ލާމަރުކަޒީ ނިޒާމާގުޅޭ ޙާއްސަ ބައްދަލުވުމަކަށް ވަޒީރު އާދަމް ޝަރީފު މެނީލާއަށް

ލާމަރުކަޒީ ނިޒާމާ ގުޅޭ ގޮތުން ބާއްވާ ޙާއްސަ ބައްދަލުވުމަކަށް، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ފިލިޕީންސްގެ މެނީލާއަށް ވަޑައިގެންފިއެވެ.

އެ ވުޒާރާއިން ހާމަކޮށްފައިވާ ގޮތުގައި، މި ބައްދަލުވުމުގައި ލާމަރުކަޒީ ނިޒާމުގައި މުޖުތަމަޢުގެ ބައިވެރިވުން އިތުރުކުމާއި، ހެޔޮ ވެރިކަމާއި، ދެފުށް ފެންނަ ގޮތަށް ކަންކަންކުރުމާއި، ދެމެހެއްޓެނިވި ތަރައްޤީއަށް މަގުފަހިވާނެ ކަންކަމާ މެދު މަޝްވަރާތައް ކުރިއަށް ގެންދާ ގޮތަށް ހަމަޖެހިފައިވެއެވެ.

މި ދަތުރުފުޅަށް ފުރާވަޑައިގެންނެވުމުގެކުރިން ވަޒީރު ވިދާޅުވީ، މި ދަތުރުފުޅުގައި އެ މަނިކުފާނުގެ އެންމެ ބޮޑު އަމާޒަކީ ކައުންސިލްތަކުން ނިންމާ ނިންމުންތަކުގައި މުޖުތަމަޢުގެ ބައިވެރިވުން އިތުރުކުރެވޭނެ ގޮތްތައް ބެލުން ކަމަށެވެ.

"މި ދަތުރުގެ އެންމެ ބޮޑު ފޯކަސްއަކަށް ހަދަން ޤަސްތުކުރަނީ ދިވެހިރާއްޖޭގެ ކައުންސިލްތަކުގަ، ކައުންސިލްތަކުން ނިންމާ ނިންމުންތަކުގަ، މުޖުތަމަޢުގެ ބައިވެރިވުން ނުވަތަ ރަށުގެ ރައްޔިތުންގެ ބައިވެރިވުން އިތުރުކުރުމަށްޓަކައި މަސައްކަތް ކުރެވިދާނެ ގޮތްތަކަކީ ކޮބައިތޯ ބެލުން." ވެލާނާ އިންޓަރނޭޝަނަލް އެއަރޕޯޓްގެ ވީއައިޕީ ލައުންޖްގައި ހުންނަވައި ވަޒީރު ދެއްވި އިންޓަވިއުގައި ވިދާޅުވިއެވެ.

ވަޒީރުގެ އަރިހުގައި މި ދަތުރުފުޅުގައި، ސްޓޭޓް މިނިސްޓަރ މުޙައްދު މާހިރު ވެސް ބައިވެރިވެވަޑައިގެންނެވިއެވެ. 

އަދި މި ދަތުރުފުޅަކީ ޔޫއެންޑީޕީގެ ޚާއްޞަ އެހީތެރިކަމާއެކު ކުރައްވާ ދަތުރުފުޅެއްކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން ހާމަކޮށްފައިވެއެވެ.