ރޯދަމަހާއި ދިމާކޮށް ގެންނަ ކާބޯތަކެތީގެ ފުރަތަމަ ޝިޕްމަންޓް މިމަހު ބާޒާރަށް؛ އެސްޓީއޯ

ރޯދަމަހާއި ދިމާކޮށް ގެންނަ ކާބޯތަކެތީގެ ފުރަތަމަ ޝިޕްމަންޓް މިމަހު ބާޒާރަށް ނެރެވޭނެކަމަށް ސްޓޭޓް ޓްރޭޑިން އޯގަނައިޒޭޝަން، އެސްޓީއޯއިން ވިދާޅުވެއްޖެއެވެ.

ރޯދަމަހާ ދިމާކޮށް ކާއެއްޗެތީގެ ޑިމާންޑް ބޮޑުވަމުން ދާވަރަކަށް، އެ ޑިމާންޑަށް ކޭޓަރު ކުރެވޭނެވަރުގެ ސްޓޮކެއް އޮތުމަކީ ވަރަށް މުހިންމު ކަމެއް ގޮތުގައި އެސްޓީއޯއިން ދެކެލައްވައެވެ. އޮތް ރޯދަމަހަށް ތައްޔާރުވުމުގެ ގޮތުން ޢާންމުންނަށް ދަތިނުވާނެ މިންވަރަށް ކާބޯތަކެތި ރާއްޖެއަށް އެތެރެކުރުމަށާއި ރާއްޖޭގެ އެކި ހިސާބުތަކަށް މުދާ ފޯރުކޮށްދިނުމަށް މަސައްކަތްކުރަމުންދާކަމަށާއި، ރޯދަމަހަށް ބޭނުންވާ ކާބޯތަކެތީގެ ފުރަތަމަ ޝިޕްމެންޓް މިމަހުގެ ކުރީކޮޅު ބާޒާރަށް ނެރެވޭނެކަމަށް އެސްޓީއޯއިން ވިދާޅުވިއެވެ.

ރާއްޖެ އެތެރެކޮށް ބާޒާރަށް ނެރުމަށް ހަމަޖެހިފައިވާ ކާބޯތަކެތީގެ ތެރޭގައި އަސާސީ ކާބޯތަކެއްޗާއި ތަރުކާރީއާއި މޭވާއާއި ޕްރޮސެސްޑް ކާނާގެ އިތުރުން ކެއްކުމަށް ބޭނުންކުރާތަކެތި ހިމެނޭއިރު، އަންނަ މަހު ފަށާ ރޯދަމަސް ފެށެންވާއިރަށް މަދުނުވާވަރަށް ސްޓޮކު ލިބޭކަމަށް އެސްޓީއޯއިން މަޢުލޫމާތުދެއްވައެވެ.