޗެމްޕިއަންޝިޕް ނިންމުމުގެ ރަސްމިއްޔާތަށްފަހު މީޑިއާތަކަށް ދެއްވި އިންޓަވިއުއެއްގައެވެ.

އެ އެސޯސިއޭޝަނަށް އެންމެފަހުން އިންތިހާބުކޮށްފައިވާ ހިންގާ ކޮމެޓީގެ ދައުރު މިދިޔަ އަހަރުގެ މާޗުމަހުގެ 11އަށް ހަމަވެފައިވީ ނަމަވެސް، އަދި މިހާތަނަށް އެސޯސިއޭޝަންގެ އިންތިހާބު ބޭއްވިފައެއް ނުވެއެވެ. ނަމަވެސް، އެސޯސިއޭޝަންގެ އެންމެ އިސްފަރާތެއްގެ ގޮތުގައި އަދިވެސް މުޢާމަލާތްކުރަމުން އަންނަނީ ކުރީގެ ހިންގާ ކޮމެޓީގެ ނައިބު ރައީސްއެވެ.

ބީއޭއެމް ސްޕޯޓްސް ކައުންސިލްގެ ބެލުމުގެ ދަށަށް ގެންދިއުމަށް މިދިޔަ އަހަރުގެ އޮގަސްޓް މަހު، ކޮމިޝަނާ އޮފް ސްޕޯޓްސް މުޙައްމަދު ޠަލާލް ވަނީ ނިންމާފައެވެ. ނަމަވެސް އެކަމަށް ނުރުހި، ބީއޭއެމްއިން ކޯޓަށް ދިޔައެވެ. ސިވިލް ކޯޓުން އެ މައްސަލަ އެސޯސިއޭޝަނާ ދެކޮޅަށް ނިންމުމުން، މައްސަލަ އިސްތިއުނާފުކުރުމަށް ހައި ކޯޓަށް ވެސް ވަނީ ހުށަހަޅާފައެވެ.

"ރާއްޖޭގެ ބެޑްމިންޓަންގެ ހާލަތު އަޅުގަނޑުމެން އެންމެންނަށް ވެސް އެބައެނގޭ. މިނިސްޓްރީން ވެސް އޮލިމްޕިކް ކޮމިޓީއާ ގުޅިގެން ހާލަތު ރަނގަޅު ކުރުމަށްޓަކައި ކުރަން ޖެހޭ ކަންތައްތައް މި ދަނީ ކުރަމުން، ﷲ އިރާދަކުރެއްވިއްޔާ މި ކަމަށް ދާއިމީ ހައްލެއް ވަރަށް އަވަސް ފުރުސަތެއްގައި އަޅުގަނޑު ދަންނަވާނީ ހޯދިގެންދާނެ." ކުލަބް ރިވައިވަލް އިން މާލޭގެ ބޭއްވި ބެޑްމިންޓަން ޗެމްޕިއަންޝިޕް ނިންމުމުގެ ރަސްމިއްޔާތަށްފަހު މީޑިއާއަށް ދެއްވި އިންޓަވިއުގައި ވަޒީރު، އަބްދުﷲ ރާފިޢު ވިދާޅުވިއެވެ.

އަދި ސްޕޯޓްސް މިނިސްޓްރީއާއި ސަރުކާރުން ވެސް އިންޓަނޭޝަނަލް ޖަމިއްޔާތަކާ އެއްކޮށް މަސައްކަތްކުރަމުން އަންނަނީ ބެޑްމިންޓަންގެ މައްސަލަ ހައްލުކޮށްގެން، އެސޯސިއޭޝަން އިއާދަކުރުމަށްޓަކައިކަމަށް ވަޒީރު ވަނީ ވިދާޅުވެފައެވެ.