ޚަބަރު
ސަރުކާރުގެ މުހިންމު މަޤާމުތަކެއް ފުރުއްވި ޗީފް ހަމީދު އަނެއްކާވެސް ހާރިޖީ ދާއިރާއަށް

އަބްދުﷲ ޙަމީދު (ޗީފް ހަމީދު)---
ސަރުކާރުގެ މުހިންމު މަޤާމުތަކެއް ފުރުއްވާ، އަދި ހާރިޖީ ދާއިރާގައި ވެސް ކުރިން ޚިދުމަތްކުރެއްވި އަބްދުﷲ ޙަމީދު (ޗީފް ހަމީދު) އަނެއްކާވެސް ހާރިޖީ ދާއިރާއާ ގުޅިވަޑައިގެންފިއެވެ.
މަޢުލޫމާތު ލިބިފައިވާ ގޮތުގައި ހަމީދު މިހާރު ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖުގެ މަޤާމުގައެވެ. ހަމީދު އެ މަޤާމަށް އައްޔަންކޮށްފައިވަނީ މިދިޔަ މަހުގައިކަމަށް ވެސް މަޢުލޫމާތު ލިބެއެވެ.
ޚިދުމަތާ ދުރަށް ވަޑައިގެންނެވުމުގެ ކުރިން، ޙަމީދު އެންމެ ފަހުން މަޤާމެއް ފުރުއްވާފައިވަނީ ރައީސް ޔާމީންގެ ވެރިކަމުގައެވެ. އެގޮތުން އެންމެ ފަހުން ހުންނެވީ ރާއްޖެއިން ސައުދީ ޢަރަބިއްޔާއަށް ކަނޑައަޅުއްވާފައި ހުންނެވި ސަފީރުކަމުގެ މަޤާމުގައެވެ.
އަދި އޭގެ ކުރިން، ރައީސް މަޢުމޫން ޢަބްދުލް ޤައްޔޫމްގެ ވެރިކަމުގައި، ޗީފް އޮފް ޕްރޮޓޮކޯލްގެ މަޤާމުގައި 15 އަހަރު ޚިދުމަތްކުރެއްވިއެވެ. އޭގެފަހުން ފޮރިން މިނިސްޓްރީގެ ޑެޕިއުޓީ މިނިސްޓަރުކަމާއި ސްޓޭޓް މިނިސްޓަރުކަން ވެސް ހަމީދު ވަނީ ކުރައްވާފައެވެ.