"އިސްރަށްވެހިންގެ ނާދީ" ހުޅުމާލޭ ދެވަނަ ފިޔަވަހީގައި

އިސްރަށްވެހިންގެ ނާދީ މިމަހު ހުޅުމާލެ ދެވަނަ ފިޔަވަހީގައި ހުޅުވާ، ޚިދުމަތްދޭން ފަށާނެކަމަށް އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

އުމުރުން ދުވަސްވީ މީހުންގެ ބައިވެރިވުން މުޖުތަމަޢުގެ ތެރޭގައި އިތުރުކޮށް، އެމީހުންނަށްވެސް އެކިއެކި ހަރަކާތްތަކުގައި ބައިވެރިވުމަށް ފުރުޞަތު ދިނުމަށް ސަރުކާރުން ޤާއިމުކުރާ މި އިސްރަށްވެހިންގެ ނާދީއަކީ، ކާމިޔާބުކަމާއެކު މާލެ ސަރަހައްދުގައި ހިންގަމުން ގެންދެވެނެކަމަށް އުންމީދުކުރެވޭ މަރުކަޒެކެވެ. އެތަނަށް ބޭނުންވާ ސާމާނު ހޯދުމުގެ މަސައްކަތްތައް ކޮށްފައިވަނީ ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީގެ އިޖުތިމާޢީ ޒިންމާގެ ދަށުންނެވެ.

ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ އިސްރަށްވެހިންގެ އިޖުތިމާޢީ މަރުކަޒު، އެޗްޑީސީގެ ފަރާތުން ރަސްމީކޮށް މިހާރު ވަނީ ވުޒާރާއާއި ހަވާލުކޮށްފައެވެ. މި ނާދީއަކީ އިސްރަށްވެހިންގެ ޖިސްމާނީ، ނަފްސާނީ އަދި އިޖުތިމާޢީ ދުޅަހެޔޮކަން ކަށަވަރުކުރުމަށް އިންތިޒާމު ކުރެވިގެން ތަފާތު ޚިދުމަތްތަކެއް ފޯރުކޮށްދިނުމަށް ބިނާކޮށްފައިވާ ތަނެއްކަމަށް އިޖުތިމާޢީ ތަރައްޤީއާ ބެހޭ ވުޒާރާއިން ވަނީ ކަށަވަރުކޮށްދީފައެވެ. 

ހޭލުންތެރިކަމުގެ ޕްރޮގްރާމްތަކާއި ދީނީ ހަރަކާތްތަކާއި، އެކިކަހަލަ ކުޅިވަރު ހަރަކާތްތައް، އަސްރަށްވެހީންނަށް ޚާއްސަކޮއްގެން މި ނާދީގައި ހިންގުމަކީ ވުޒާރާ މަޤުސަދެވެ. އަދި ޚާއްސަ ދުވަސްތައް ފާހަގަކުރުމާއެކު، އިސްރަށްވެހިންގެ އެކިހަލަ އެއްވުންތައްވެސް ބާއްވަމުން ގެންދިޔުމަށް މަފަދަ މަރުކަޒުތަކުގެ އަލިގައި ސަރުކާރުން ދަނީ މަސައްކަތްކުރަމުންނެވެ.