ވަޒީރު ޠާރިޤު އެމްއެމްޕީއާރުސީގެ އިސްބޭފުޅުންނާ ބައްދަލުކުރައްވައި މި އަހަރުގެ ހަރަކާތްތަކާ ގުޅޭގޮތުން މަޝްވަރާކުރައްވައިފި

ފަތުރުވެރިކަމާ ތިމާވެއްޓާ ބެހޭ ވަޒީރު ޠާރިޤު އިބްރާޙިމް، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ އިސްބޭފުޅުންނާ ބައްދަލުކުރައްވައި، މި އަހަރު ފަތުރުވެރިކަން ޕްރޮމޯޓުކުރުމަށް އެ ކޯޕަރޭޝަނުން ރާވާފައިވާ ހަރަކާތްތަކާ ގުޅޭގޮތުން މަޝްވަރާކުރައްވައިފިއެވެ. 

އެމްއެމްޕީއާރުސީއަކީ ކުރިން ފަތުރުވެރިކަމާ ބެހޭ މިނިސްޓްރީގެ ދަށުން ހިންގަމުން އައި އޮފީހެއްކަމުން، މި މަހުގެ އެއްވަނަ ދުވަހު އެ ވުޒާރާއާއި ތިމާވެއްޓާ ބެހޭ ވުޒާރާ އެއްކުރައްވައި ފަތުރުވެރިކަމާ ތިމާވެއްޓާ ބެހޭ ވުޒާރާ އުފެއްދެވުމާ ގުޅިގެން، އެމްއެމްޕީއާރުސީއަކީ މިހާރު ވަޒީރު ޠާރިޤުގެ ބެލެނިވެރިކަމުގެ ދަށުން ހިންގަމުން އަންނަ އޮފީހެކެވެ.

ވަޒީރު ޠާރިޤު އަންގާރަ ދުވަހު ބޭއްވެވި ބައްދަލުވުމުގެ އަނެއް ބޭނުމަކީ، އެމްއެމްޕީއާރުސީގެ އިސް ބޭފުޅުން އެ މަނިކުފާނަށް ތަޢާރަފްވުމެވެ. 

Minister @thoriqibrahim held an introductory meeting with @mmprc_corporate to discuss the 2025 marketing activities calendar. @visitmaldives @mmprc_md pic.twitter.com/skCDBN494P

— Ministry of Tourism and Environment (@MoTmv) February 4, 2025

ރާއްޖޭގެ ފަތުރުވެރިކަން ފުޅާކުރުމަށް އެމްއެމްޕީއާރުސީން އަންނަނީ ކޮންމެ އަހަރަކު ވެސް ގިނަ ހަރަކާތްތަކެއް ހިންގަމުންނެވެ. އަދި އާ މާކެޓުތަކަށް ރާއްޖޭގެ ފަތުރުވެރިކަން ފުޅާކުރުމަކީ ވެސް އެ ކޯޕަރޭޝަނުން މި އަހަރު ވަރަށް ބޮޑަށް އިސްކަމެއް ދެއްވާނެކަމެއްކަމަށް، އެ ކޯޕަރޭޝަންގެ މެނޭޖިންގ ޑިރެކްޓަރ، ޝިއުރީ އިބްރާޙިމް ވަނީ ވިދާޅުވެފައެވެ.