ސަރުކާރު ބަންދު ނަމަވެސް، މާދަމާ ޕާސްޕޯޓުގެ ޚިދުމަތް ލިބޭނެ

ރައްޔިތުންގެ މަޖިލިސް މި އަހަރަށް ހުޅުވުމުގެ ގޮތުން ބާއްވާ ޖަލްސާއާ ގުޅިގެން މާދަމާއަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައިވީނަމަވެސް، ޕާސްޕޯޓުގެ ޚިދުމަތް މެދުނުކެނޑޭނެކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.

އެ އިދާރާއިން ހާމަކޮށްފައިވާ ގޮތުގައި، މާދަމާ ޚިދުމަތް ދިނުމަށް ހަމަޖެހިފައިވަނީ ވެލާނާގޭގައި ހުންނަ އިމިގްރޭޝަންގެ އޮފީހުންނާއި، ހުޅުމާލޭ ފޭސް-1 ގައި ހުންނަ އުމަރު ޒާހިރު ބިލްޑިންގުގައި ހުންނަ އިމިގްރޭޝަން އޮފީހުންނާއި އަދި ހުޅުމާލެ ފޭސް-2ގެ ވިނަރެސް-2 ގައި ހުންނަ އިމިގްރޭޝަންގެ އޮފީހުންނެވެ.

އެގޮތުން ޕާސްޕޯޓު ދޫކުރުމަށް ހެނދުނު 8:30 އިން ފެށިގެން މެންދުރުފަހު 2:00 އަށް ނަންބަރު ދޫކުރުމަށް ހަމަޖެހިފައިވާކަމަށް އެ އިދާރާއިން ހާމަކޮށްފައިވެއެވެ. މި ވަގުތުތަކުގައި ނަގާ ހުރިހާ ކިއު ނަންބަރަކަށް ގޮވާ ވަގުތު ކައުންޓަރަށް ހާޒިރުވެއްޖެނަމަ ޚިދުމަތް ލިބިލައްވާނެކަމަށް އިމިގްރޭޝަނުން ކުރިން ހާމަކޮށްފައިވެއެވެ.

ސަރުކާރު ބަންދު ދުވަހެއް ކަމުގައިވާ 2025 ފެބުރުވަރީ 06 ވަނަ ދުވަހު ޕާސްޕޯޓުގެ ޚިދުމަތް ދިނުމަށް ވަނީ ހަމަޖެހިފައި. pic.twitter.com/mDsqo0gPPf

— Maldives Immigration (@ImmigrationMV) February 5, 2025

އަދި ޕާސްޕޯޓަށް އެދި އޮންލައިންކޮށް 24 ގަޑިއިރު ހުށަހެޅޭނެ ކަމަށާއި، އިމިގްރޭޝަނަށް ހާޒިރުވެ ޕާސްޕޯޓަށް އެދި ހުށަހެޅަން ބޭނުންވާ ފަރާތްތަކަށް އެ ޚިދުމަތް ދޭނީ ހެނދުނު 9:00 އައި މެންދުރުފަހު 1:00 އާއި ދެމެދުކަމަށް ވެސް އެ އިދާރާއިން ހާމަކޮށްފައިވެއެވެ. އިމިގްރޭޝަނަށް ހާޒިރުވެ ޕާސްޕޯޓަށް އެދި ހުށަހެޅެނީ މެޑިކަލް އެމެޖެންސީ ހާލަތްތަކުގައާއި އުމުރުން 65 އަހަރުން މަތީގެ ބޭފުޅުންނަށެވެ. 
2025 ޖެނުއަރީ 25ވަނަ ދުވަހުން ފެށިގެން މާލޭ ސަރަޙައްދުގައި ހިމެނޭ އިމިގްރޭޝަނުގެ ތިން އޮފީހުން ވަނީ ކޮންމެ ހޮނިހިރު ދުވަހަކު ޕާސްޕޯޓު ދޫކުރަން ފަށާފައެވެ. އަދި މިއަންނަ ހޮނިހިރު ދުވަހުން ފެށިގެން އައްޑޫ ސިޓީއިން ވެސް ހޮނިހިރު ދުވަހު ޕާސްޕޯޓު ދޫކުރަން ފަށާނެކަމަށް، ކޮންޓްރޯލަރ ޖެނެެރަލް އޮފް އިމިގްރޭޝަން މުޙައްމަދު ޝަމްޢާން ވަނީ ވިދާޅުވެފައެވެ.