ޚަބަރު
ބިދޭސީންގެ ބަޔޮމެޓްރިކްސް ނެގުމަށް މިއަދު ރެހެންދި ސްކޫލްގައި ޙާއްސަ ހަރަކާތެއް

ކުރަނގި އޮޕަރޭޝަންގެ ތެރެއިން، ފޮޓޯ: މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ
މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ކުރިޔަށްގެންދާ "ކުރަނގި" އޮޕަރޭޝަންގެ ތެރެއިން، ބިދޭސީންގެ ބަޔޮމެޓްރިކްސް ނެގުމަށް މިއަދު ރެހެންދި ސްކޫލްގައި ޙާއްސަ ހަރަކާތެއް ބޭއްވުމަށް ނިންމައިފިއެވެ.
މިނިސްޓްރީން ހާމަކޮށްފައިވާ ގޮތުގައި މި ހަރަކާތް ކުރިޔަށް ގެންދިއުމަށް ނިންމީ ރާއްޔިތުންނާ ގާތުން، ލުއިފަސޭހާ ޚިދުމަތެއް ދިނުމަށް ކަމަށެވެ.
އެގޮތުން ރެހެންދި ސްކޫލުގައި މި ހަރަކާތް ކުރިޔަށް ގެންދިއުމަށް ހަމަޖެހިފައިވަނީ މިއަދު 16:00 އިން 23:00 އަށެވެ.
"މި މިނިސްޓްރީ އިން ކުރިއަށް ގެންދާ "ކުރަނގި" އޮޕްރޭޝަންގައި ބިދޭސީންގެ ބަޔޯމެޓްރިކްސް ނެގުމުގެ ޕްރޮގްރާމް، ވަޒީފާދޭ ފަރާތްތަކާ ގާތުން އަދި އަވަހަށް ކުރިއަށް ގެންދިއުމަށްޓަކައި 2025 ފެބްރުއަރީ 05 ވަނަ ދުވަހުގެ 16:00 އިން 23:00 އަށް ރެހެނދި ސްކޫލް ހޯލްގައި ބަޔޯމެޓްރިކްސް ނެގުމުގެ އެންމެހާ އިންތިޒާމްތައް ހަމަޖެހިފައިވާނެ ކަމުގައި މަޢުލޫމާތައްޓަކައި ދަންނަވަން." މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ޙިއްސާކޮށްފައިވާ މެސެޖުގައި ވެއެވެ.
މި އޮޕަރޭޝަންގެ ތެރެއިން މާލެ ސަރަޙައްދުގައި މަސައްކަތް ކުރަމުންދާ އެންމެހާ ބިދޭސީންގެ ބައޯމެޓްރިކްސް މާރިޗު 15ގެ ކުރިން އަޕްޑޭޓުކުރުމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ވަނީ އަންގާފައެވެ.
މި މަސައްކަތް ކުރިއަށް ގެންދިއުމަކީ ބިދޭސީންނަށް ވަޒީފާދޭ ފަރާތްތަކުގެ ޒިންމާއެއް ކަމަށާއި، މާލެ ސަރަޙައްދުގައި މަސައްކަތްކުރާ ބިދޭސީންގެ ބަޔޮމެޓްރިކްސް ނެގުމާއި، އޮޕަރޭޝަން ކުރަނގީގެ ދަށުން ކުރިއަށްގެންދާ އެންމެހާ ކަންތައްތައް ވިލަރެސްކޮށް، ކޯޑިނޭޓް ކުރަމުން ގެންދާނީ އެންސީއައިޓީ އިން ޤާއިމްކޮށްފައިވާ ޖޮއިންޓް އޮޕަރޭޝަން ސެންޓަރގައިކަމަށް ވެސް މިނިސްޓްރީން ވަނީ ހާމަކޮށްފައެވެ.