ޚަބަރު
އަހަރުގެ ފުރަތަމަ 3 ހަފްތާގައި ދައުލަތަށް 1.3 ބިލިއަންގެ އާމްދަނީއަކާއެކު ބޮޑު ފައިދާއެއް

އަހަރުގެ ފުރަތަމަ 3 ހަފްތާ 491.5 މިލިއަން ރުފިޔާގެ ފައިދާއެއް ލިބިފައިވޭ
ހުލާސާ
މި މުއްދަތުގައި ދައުލަތުގެ ޚަރަދުތައް ހުރީ 843 މިލިޔަން ރުފިޔާގައި.
އަދި 491.5 މިލިއަން ރުފިޔާގެ ފައިދާއެއް ލިބިފައިވޭ.
މި އަހަރުގެ ފުރަތަމަ 3 ހަފްތާ އާމްދަނީގެ ގޮތުގައި ދައުލަތަށް 1.3 ބިލިއަން ރުފިޔާ ލިބުނުއިރު، އެ މުއްދަތުގައި ޚަރަދު ކަނޑާފައި އޭގެން ބޮޑު އަދަދެއް ފައިދާ ވެއްޖެއެވެ.
މާލީ ވުޒާރާއިން އާއްމުކޮށްފައިވާ 'ވީކްލީ ފިސްކަލް ޑިވެލޮޕްމަންޓް' ރިޕޯޓުން ދައްކާގޮތުން، މި އަހަރުގެ ޖަނަވަރީ 1 އިން ފެށިގެން 23 ވަނަ ދުވަހުގެ ނިޔަލަށް ދައުލަތުގެ ޚަރަދުތައް ހުރީ 843 މިލިޔަން ރުފިޔާގައެވެ. އެހެންކަމުން އެ މުއްދަތުގައި ދައުލަތުގެ ޚަރަދަށްވުރެ އާމްދަނީ 491.5 މިލިޔަން ރުފިޔާ އިތުރެވެ.
މި މުއްދަތުގައި ލިބިފައިވާ އާމްދަނީގެ ބޮޑު ބަޔަކީ ޓެކްސްއެވެ. އެގޮތުން ޓެކްސްގެ ގޮތުގައި 1 ބިލިއަން ރުފިޔާ ވަނީ ލިބިފައެވެ. އެހެނިހެން އާމްދަނީގެ ގޮތުގައި ލިބިފައިވަނީ 275 މިލިއަން ރުފިޔާއެވެ. އަދި މި މުއްދަތުގެ ތެރޭގައި ހިލޭ އެހީގެ ގޮތުގައި 4.2 މިލިޔަން ރުފިޔާ ލިބިފައިވާކަމަށް މާލީ ރިޕޯޓުން ދައްކައެވެ.
މިދިޔަ އަހަރުގެ މި މުއްދަތުގެ ޚަރަދާއި މި އަހަރުގެ މި މުއްދަތުގެ ޚަރަދަށް ބަލާއިރު، މި އަހަރުގެ ޚަރަދުތައް 32% ދަށެވެ. މިދިޔަ އަހަރުގެ މި މުއްދަތުގައި ދައުލަތުގެ ހަރަދުތައް ހުރީ 1.2 ބިލިޔަނުގައެވެ.
މި މުއްދަތުގައި ސަރުކާރުގެ ބަޖެޓުން ބޮޑު އިންސައްތައެއް ހޭދަކޮށްފައިވަނީ ރިކަރަންޓު ޚަރަދުގެ ގޮތުގައެވެ. އެގޮތުން މި ޚަރަދަށް 843 މިލިއަން ހޭދަވެފައިވާއިރު، ކެޕިޓަލް ހަރަދުގެ ގޮތުގައި 3.4 މިލިޔަން ރުފިޔާ ހޭދަކޮށްފައިވާކަމަށް މާލީ ވުޒާރާގެ ރިޕޯޓުން ދައްކައެވެ.