Ads by Exprox

ޚަބަރު

އުމްރާވެރިންތަކެއް މައްކާއަށް ގެންދިއުމަށްފަހު ހާލުގައި ޖެއްސި ކުންފުނީގެ ވެރިޔާގެ މައްޗަށް މަނީލޯންޑްރިންގެ ދަޢުވާ އުފުލައިފި

އުމްރާވެރިންތަކެއް މައްކާއަށް ގެންދިއުމަށްފަހު ހާލުގައި ޖެއްސި ކުންފުނީގެ ވެރިޔާގެ މައްޗަށް މަނީލޯންޑްރިންގެ ދަޢުވާ އުފުލައިފި

މަޝްއަރު ޓުއާސްގެ ވެރިޔާ އަލީ ފާރިޝް--

މިފްތާޙް މުޙައްމަދު

މިފްތާޙް މުޙައްމަދު

05 ފެބްރުއަރީ 2025، 07:45

05 ފެބްރުއަރީ 2025، 07:45

މިދިޔަ ރޯދަމަހު އުމްރާވެރިންތަކެއް މައްކާއަށް ގެންދިއުމަށްފަހު ހާލުގައި ޖެއްސި އަލް-މަޝްއަރު ޓުއާސްގެ ވެރިޔާގެ މައްޗަށް މަނީލޯންޑްރިންގެ ދަޢުވާ އުފުލައިފިއެވެ. 

އަލް-މަޝްއަރު ޓުއާސްގެ ޑިރެކްޓަރުންގެ ބޯޑުގައި ތިބެނީ އަލީ ފާރިޝް އާއި މޫސާ ޔާމީންއެވެ. އަދި އެ ކުންފުނި ރެޖިސްޓަރކޮށްފައިވަނީ އަލީ ފާރިޝްގެ ނަމުގައެވެ.

މިދިޔަ އަހަރުގެ އެޕްރީލް މަހު އަލް-މަޝްއަރު ޓުއާރސްގެ މައްސަލަ ފުލުހަށް ހުށަހެޅީ އިސްލާމިކް މިނިސްޓްރީންނެވެ. އަދި މި މައްސަލައިގައި ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން ވަނީ އަލީ ފާރިޝްގެ މައްޗަށް ދެ ދަޢުވާއެއް ކޮށްފައެވެ. އެއީ ޓެކުމުގެ ދައުވާ އާއި ލޯންޑްރިންގެ ކުށުގެ ދައުވާއެވެ.

މީގެތެރެއިން އޭނާގެ މައްޗަށް ޓެކުމުގެ ދަޢުވާކުރީ، އެ ކުންފުނިން ޙައްޖާއި ޢުމްރާއަށް މީހުން ގެންދިއުމުގެ ޙުއްދަ ނުދެނީސް، އެއީ ޙުއްދަ ދީފައިވާ ކުންފުންޏެއްކަމަށް ބުނެ މީހުންގެ އަތުން ފައިސާ ނަގާފައިވުމުންނެވެ.

އަދި އޭނާގެ މައްޗަށް މަނީލޯންޑްރިންގެ ދައުވާ އުފުލާފައިވަނީ، ޢުމްރާއަށް ގެންދިއުމަށްކަމަށް ބުނެ މީހުންގެ އަތުން ދިވެހި ރުފިޔާ އާއި އެމެރިކާ ޑޮލަރު ނެގުމަށްފަހު، އެއްބަސްވުމާ ޚިލާފުވެ، ފައިސާ ވެސް އަނބުރާ ރައްދުކޮށްދީފައި ނުވާތީއެވެ.

ފާރިޝް ހިޔާނާތްތެރިވިކަމަށް ތުހުމަތުކުރެވޭ ފައިސާގެ އަދަދަކީ 391،072ރ. އެވެ. އަދި މި ފައިސާ އެ ކުންފުންޏަށް ދެއްކި މީހުންނަށް ވީ ގެއްލުމުގެ ބަދަލުގެ ގޮތުގައި، ފާރިޝް އަތުން އެ ފައިސާ ނަގައިދިނުމަށް ދައުވާގައި ވަނީ އެދިފައެވެ.

އޭނާއަށް މަނީ ލޯންޑްރިންގެ ކުށުގެ ދައުވާ ކުރީ ކުންފުނީގެ ނަމުގައި ނެގި ފައިސާ ފާރިޝްގެ އަމިއްލަ އެކައުންޓުތަކާއި ހިއްސާ އޮންނަ ޓްރިއާ ޕްރައިވެޓް ލިމިޓެޑާއި ހާފްޓަން މޯލްޑިވްސް ޕްރައިވެޓް ލިމިޓެޑްގެ އިތުރުން އިތުރު ކުންފުނިތަކަށް ޖަމާކޮށް، އެ ފައިސާ ބޭނުންކޮށް ފައިސާ ލޯންޑާކޮށްފައިވާތީ ކަމަށް ޕީޖީން ބުންޏެވެ.

އަލް-މަޝްއަރު ޓުއާސް ހިންގަމުން އަންނަނީ އަލް-މަޝްއަރު ޕްރައިވެޓްގެ ދަށުންނެވެ. މި ކުންފުނީގެ ދަށުން ހައްޖާއި އުމްރާއަށް މީހުން ގެންދިއުމަށް އަލް-މަޝްއަރު ހައްޖު އެންޑް އުމްރާގެ ނަމުގައި ވެސް ކުރިން ގްރޫޕެއް ހިންގާފައިވެއެވެ. ނަމަވެސް އެއީ އުމްރާއަށް މީހުން ގެންދިއުމުގެ ހުއްދަ އިސްލާމިކް މިނިސްޓްރީ އިން ބާތިލްކޮށްފައި އޮތް ކުންފުންޏެކެވެ.

އެ ކުންފުނިން މިދިޔަ އަހަރުގެ ރޯދަމަހު އުމްރާއަށް މީހުން ގެންދިޔައީ އަލް-މަޝްއަރު ޓުއާސްގެ ނަމުގައި ޓްރެވަލް އެޖެންސީއެއް ހަދައިގެން، މިނިސްޓްރީއިން ހުއްދަ ނުނަގައެވެ. އެ ފަހަރު އުމްރާއަށް ދިޔަ މީހުން ތާށިވީ، އެމީހުންގެ ރިޓާން ޓިކެޓު ނެގުމަށް ދިން ޗެކު ބައުންސްވެ، ޓިކެޓު އިޝޫ ނުކުރުމުންނެވެ. އަދި އެމީހުން އަންނަން އޮތް ތާރީޙަށް ވުރެން އެއް ހަފްތާ ފަހުން ރާއްޖެ އާދެވުނުއިރު، އެ މުއްދަތުގެ ހުރިހާކަމެއް ހަމަޖައްސަން ޖެހުނީ އެމީހުން އަމިއްލައަށެވެ. 

މި ލިޔުން ކިޔާލުމުން

Ads by MSS