Ads by Exprox

ޚަބަރު

ރޯދަމަހާއި ދިމާކޮށް ގޭތެރެ ސާފުކުރުމަށްފަހު ނެރޭ ކުނި މަގުމަތީގައި ނުބެހެއްޓުމަށް އީޕީއޭއިން އިލްތިމާސްކުރައްވައިފި

ރޯދަމަހާއި ދިމާކޮށް ގޭތެރެ ސާފުކުރުމަށްފަހު ނެރޭ ކުނި މަގުމަތީގައި ނުބެހެއްޓުމަށް އީޕީއޭއިން އިލްތިމާސްކުރައްވައިފި

މާލެ މަގުމައްޗަށް އުކާލާފައި ހުރި ކުނިތަކެއް/ފޮޓޯ: މިނިވަން ނިއުސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

05 ފެބްރުއަރީ 2025، 02:51

05 ފެބްރުއަރީ 2025، 02:51

ހުލާސާ

މަގު މައްޗަށް ކުނި އެޅުމުގެ ސަބަބުން ބޮޑެތި ޞިއްޙީ މައްސަލަތަކެއް ކުރިމަތިވެދާނެ

ރޯދަ މަހާއި ދިމާކޮށް ގޭތެރެ ސާފުކުރުމުގެ ތެރޭގައި އުފެދޭ އެކި ބާވަތުގެ ކުނިތައް މަގުމައްޗަށް ނެރެމުންދާތީ، މަގު މައްޗަށް ކުނިތައް އުކާނުލުމަށް އެންވަޔަރަންމަންޓަލް ޕްރޮޓެކްޝަން އޭޖެންސީ، އީޕީއޭއިން އިލްތިމާސްކުރައްވާފިއެވެ. 

އީޕީއޭއިން ވިދާޅުވީ، ރަމަޞާން މަހަށް ތައްޔާރުވުމުގެ ގޮތުން ގޭތެރެ ސާފުކުރުމަށްފަހު ދުވާރުމައްޗަށް ކުނި ނެރެފައި ހުންނަތަން ފެންނަ ކަމަށެވެ. އެގޮތުން، ގޭބީސީތަކުންނާއި، ފިހާރަތަކުގައި އުފެދޭ އެކިބާވަތުގެ ކުނި މަގުމައްޗަށް ނެރި އުކާލާފައި ހުންނަކަން ފާހަގަވެފައިވާކަމަށް އީޕީއޭއިން މަޢުލޫމާތުދެއެވެ.

އީޕީއޭއިން ވިދާޅުވީ، މިގޮތަށް ކުނި ނެރިފައި ބެހެއްޓުމުގެ ސަބަބުން މަގުތައް ބޭނުންކުރާ ޢާންމު ރައްޔިތުންނަށް އެކިކަހަލަ އުނދަގޫތައް ދިމާވާ ކަމަށެވެ. ހަމަ އެހެންމެ، މިކަމުގެ ސަބަބުން މަގުތައް ނުސާފުވެގެންދާކަން ވެސް އެ އެޖެންސީ އިން ވަނީ ފާހަގަކުރައްވާފައެވެ. އަދި، މަގު މައްޗަށް ކުނި އެޅުމުގެ ސަބަބުން ބޮޑެތި ޞިއްޙީ މައްސަލަތަކެއް ކުރިމަތިވެދާނެކަމަށް ވެސް އީޕީއޭއިން ވަނީ ވިދާޅުވެފައެވެ.

އެންވަޔަރަންމަންޓަލް ޕްރޮޓެކްޝަން އޭޖެންސީ އިން ވަނީ ގޭތެރެ ސާފުކުރުމަށް ފަހު މަގުމައްޗަށް ކުނި އެޅުމުގެ ބަދަލުގައި، ކަންކަން ކުރެވޭނެ ގޮތްތައް ހިއްސާކުރައްވާފައެވެ. އެގޮތުން، ކުނި އުކާލެވޭނެ އިންތިޒާމު ކުރީ ބައިގައި ހަމަޖެއްސެވުމަށް ރަށްރަށުގައި ނަމަ، އެ ރަށެއްގައި ކުނީގެ ޚިދުމަތްދޭ ފަރާތްތަކާއި ގުޅިގެން މަސައްކަތް ކުރެއްވޭނެ ކަމަށް އެ އެޖެންސީ އިން ވަނީ ވިދާޅުވެފައެވެ. ހަމަ އެހެންމެ، ސިޓީތަކުގައި ވޭސްޓް މެނޭޖްމަންޓް ކޯޕަރޭޝަނާއި ގުޅުއްވައިގެން މިކަން ހަމަޖެއްސޭނެކަމަށް އީޕީއިން ވަނީ މަޢުލޫމާތުދެއްވާފައެވެ.

އީޕީއޭއިން ވިދާޅުވީ، ތިމާވެށި ތަޣައްޔަރުވާނެފަދަ ގޮތަކަށް ކުނި ގެންގުޅުމާއި، ކުނި ނައްތާލުމަކީ ކުނި މެނޭޖުކުރުމުގެ ޤާނޫނުގެ ދަށުން މަނާކަމެއް ކަމަށެވެ. ހަމަ އެހެންމެ، ޢާންމު ސަރަޙައްދުތަކަށް ކުނި އުކާލުމުގެ ބަދަލުގައި އެ ސަރަޙައްދުތައް އެންމެނަށް ވެސް ބޭނުންކުރެވޭނެހެން ސާފުކޮށް ބޭއްވުމަށް އެންވަޔަރަންމަންޓަލް ޕްރޮޓެކްޝަން އޭޖެންސީ އިން ވަނީ އިލްތިމާސްކުރައްވާފައެވެ. 

ރަމަޟާން މަހާއި ދިމާކޮށް ގޭތެރެ ސާފުކުރުމަށްފަހު މަގު މައްޗަށް ކުނިތައް ނެރެ އުކާލާ މައްސަލަ ކޮންމެ އަހަރަކު ވެސް ފެންމަތިވެއެވެ. އަދި، މިކަން މިގޮތަށް ކުރާ ފަރާތްތަކާއި މެދު ފިޔަވަޅު ވެސް ވަނީ އަޅައިފައެވެ. 

މި ލިޔުން ކިޔާލުމުން

Ads by MSS