ޚަބަރު
މާލޭގެ ގެއެއްގައި އަލިފާނުގެ ހާދިސާއެއް ހިނގުމާ ގުޅިގެން ދެ އާއިލާއަކަށް އިންސާނީ އެހީ ފޯރުކޮށްދީފި

އަލިފާނުގެ ހާދިސާ ހިނގި ގޭގެ އެޕާޓްމެންޓެއްގެ ތެރެ، ފޮޓޯ: އެންޑީއެމްއޭ
މާލޭގެ ގެއެއްގައި އަލިފާނުގެ ހާދިސާއެއް ހިނގުމާ ގުޅިގެން ދެ އާއިލާއަކަށް އިންސާނީ އެހީ ފޯރުކޮށްދީފިއެވެ.
މި ހާދިސާ ހިނގައިގެން އުޅޭކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ރިޕޯޓުކޮށްފައިވަނީ ރޭގެ 10:48ގައެވެ.
އެމްއެންޑީއެފް އިން އޭރު ހާމަކޮށްފައިވާ ގޮތުގައި، ހ. ކުއްޅަވައްދޮށުގޭ 3ވަނަ ފަންގިފިލާގައި އަލިފާނުގެ ހާދިސާއެއް ހިނގުމާ ގުޅިގެން، އަލިފާން ނިއްވުމުގެ މަސައްކަތުގައި އެމްއެންޑީއެފްގެ ފަޔަރ އެންޑް ރެސްކިއު ސަރވިސަސް އިން އޭރު ދިޔައީ ހަރަކާތްތެރިވަމުންނެވެ.
އަދި އެ އަލިފާންގަނޑު ވަނީ މާގިނައިރުތަކެއް ނުވެ ނިއްވާލާފައެވެ.
މި ހާދިސާއާ ގުޅިގެން ނޭޝަނަލް ޑިޒާޒްޓަރ މެނޭޖްމެންޓު އޮތޯރިޓީއިން ހާމަކޮށްފައިވާ ގޮތުގައި، އަލިފާނުގެ ހާދިސާ ހިނގި ގޭގެ ދެ އެޕާޓުމެންޓެއްގައި އުޅުނު ދެ އާއިލާއެއް ތިބީ އިންސާނީ އެހީތެރިކަން ފޯރުކޮށްދޭންޖެހޭ ހާލަތެއްގައެވެ.
އެހެންކަމުން އެމީހުނަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ ޚިދުމަތް އެ އޮތޯރިޓީން ފޯރުކޮށްދީފައިވާކަން ހާމަކޮށްފައިވެއެވެ.
މިހާދިސާއާއި ގުޅިގެން ޒަރޫރީ އިންސާނީ އެހީތެރިކަން ފޯރުކޮށްދޭން ޖެހުނު 2 އެޕާޓްމަންޓެއްގައި ދިރިއުޅެމުންދާ 2 ޢާއިލާއެއްގެ 6 ފަރާތަކަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ ޚިދުމަތްވަނީ މިއޮތޯރިޓީން ހަމަޖައްސާދީފައި.
އެންޑީއެމްއޭއިން ހާމަކޮށްފައިވެއެވެ.
މި ހާދިސާ ހިނގާފައިވާކަމަށް ބެލެވެނީ، އެ ގޭގެ އެޕާޓުމެންޓެއްގައި ހިނގި ކަރަންޓު ޝޯޓެއްގެ ސަބަބުންނެވެ. ނަމަވެސް ކަމާގުޅުންހުރި އެއްވެސް ފަރާތަކުން މި ހާދިސާ ހިނގުމަށް މެދުވެރިވީ ސަބަބު އަދި ހާމަކޮށްފައެއް ނުވެއެވެ.