ދުނިޔެ
ސީރިއާ ބަފަރ ޒޯންގައި އިޒްރޭލުން މިލިޓަރީ ބޭސްތަކެއް ހަދަމުންދާކަމަށް ސެޓެލައިޓް ފޮޓޯތަކަކުން އެނގިއްޖެ

އިޒްރޭލުގެ ހަނގުރާމަމަތީ އުޅަނދެއް ސީރިއާގެ މަގެއް ބަންދުކޮށްގެން، ފޮޓޯ: އޭޕީ
ހުލާސާ
އިޒްރޭލުން ދަނީ ބަފަރ ޒޯންގެ 7 ސަރަޙައްދެއްގައި މިލިޓަރީ ބޭސް ހަދަމުން.
އޭގެ ތެރެއިން 1 ސަރަޙައްދު ހިމެނެނީ ސީރިއާ ބޯޑަރުގެ ތެރޭގައި.
ސީރިއާ އާއި އިޒްރޭލާ ދެމެދު، އެއްވެސް ޤައުމެއްގެ ބައެއްކަމަށް ކަނޑަނާޅަ އޮންނަ ބަފަރ ޒޯންގައި އިޒްރޭލުން މިލިޓަރީ ބޭސްތަކެއް ހަދަމުންދާކަމަށް، އަލް ޖަޒީރާއިން ހޯދި ސެޓެލައިޓް ފޮޓޯތަކަކުން އެނގިއްޖެއެވެ.
މި ސެޓެލައިޓް ފޮޓޯތައް ނަގާފައިވަނީ 2024 ޑިސެންބަރު 29، އެއީ ސީރިއާގެ ވެރިއަކަށްހުރި ބަޝާރުލް އަސަދު ވެރިކަމުން ދުރުކުރުމުން، އޭނާ ރަޝިއާގެ މޮސްކޯވްއަށް ދިޔަތާ 11ވަނައަށްވީ ދުވަހާއި، 2025 ފެބުރުއަރީ 1ވަނަ ދުވަހާ ދެމެދެވެ.
އެ ފޮޓޯތަކުން ފެންނަ ގޮތުން، 6 ސަރަޙައްދެއްގައި އިމާރާތްތަކެއް ހެދުމުގެ މަސައްކަތް ކުރިޔަށް ދެއެވެ. އަދި އިތުރު ބޭސްއެއް، ބަފަރ ޒޯނުން ބޭރުން، ސީރިއާގެ ބޯޑަރުގެ އެތެރޭގައި ވެސް އަންނަނީ ހަދަމުންނެވެ.
މި ހަތް ސަރަޙައްދު ހިމެނެނީ، ހާދަރު ވިލެޖާއި ޖަބަތާ އަލް-ކަޝަބުގެ ހުޅަނގުން، އަލް-ހަމީދިއާ އާއި ގުނެއިތުރާ ވިލެޖުގެ އުތުރުން އަދި ތަލް އަލް-އަހްމާރުގެ މަތީގައެވެ.
އިޒްރޭލުގެ މިލިޓަރީ ބޭސްތައް އަޅުމުންމިދާ ބަފަރ ޒޯނަކީ، އެ ދެ ޤައުމުގެ ދެމެދުގައި ހިނގަމުން ދިޔަ ހަނގުރާމަ 1974ގައި ހުއްޓާލުމަށް ވެވުނު އެއްބަސްވުމުގެ ތެރެއިން، ހުސްކޮށް ބޭއްވުމަށް ނިންމާފައިވާ ސަރަޙައްދެކެވެ. ނަމަވެސް ފަންސާހަކަށް އަހަރަށް ދެމިގެންދިޔަ އާއިލީ ވެރިކަމެއް ނިމުނުތާ މާގިނަދުވަސްތަކެއް ނުވެ، އިޒްރޭލުން މިވަނީ އެ ސަރަޙައްދުގައި ހަރަކާތްތެރިވާން ފަށާފައެވެ.
ސީރިއާގެ އިންތިޤާލީ ރައީސް އަޙުމަދު އަލް-ޝަރާ ވެސް ވަނީ، އެ އެއްބަސްވުން ދަމަހައްޓާނެކަމަށް ބުނެފައެވެ. ނަމަވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނީ، އެ އެއްބަސްވުމަކީ މިހާރު ވެރިކަމުން ދުރުކޮށްފައިވާ ބަޔަކާއެކި ހެދި އެއްބަސްވުމެއް ކަމަށާއި، އެހެންކަމުން މިހާރު އެއީ ބާޠިލު އެއްބަސްވުމެއް ކަމަށެވެ.
އަދި އެ ޤައުމުގެ ސިފައިން އަންނަނީ، މި ސަރަޙައްދާ ކައިރި ހިސާބުތަކުގައި އުޅޭ ސީރިއާގެ ރައްޔިތުންނަށް އެކިކަހަލަ އުނދަގޫ ކުރަމުންނެވެ. އޭގެ ތެރޭގައި ބޭކާރު ގޮތުގައި ހައްޔަރުކުރުމާއި، ގެތައް ރެއިޑްކުރުމާއި، މަގުތައް ބަންދުކުރުން ވެސް ހިމެނެއެވެ. އިޒްރޭލުން ބުނީ، އެއީ އިޒްރޭލުގެ ރައްޔިތުންނަށް ކުރިމަތިވެދާނެ ނުރައްކަލުން ސަލާމަތްކުރުމަށް ކުރަމުންދާ މަސައްކަތްތަކެއް ކަމަށެވެ.