މާބައިދޫ ކައުންސިލް މެންބަރު ޒަރީރު ކުއްލި ގޮތަކަށް ނިޔާވެއްޖެ

ލ އަތޮޅު މާބައިދޫ ކައުންސިލް މެންބަރު ޙަސަން ޒަރީރު ކުއްލި ގޮތަކަށް އިއްޔެ ނިޔާވެއްޖެއެވެ.

ޒަރީރު ނިޔާވުމާ ގުޅިގެން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިންނާއި، ވަޒީރު އާދަމް ޝަރީފު ޢުމަރު ވެސް ވަނީ ތަޢުޒިޔާ ވިދާޅުވެފައެވެ.

إِنَّا ِلِلَّٰهِ وَإِنَّا إِلَيْهِ رَاجِعُونَ
ލ. މާބައިދޫ ކައުންސިލް މެންބަރު ޙަސަން ޒަރީރު ކުއްލިގޮތަކަށް ނިޔާވި ޚަބަރު އަޅުގަނޑު އެހީ ކުއްލި ޙައިރާންކަމަކާއި ފުން ހިތާމައާއި އެކުގައެވެ.
މި ހިތާމަވެރި ވަޤުތުގައި އާއިލާއަށް ކެތްތެރިކަމަށް އެދެމެވެ. މައްޔިތާގެ ފާފަ ފުއްސަވައި،… https://t.co/C5i0ZnLz76

— Adam Shareef Umar (@Adamshareefz) February 4, 2025

މަޢުލޫމާތު ލިބިފައިވާ ގޮތުގައި ޒަރީރު ވަނީ އިއްޔެ މަސައްކަތަށް ވެސް ނިކުންނަވާފައެވެ. އަދި މެންދުރުފަހު އޮތް ކައުންސިލްގެ ބައްދަލުވުމެއްގައި ވެސް ބައިވެރިވެވަޑައިގެންނެވިއެވެ. 

އޭގެ ފަހުން އިއްޔެގެ ހަވީރުގެ ވަގުތެއްގައި މެޔަށް ތަދެއް އެރުމާ ގުޅިގެން ސިއްޙީ ފަރުވާ ދިނުމަށް ގަމު ރީޖަނަލް ހޮސްޕިޓަލަށް ގެންދިޔަކަމަށް ވެއެވެ. އަދި ޒަރީރު ނިޔާވީ ހޮސްޕިޓަލަށް ގެންދިޔަ ފަހުންކަމަށް މަޢުލޫމާތު ލިބިފައިވެއެވެ. 

ޒަރީރު ނިޔާވިއިރު ސިއްޙީ ގޮތުން ބޮޑު މައްސަލައެއް ހުރިކަމުގެ މަޢުލޫމާތު ލިބިފައި ނުވާކަމަށް މައިބާދޫ ކައުންސިލުން ޕީއެސްއެމްއަށް މަޢުލޫމާތު ދެމުން ހާމަކޮށްފައިވެއެވެ. 

ލ. މައިބާދޫ ކައުންސިލަކީ ކައުންސިލުގެ ރައީސް ހިމެނޭހެން 5 މެންބަރުންގެ މައްޗަށް އެކުލެވޭ ކައުންސިލެކެވެ. އެ ކައުންސިލުގެ މެންބަރު ކަމަށް ޒަރީރު އިންތިޙާބުވީ ޕީޕީއެމްގެ ޓިކެޓުގައެވެ.