Ads by Exprox

ޚަބަރު

މާދަމާ ރައީސުލްޖުމްހޫރިއްޔާގެ ދެވަނަ ރިޔާސީ ބަޔާން އިއްވަވާނެ

މާދަމާ ރައީސުލްޖުމްހޫރިއްޔާގެ ދެވަނަ ރިޔާސީ ބަޔާން އިއްވަވާނެ

ރައިސުލްޖުމްހޫރިއްޔާ ރިޔާސީ ބަޔާން އިއްވެވުން/ފޮޓޯ: ރައީސް އޮފީސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

05 ފެބްރުއަރީ 2025، 01:53

05 ފެބްރުއަރީ 2025، 01:53

ހުލާސާ

ރިޔާސީ ބަޔާން އިއްވަވާ ޖަލްސާ އޮންނާނީ މާދަމާ ހެނދުނު 9:00 ގައި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ ދެވަނަ ރިޔާސީ ބަޔާން މާދަމާ އިއްވަވާނެއެވެ. ރައީސް ރިޔާސީ ބަޔާން އިއްވަވާނީ، މި އަހަރަށް ރައްޔިތުންގެ މަޖިލިސް ހުޅުވުމަށް މާދަމާ ހެނދުނު 9:00 ގައި ބާއްވަވާ ޖަލްސާގައެވެ. 

ދިވެހި ޖުމްހޫރިއްޔާގެ ޤާނޫނު އަސާސީގެ 84 ވަނަ މާއްދާގައި ވާ ގޮތުން، ކޮންމެ އަހަރެއްގެ ރައްޔިތުންގެ މަޖިލިސް ދައުރު ފަށާ ޖަލްސާގައި ރައިސުލްޖުމްހޫރިއްޔާ ރިޔާސީ ބަޔާން އިއްވަވަން ޖެހިވަޑައިގަންނަވާނެއެވެ. އަދި މި ރިޔާސީ ބަޔާނުގައި ޤައުމުގެ އަދުގެ ޙާލަތު ބަޔާންކޮށްދެއްވާ، ޤައުމުގެ އެކި މައްސަލަތައް ހައްލު ކުރެއްވުމަށް ރައިސުލްޖުމްހޫރިއްޔާ އަށް ފެނިވަޑައިގަންނަވާ ކަންކަން ހިއްސާކުރައްވާނެއެވެ. މާދަމާ އިއްވަވާ ރިޔާސީ ބަޔާނަކީ، އެމަނިކުފާނުގެ ދެވަނަ ރިޔާސީ ބަޔާނަށްވާއިރު، މި ބަޔާނުގައި ސަރުކާރުން ދިވެހިރާއްޖޭގެ އެކިއެކި ދާއިރާތަކުން ތަރައްޤީއަށް ކަނޑައަޅުއްވާފައިވާ ސިޔާސަތުތައް ބަޔާންކުރައްވާނެއެވެ. 

ރައްޔިތުންގެ މަޖިލީހުގައި ބާއްވަވާ މި ޖަލްސާގައި، ސަރުކާރުގެ އިސްވެރިންނާއި، އުއްތަމަ ފަނޑިޔާރާއި، އެކިއެކި ޤައުމުތަކުން ރާއްޖެއަށް ކަނޑައަޅުއްވާފައިވާ ސަފީރުންނާއި، އެހެނިހެން ޢިއްޒަތްތެރިން ބައިވެރިވެ ވަޑައިގަންނަވާނެއެވެ. މީގެ އިތުރުން، ރައިސުލްޖުމްހޫރިއްޔާގެ ދެކަނބަލުން ޖަލްސާއަށް ވަޑައިގަތުމުން، ރައްޔިތުންގެ މަޖިލީހުގެ ރައީސްގެ ދެކަނބަލުން އެމަނިކުފާނަށް މަރުޙަބާ ދަންނަވާނެއެވެ. އެއަށްފަހު އެތަނުގައި އެމަނިކުފާނަށް ރިޔާސީ ކުރުނީހެއް އަރުވާނެއެވެ. ރައީސުލްޖުމްހޫރިއްޔާ މަޖިލިސްކުރާ ގެއަށް ވަޑައިގަތުމުން އެމަނިކުފާނަށް މަރުޙަބާ ދަންނަވާނީ، މަޖިލީހުގެ ނައިބު ރައީސް އާއި ޕާލަމެންޓަރީ ގްރޫޕު ލީޑަރުންގެ އިތުރުން، މަޖިލީހުގެ އިދާރާގެ އިސްވެރިންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ފުރަތަމަ ރިޔާސީ ބަޔާނުގައި ވަނީ، ޤައުމު ވެއްޓިފައިވާ އަނދަވަޅުން އަރައިގަތުމަށް އެ މަނިކުފާނު ކުރައްވަން ބޭނުންފުޅުވާ މަސައްކަތްތައް އިޢުލާންކުރައްވާފައެވެ. ހަމަ އެހެންމެ، ޤައުމުގެ ސިޔާދަތީ މިނިވަންކަން ދެމެހެއްޓެވުމަށް އެމަނިކުފާނު ހާސިލްކުރައްވަން ބޭނުންފުޅުވާ ކަންތައްތައް ވެސް ވަނީ ހިއްސާކުރައްވާފައެވެ. ރައީސް ވަނީ، އެމަނިކުފާނުގެ ފުރަތަމަ ރިޔާސީ ބަޔާނުގައި ބަޔާންކުރައްވާފައިވާ ގިނަ ކަންކަން ޙާޞިލުކުރައްވާފައެވެ. އެހެންކަމުން، މާދަމާ އިއްވަވާ ރިޔާސީ ބަޔާނުގައި މި އަހަރަށް އެ މަނިކުފާނު ކަނޑައަޅުއްވާފައިވާ، މުހިންމު މަސައްކަތްތަކާއި، ރައްޔިތުން ކަންބޮޑުވުން ފާޅުކުރާ މައްސަލަތަކަށް އަލިއަޅުވާލާނެއެވެ. އަދި ސަރުކާރުން މި އަހަރަށް ކަނޑައަޅުއްވާ މުހިންމު ސިޔާސަތުތައް ވެސް މާދަމާގެ ރިޔާސީ ބަޔާނުގައި އިއްވަވާނެއެވެ. 

ކޮންމެ އަހަރެއްގައި ވެސް ރިޔާސީ ބަޔާން އިއްވަވާ ދުވަހަކީ ބަންދު ދުވަހެއްގެ ގޮތުގައި ސަރުކާރުން ހަމަޖައްސަވައެވެ. އެގޮތުން މާދަމާއަކީ ވެސް ސަރުކާރު ބަންދު ދުވަހެއްގެ ގޮތުގައި ވަނީ ކަނޑައަޅުއްވާފައެވެ. 

މި ލިޔުން ކިޔާލުމުން

Ads by MSS