އެޗްޑީސީގެ ކުރީގެ އެމްޑީގެ ގެއިން ފެނުނު މިލިއަނަކަށް ވުރެން ގިނަ ފައިސާ އަނބުރާ ހަވާލުކޮށްފި

ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީގެ ކުރީގެ މެނޭޖިންގް ޑިރެކްޓަރ، ފަޒުލް ރަޝީދުގެ ގެއިން ފެނުނު 1.4 މިލިއަން ރުފިޔާ އަނބުރާ ހަވާލުކޮށްފިއެވެ.

ފަޒުލް ދިރިއުޅެމުންދާގެ ފުލުހުން ބަލާފާސްކޮށްފައިވަނީ، ބިންވެރިޔާ އަދި ގެދޮރުވެރިޔާ ސްކީމާއި ގުޅިގެން އޭނާގެ މައްޗަށް ކުރެވުނު ކޮރަޕްޝަންގެ ތުޙުމަތުތަކާ ގުޅިގެން ކުރިޔަށްދާ ތަޙުޤީޤާ ގުޅިގެންނެވެ. އެގޮތުން މިިދިޔަ ޑިސެމްބަރު މަހުގެ 24 ވަނަ ދުވަހު އޭނާ ދިރިއުޅެމުންދާ އެޕާތްމެންޓު ބަލާފާސްކޮށް، އެ އެޕާާޓްމެންޓުން ފެނުނު ފައިސާ ފުލުހުން ވަނީ ގެންގޮސްފައެވެ.

ފުލުހުން މިއަދު ބުނީ، ތަޙުޤީޤާ ގުޅިގެން ބަލަންޖެހޭ ކަންކަން ބެލުމަށްފަހު، ފުލުހުންގެ ބެލުމުގެ ދަށަށް ގެނައި ފައިސާ ފަޒުލްއާއި ހަވާލުކޮށްފައިވާ ކަމަށެވެ.

"އެޗްޑީސީގެ ގޯތީގެ މައްސަލައިގައި ތުހުމަތުކުރެވޭ ފަރާތުގެ އެޕާޓްމެންޓް ބަލާފާސްކޮށް ފުލުހުންގެ ބެލުމުގެ ދަށަށް ގެނައި ފައިސާ އާއި ގުޅޭގޮތުން ބަލަންޖެހޭ ކަންކަން ބެލުމަށްފަހު ފައިސާގެ ވެރިފަރާތާއި ވަނީ ހަވާލުކޮށްފައި." ފުލުހުންގެ މީޑިއާ އޮފިޝަލް ހާމަކޮށްފައިވެއެވެ.

ފަޒުލްގެ ގެއިން ފެނުނު ފައިސާއާ މާލެ ސަރަހައްދުގައި ލޯންޗު އޮޕަރޭޓް ކުރާ "ރިލެކްސް ފެރީ ސާވިސް" ނަމަކަށް ކިޔާ ކުންފުންޏަކުން ހަވާލުވެފައިވެއެވެ. އެ ކުންފުނިން އޭރު ބުނެފައިވާ ގޮތުގައި އެއީ، ލޯންޗެއް ބަނުމަށް ފަޒުލްގެ ކުންފުންޏަށް ދިން 1.4 މިލިއަން ރުފިޔާއެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމުގެ ތުހުމަތު ފަޒުލްގެ މައްޗަށް އަންނަނީ ކުރަމުންނެވެ. އެގޮތުން ފަޒުލްގެ ބޭބެއާއި އިތުރު ބަޔަކަށް ބިންވެރިޔާ ސްކީމްގެ އުސޫލުގެ ބޭރުން ގޯތި ދޫކޮށްފައިވާކަމުގެ ތުހުމަތުކުރެއެވެ. މި މައްސަލައިގެ ތަހުގީގު އެންޓި ކޮރަޕްޝަން ކޮމިޝަނާއި ދިވެހި ފުލުހުންގެ ޚިދުމަތުން ގުޅިގެން ދަނީ ކުރަމުންނެވެ.

މި މައްސަލަ ފެންމަތިވުމާ ގުޅިގެން، ފަޒުލްވަނީ މަޤާމުން އިސްތިއުފާ ދީފައެވެ. 

ރައީސުލްޖުމްހޫރިއްޔާއަށް ފޮނުއްވި އިސްތިއުފާގެ ސިޓީގައި ފަޒުލް ބުނީ،  މަޤާމުގައި ހޭދަކުރި މުއްދަތުގައި ކުރެވިފައިވާ އަދި މިހާރު ކުރެވެމުންދާ ތުހުމަތުތަކަށް އިންކާރުކުރާ ކަމަށެވެ. އަދި އެޗްޑީސީގެ ފަރާތުން މިހާތަނަށް ކޮށްފައިވާ އެންމެހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ޕޮލިސީތަކުގެ އިމުގެ ތެރެއިން ކުންފުނީގެ މަޞްލަޙަތު އިސްކޮށް ކޮށްފައިވާ މުއާމަލާތްތަކެއްކަމަށެވެ.