ޚަބަރު
ރާއްޖޭގެ ސިއްޙީ ދާއިރާ ކުރިއެރުވުމަށް ޑަބްލިޔުއެޗްއޯއާ މަޝްވަރާކޮށްފި

ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމް ޑަބްލިޔުއެޗްއޯގެ ޑިރެކްޓަރ ޖެނެރަލް، ޑރ. ޓެޑްރޮސް އަދޮނަމް ގެބްރިޔޭސަސްއާ ބައްދަލުކުރެއްވުން، ފޮޓޯ: ސިއްޙީ ވުޒާރާ
ޒަމާނީ ޓެކްނޮލޮޖީގެ އެހީގައި ދިވެހިރާއްޖޭގައި ޓެލެމެޑިސިން ކުރިއެރުވުމަށް ކުރަމުންދާ މަސައްކަތުގައި، ވޯލްޑް ހެލްތު އޯގަނަޒިޒޭޝަން (ޑަބްލިޔުއެޗްއޯ) އާ މަޝްވަރާކޮށްފިއެވެ.
މި މަޝްވަރާކުރައްވާފައިވަނީ، ސުވިޓްޒަލޭންޑްގެ ޖެނީވާގައި މިހާރު ކުރިއަށްދާ ދުނިޔޭގެ ސިއްޙަތު ޖަމްޢިއްޔާގެ 156 ވަނަ އެގްޒެކެޓިވް ބޯޑުގެ މެންބަރުންގެ ބައްދަލުވުމުގެ ހަވާސާގެ ތެރެއިން ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމް ޑަބްލިޔުއެޗްއޯގެ ޑިރެކްޓަރ ޖެނެރަލް، ޑރ. ޓެޑްރޮސް އަދޮނަމް ގެބްރިޔޭސަސްއާއެކު ބޭއްވެވި ބައްދަލުކުރެއްވުމުގައެވެ.
މި ބައްދަލުކުރެއްވުމުގައި ސިއްޙަތާ ބެހޭ ވަޒީރު ނާޡިމް ވަނީ ރާއްޖޭގެ ޞިއްޙީ ނިޒާމު ހަރުދަނާކުރުމުގައި ސަރުކާރުން އަހަންމިއްޔަތުކަންދޭ ދާއިރާތަކުގެ މައްޗަށް އަލިއަޅުއްވާލައްވާފައެވެ. އެގޮތުން ދެ ބޭފުޅުން މަޝްވަރާކުރެއްވެވި ކަންތައްތަކުގެ ތެރޭގައި ހިމެނެނީ:
- އަތޮޅުތަކުން ފޯރުކޮށްދޭ ސިއްޙީ ޚިދުމަތް މިހާރަށް ވުރެން ފުޅާކުރުން.
- އީޖާދީ ޓެކްނޮލޮޖީގެ ބޭނުންކުރާ މިންވަރު އިތުރުކުރުމަށް ކުރާ މަސައްކަތްތައް.
- ޔުނިވަރސަލް ހެލްތު ކެއަރގެ ދާއިރާއިން ކުރެވޭ މަސައްކަތްތައް.
- މެޑިކަލް އެމަޖެންސީ ސާރވިސް އިތުރަށް ހަރުދަނާކޮށް، އެއާރ އެމްބިއުލޭންސްގެ ޚިދުމަތް ދެމެހެއްޓެނިވި ގޮތެއްގައި ފޯރުކޮށްދިނުމަށް ކުރަމުންދާ މަސައްކަތްތައް.
- ޞިއްޙީ ޚިދުމަތްދޭ ތަންތަނުން އުފެދޭ ކުނި ރައްކާތެރިގޮތުގައި ނައްތާލުމަށް ކުރެވޭ މަސައްކަތްތައް.
- ދުރާލާ ބަލިތަކުން މީހުން ރައްކާތެރިކުރުމަށްޓަކާ ޕްރައިމަރީ ހެލްތު ކެއަރގެ ނިޒާމު ރާއްޖޭގައި އިތުރަށް ވަރުގަދަކުރުމަށް ކުރަމުންދާ މަސައްކަތްތައް.
- ރާއްޖޭގެ ޤައުމީ ހެލްތު އިންޝުއަރެންސް ނިޒާމު އިތުރަށް ހަރުދަނާކުރުމަށް ކުރާ މަސައްކަތްތައް.
މި ބައްދަލުކުރެއްވުން ނިންމަވާލައްވާފައިވަނީ، ރާއްޖޭގެ ޞިއްޙީ ނިޒާމު ހަރުދަނާކުރުމުގައި ވަކިން ޚާއްސަކޮށް ޓެލެމެޑިސިންގެ ދާއިރާއިން އިންވެސްޓްމަންޓްތައް އިތުރުކުރުމަށާއި، ޑިޖިޓަލް ހެލްތުގެ ދާއިރާއާއި، އިމަޖެންސީ މެޑިކަލް ސަރވިސްގެ ކަންކަން އިތުރަށް ތަރައްޤީކުރުމުގައި ދުނިޔޭގެ ޞިއްޙަތު ޖަމްޢިއްޔާގެ އެހީތެރިކަން ރާއްޖެއަށް ލިބިގެންދާނެކަމުގެ ޔަޤީންކަން އެ ޖަމްޢިއްޔާގެ ފަރާތުން އަރުވަމުންނެވެ.