ޚަބަރު
މަގޫދޫ އެއަރޕޯޓުގެ ރަންވޭ އާއި ޓާމިނަލްގެ %50 މަސައްކަތް ނިންމައިފި
ފ. މަގޫދޫގައި ތަރައްޤީކުރަމުންދާ އެއަރޕޯޓު، ފޮޓޯ: އެމްޓީސީސީ
ހުލާސާ
ރަންވޭގައި އޭބީސީ އެޅުމުގެ %56 މަސައްކަތާއި، ޓަރމިނަލް ބިލްޑިންގ އިމާރާތް ކުރުމުގެ %53 މަސައްކަތް ވަނީ ނިމިފައި.
ސަރުކާރުން ފ އަތޮޅު މަގޫދޫގައި ތަރައްޤީކުރަމުންދާ އެއަރޕޯޓުގެ %50 މަސައްކަތް ނިންމައިފިއެވެ. މިކަން ހާމަކޮށްފައިވަނީ އެ މަސައްކަތް ހަވާލުކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީންނެވެ.
އެގޮތުން އެމްޓީސީސީން ފާހަގަކޮށްފައިވާ ގޮތުގައި، މި މަޝްރޫޢުގެ ދަށުން ރަންވޭގައި އޭބީސީ އެޅުމުގެ %56 މަސައްކަތާއި، ޓަރމިނަލް ބިލްޑިންގ އިމާރާތް ކުރުމުގެ %53 މަސައްކަތް ވަނީ މިހާރު ފުރިހަމަކޮށްފައެވެ. އަދި ފަޔަރ ބިލްޑިންގ އިމާރާތްކުރުމުގެ %24 ނިމިފައިވާކަމަށް ވެސް އެ ކުންފުނިން ހާމަކޮށްފައިވެއެވެ.
ފ. މަގޫދޫ އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން، ރަންވޭގައި އޭބީސީ އެޅުމުގެ 56 އިންސައްތަ މަސައްކަތާއި، ޓަރމިނަލް ބިލްޑިންގ އިމާރާތް ކުރުމުގެ 53 އިންސައްތަ މަސައްކަތް ވަނީ މިހާރު ފުރިހަމަކުރެވިފައެވެ. މީގެ އިތުރުން، ފަޔަރ ބިލްޑިންގ އިމާރާތްކުރުމުގެ 24 އިންސައްތަ… pic.twitter.com/BHYuKijLDC
— MTCC Plc (@MTCCPlc) February 4, 2025
މަގޫދޫގައި އެއަރޕޯޓެއް ހެދުމުގެ މަސައްކަތް ފަށާފައިވަނީ 2023ވަނަ އަހަރުގެ ކުރީކޮޅެވެ. ނަމަވެސް މަސައްކަތް މަޑުޖެހިގެން ގިނަ ދުވަސްތަކެއް ހޭދަވުމަށްފަހު، މި މަސައްކަތް އަލުން ފަށާފައިވަނީ މިދިޔަ އަހަރުގެ ޖުލައި މަހުގެ ތެރޭގައެވެ.
މި އެއަރޕޯޓް ތަރައްޤީކުރަނީ ރަށުގެ ފަޅުން 30 ހެކްޓަރުގެ ބިން ހިއްކައިގެންނެވެ. އަދި މި މަޝްރޫޢަށް ސަރުކާރުން 231 މިލިޔަން ރުފިޔާގެ ބަޖެޓެއް ވަނީ ކަނޑައަޅާފައެވެ.
މަގޫދޫ އެއަރޕޯޓުގައި ފުރަތަމަ ތަރައްޤީކުރަން ނިންމީ 1200 މީޓަރުގެ ރަންވޭއެކެވެ. އެހެންނަމަވެސް މިހާރުވަނީ އެއަރޕޯޓުގައި 1800 މީޓަރުގެ ރަންވޭއެއް އެޅުމަށް ނިންމާފައެވެ.
