އިންޑިއާގެ ޕޫނާގައި ޕެރަލައިޒްވާ ބައްޔެއް ފެތުރެނީ

އިންޑިއާގެ ޕޫނާގައި ގިލަން-ބާރޭ ސިންޑްރޯމް ނަމަކަށް ކިޔާ، ޕެރަލައިޒްވާ ބައްޔެއް ފެތުރެމުން އެބަދެއެވެ. ރިޕޯޓުތައް ބުނާގޮތުން، ޖެނުއަރީ މަހުގެ ކުރީކޮޅު މި ބަލި ޖެހިގެން 160 ކޭސްއެއް ރިޕޯޓުކޮށްފައިވެއެވެ.

މި ބަލި ޖެހުނު މީހުންގެ ތެރެއިން ފަސް މީހަކު މަރުވެފައިވާކަމަށް ވެއެވެ. އަދި 48 މީހަކަށް އައިސީޔޫގައި ފަރުވާ ދެމުންދާއިރު، 21 މީހަކު އޮތީ ވެންޓިލޭޓަރުގައެވެ. 

މި ބަލި ޖެހުމުން ފުރަތަމަ އަތާއި ފައިތިލަ އައްސިވެއެވެ. އަދި މަޑުމަޑުން ގައިގެ މަސްތަކުގެ ބާރުކެނޑި، ހުޅުހުޅުން ބަޅުކުރުމަށް އުނދަގޫވެއެވެ. އަދި އެހެންގޮސް، ދޭއް ނުވަތަ ތިން ހަފްތާގެ ތެރޭގައި ބަލިމީހާގެ ހާލު ބޮޑުވެއެވެ. 

ބަލިޖެހިގެން މަރުވަނީ ބަލިޖެހޭ މީހުންގެ ގާތްގަނޑަކަށް ތިން އިންސައްތަ އާއި ތޭރަ އިންސައްތަޔާ ދޭތެރޭގެ މީހުންކަމަށް ރިޕޯޓުތައް ބުނެއެވެ. އަދި ސިއްޙީ ގޮތުން ބަލާނަމަ، މަރުވާ މީހުންގެ އަދަދު ބިނާވަނީ ދެވޭ ސިއްޙީ ވަރުވާއަށްކަމަށް ވެސް ރިޕޯޓުތައް ބުނެއެވެ.

މި ބަލި ޖެހުނު 6 އަހަރުގެ ކުއްޖަކަށް ވީގޮތް "އިންޑިއަން އެކްސްޕްރެސް"އަށް ކިޔާދެމުން، ޓީޗަރެއްގެ ގޮތުގައި މަސައްކަތްކުރާ އެ ކުއްޖާގެ މަންމަ ބުނީ، ހޯމް-ވޯކް ހަދަން ބެއިންދުމުން އޭނާ ކުރަމުން ދިޔަ މަސައްކަތް ކުރިޔަށް ގެންދިއުމުގައި ފަންސޫރުގައި ނުހިފަން އުޅުނުކަމަށް ފާހަގަކުރެވުނެވެ. އެހެންކަމުން މަންމަ ހީކުރީ އެ ކުއްޖާ ހިތްހަމަ ނުޖެހޭކަމެއް ދިމާވުމުން ރުޅި އައިސްގެން ނުލިޔާން އިނީކަމަށެވެ. ނަމަވެސް ފަންސޫރުގަ ހިފަހައްޓަން އުނދަގޫވީ މި ސިންޑްރޯމް ޖެހިގެންކަމަށް އެއްވެސް ވަރަކަށް ހިތަށް ނާރާކަމަށް ބުންޏެވެ. 

އޭގެ ދުވަސްކޮޅެއް ފަހުން އެ ކުއްޖާއަށް މި ބަލި ޖެހުނުކަން އެނގުނުއިރު އަތާއި ފައި ގެންގުޅުމަށް އުނދަގޫވިއެވެ. އަދި ހާލަތު ގޯސްވެ، ހިންދިރުވުމާއި ވާހަކަ ދައްކަން އުނދަގޫވެ، އެންމެ ފަހުން ނޭވާ ނުލެވި ވެންޓިލޭޓަރުގައި ފަރުވާދޭން ޖެހުނެވެ.

މި ބަލި ފެތުރެނީ ކާއެއްޗެހިން އުފެދޭ އިންފެކްޝަނަކުންނެވެ. މި ބަލި ފަތުރާ ޕެތޮޖެން ފުރަތަމަ ފެނިފައިވަނީ 1990ގައި ޗައިނާއިންނެވެ. އޭރު މި ބަލި ފެތުރުނީ ކުކުޅުންނެވެ. އަދި އޭރު ބަލި ބޮޑަށް ފެތުރެނީ ކޮންމެ އަހަރެއްގެ ވެސް ވިއްސާރަ މޫސުމުގައި، ކުކުޅާއި އަސްދޫނިން ތަޤައްޔަރުވެފައިވާ ފެނުގައި ކުޅެން އުޅޭ ކުޑަކުދިންނަށެވެ. 

ޕޫނާއިން މި ބަލީގެ ކޭސްތަކެއް ފެނުނު ނަމަވެސް، މިއީ އިންޑިއާގައި އާންމު ބައްޔެއް ނޫނެވެ. އެގޮތުން 2014 އާއި 2019 އާއި ދެމެދު އެ ޤައުމުން މި ބަލިޖެހިގެން ރިޕޯޓުކޮށްފައިވަނީ 150 މީހުންނެވެ. 

މިކަމާ ގުޅިގެން ދުނިޔޭގެ ސިއްޙަތު ޖަމްޢިއްޔާގެ ޓީމެއް ވެސް އަންނަނީ އެ ސިޓީގައި ހަރަކާތްތެރިވަމުންނެވެ. އަދި މި ޓީމުން ދަނީ، ބަލިމީހުން ހޯދާ، ބަލިޖެހިފައިވާ މީހުން މޮނިޓާރ ކުރުމަށް އެހީތެރިވެދެމުންނެވެ. 

ބަލިން ރައްކާތެރިވުމަށް ކުރެވޭ މަސައްކަތުގެ ތެރެއިން މިހާތަނަށް 60،000 ގެއަކަށް ވަދެ، ބަލިފެތުރުމަށް މަގުފައިވާ ކަންކަން ނުކުރުމަށް ވަނީ މަޢުލޫމާތުދީފައެވެ. އަދި ބޯން ބޭނުންކުރާ ފެން ތަޤައްޔަރުވެފައިހުރިތޯ ބެލުމަށް، އެކި ހިސާބުތަކުން ފެން ނަގާ، ފެން ތަހުލީލު ކުރުމުގެ މަސައްކަތް ވެސް އެބަ ކުރިޔަށް ދެއެވެ. އަދި މި ޓީމުތަކުން ވަނީ ބުއިމަށް ތާފަނާ ފެން ބޭނުންކުރުމަށް ނަސޭހަތްތެރިވެފައެވެ.