އަންހެނުން ބާރުވެރިކުރުވުމަށް އަންހެނުންގެ ޙާއްސަ ބަލިތަކަށް ދެވޭ ފަރުވާ ކުރިއަރުވަންޖެހޭ: މެޑަމް ސާޖިދާ

އަންހެނުން ބާރުވެރިކުރުވުމަށް، އަންހެނުންގެ ޙާއްސަ ބަލިތަކަށް ދެވޭ ފަރުވާ ކުރިއަރުވަންޖެހޭކަމަށް، ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ އަންހެނުންނަށް ޚާއްސަ ބަލިތަކަށް އަމާޒުކޮށްގެންކުރާ ސަރޖަރީތަކާ ގުޅޭގޮތުން ކުރިއަށްގެންދިޔަ "ހިޔަލަ ސަރޖިކަލް ވަރކްޝޮޕް 2025"ގެ ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

މެޑަމް ސާޖިދާ ވިދާޅުވީ، އަންހެނުންނަށް ދެވޭ ފަރުވާތަކުގެ ފެންވަރު ރަގަޅުކުރުމަށް ޒަމާނީ ވަސީލަތްތަކާއި އައު ޓެކްނޮލޮޖީގެ އެހީ ހޯދުން މުހިންމު ކަމަށެވެ.

މީގެ އިތުރުން، މި ވޯކްޝޯޕްގެ ސަބަބުން، އަންހެނުންގެ ބަލިތަކަށް ފަރުވާކުރުމުގައި ވީހާވެސް ވޭން ކުޑަ ގޮތަކަށް އެ ކަންކަން ކުރިޔަށް ގެންދެވޭނޭ ހުނަރާއި އުކުޅު ތަރައްޤީ ވެގެން ގޮސްފައިވާކަމަށް އުއްމީދުކުރައްވާ ކަމުގައި ވެސް މެޑަމް ސާޖިދާ ވިދާޅުވިއެވެ. 

އަންހެނުން ބާރުވެރިކުރުވުމަކީ ހަމައެކަނި އެމީހުންނަށްޖެހޭ ބަލިތަކަށް ފަރުވާކުރުމެއް ނޫން. އެކަމަކު އެމީހުންގެ އިޙުސާސްތައް ދެނަގެނެ، ދިމާވާ ދަތިތަކަށް އެމީހުންނަށް އެހީވެދޭންޖެހޭ.

ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވިއެވެ.

މި ވޯކްޝޮޕްގައި އަންހެނުންނަށް ޙާއްސަ 22 ސާރޖަރީއެއް ކޮށްފައިވެއެވެ. އަދި މާލެ ސިޓީ ގުރޫޕް އޮފް ހޮސްޕިޓަލްސްގެ ޗީފް އެގްޒެކެޓިވް އޮފިސަރ ޢަބްދުއްރައްޒާޤު ޙަލީމް ވިދާޅުވެފައިވަނީ، މި ސަރޖަރީތައް ވަރަށް އަވަހަށް ފެށުމަށް މަސައްކަތް ކުރަމުން އަންނަ ކަމަށެވެ.

ޖެނުއަރީ 26 އިން މި މަހުގެ 5 އަށް ކުރިޔަށް ގެންދިޔަ މި ވޯކްޝޮޕްގައި އައިޖީއެމްއެޗްގެ ޑޮކްޓަރުންގެ އިތުރުން، ހުޅުމާލެ ހޮސްޕިޓަލާއި އޭޑީކޭ ހޮސްޕިޓަލުގެ ޑޮކްޓަރުންވެސް ވަނީ ބައިވެރިވެފައިވެފައެވެ.