ޚަބަރު
ޤަވާއިދާ ޚިލާފަށް އުޅޭ ބިދޭސީންނަށް ދެވުނު ދެވަނަ ފުރުސަތު ކާމިޔާބު

ޤަވާއިދާ ޚިލާފަށް އުޅޭ ބިދޭސީން ފޮޓޯ:އެޑިޝަން
ޤަވާއިދާ ޚިލާފަށް އުޅޭ ބިދޭސީން ޤަވާއިދުގެ ތެރެއަށް ވަނުމަށް ދެވުނު ދެވަނަ ފުރުސަތުގައި ގިނަ ފަރާތްތަކެއް ޤާނޫނީ އިމުގެ ތެރެއިން ވަދެފައިވާކަމަށް މޯލްޑިވްސް އިމިގްރޭޝަނުން ބުދަ ދުވަހު ހާމަކުރައްވައިފިއެވެ.
މޯލްޑިވްސް އިމިގްރޭޝަންގެ ޗީފް އިމިގްރޭޝަން އޮފިސަރ އަހުމަދު މުޖްތަބާ ޕީއެސްއެމް ނިއުސްއަށް ދެއްވި މަޢުލޫމާތުގައި ވިދާޅުވީ، ޤަވާއިދާ ޚިލާފަށް އުޅޭ ބިދޭސީން ދެނެގަތުމަށް ކުރިއަށްގެންދާ ރެއިޑް އޮޕަރޭޝަންތަކުގައި ގަވާއިދުން ފީ ނުދައްކާ ފަރާތްތަކާއި، އެމްޕްލޯޔަރު ބަދަލުވުމުގެ މަރުހަލާގައި ތިބި މީހުންގެ އިތުރުން ރެގިއުލަރައިޒޭޝަން ޕްރޮގްރާމް ފުރިހަމަ ނުވެ ތިބި ފަރާތްތައް ހިމެނޭކަން ފާހަގަކުރެވޭ ކަމަށެވެ.
މުޖްތަބާ އިތުރަށް ވިދާޅުވީ، މިފަދަ ފަރާތްތަކަށް ޤާނޫނީ އިމުގެ ތެރެއަށް ވަނުމަށް އިތުރު ފުރުސަތެއް ދެވި، އެ މުއްދަތު ހަމަވުމުން އިމިގްރޭޝަންގެ އޮފިސަރުން ދެވަނަ ފަހަރަށް އެ ބިދޭސީން ދިރިއުޅޭ ތަންތަން ބަލާ ފާސްކުރަން ދާކަމަށެވެ. މިގޮތަށް ބަލާ ފާސްކުރާއިރު ގިނަ ފަރާތްތަކެއް ޤާނޫނީ އިމުގެ ތެރެއަށް ވަދެފައިވާކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ.
މިފަދަ ގޮތަކަށް މުއްދަތު ދީފައި ހުރި ތަންތަން ދެވަނަ ފަހަރަށް އެބަ ޗެކްކުރެވޭ. ހަމަ ވަރަށް ކާމިޔާބު އިނގޭތޯ. އަޅުގަނޑުމެން އެގޮތަށް ނޯޓިސް ދީފައި ހުރި ހުރިހާތަނެއްހެން ހުރީ ރަނގަޅުކޮށްފައި
މުޖްތަބާ
މޯލްޑިވްސް އިމިގްރޭޝަނުން ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންދާއިރު، އިމިގްރޭޝަންގެ އަމާޒަކީ ކުރިއަށް އޮތް 3 އަހަރު ތެރޭގައި ބިދޭސީންގެ މައްސަލައަށް ދާއިމީ ހައްލެއް ގެނައުން ކަމަށްވެސް މުޖްތަބާ ފާހަގަކުރެއްވިއެވެ.