ޚަބަރު
ރާއްޖޭގައި މުޅިން އަލަށް އަންހެނުންނަށް ޙާއްސަ 22 ސާރޖަރީއެއް ފަށަނީ

"ހިޔަލަ ސަރޖިކަލް ވަރކްޝޮޕް 2025"ގެ ނިންމުމުގެ ރަސްމިއްޔާތު، ފޮޓޯ: ޕީއެސްއެމް
ރާއްޖޭގައި މުޅިން އަލަށް އަންހެނުންނަށް ޙާއްސަ 22 ސާރޖަރީއެއް ފެށުމަށް ތައްޔާރުވަމުން އަންނަކަމަށް މާލެ ސިޓީ ގުރޫޕް އޮފް ހޮސްޕިޓަލްސްގެ ޗީފް އެގްޒެކެޓިވް އޮފިސަރ ޢަބްދުއްރައްޒާޤު ޙަލީމް ވިދާޅުވެއްޖެއެވެ.
ޙަލީމް މިހެން ވިދާޅުވީ، އަންހެނުންނަށް ޚާއްސަ ބަލިތަކަށް އަމާޒުކޮށްގެންކުރާ ސަރޖަރީތަކާ ގުޅޭގޮތުން ކުރިއަށްގެންދިޔަ "ހިޔަލަ ސަރޖިކަލް ވަރކްޝޮޕް 2025"ގެ ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
އައު ސާރޖަރީތައް ފެށުމުގެ ގޮތުން، މިހާރު ކުރިޔަށްދަނީ މި ސާރޖަރީތަކަށް ބޭނުންވާ ބައެއް ސާމާނު ހޯދުމާއި، އިންސާނީ ވަސީލަތް ތަރައްޤީ ކުރުމުގެ މަސައްކަތްކަމަށް ވެސް ޙަލީމް ވިދާޅުވިއެވެ.
ރާއްޖޭގައި މުޅިން އަލަށް 22 ސަރޖަރީއެއް ވަރކްޝޮޕްގައި މި ކުރެވުނީ. ވަރަށް އަވަހަށް ހޮސްޕިޓަލުތަކުގައި މި ސަރޖަރީތައް ކުރެވެން ފެށޭނެ. ބައެއް ވަޞީލަތްތައް ހޯދައި، މީހުން ތަމްރީންކުރަންޖެހޭ. އަޅުގަނޑުމެންގެ އަމާޒަކީ މިކަން ވަރަށް އަވަހަށް ފެށުން.
ޢަބްދުއްރައްޒާޤު ޙަލީމް ވިދާޅުވިއެވެ.
މީގެ އިތުރުން ޙަލީމް ވިދާޅުވީ، އަންހެނުންގެ ޙާއްސަ ބަލިތަކަށް ރަގަޅު ފަރުވާއެއް ފޯރުކޮށްނުދެވޭތީ، އެކަމުން އަންހެނުން ކުރަންޖެހޭ ތަޙައްމަލު ބޮޑުކަމާއި، ނަމަވެސް މި ވޯކްޝޮޕަށްފަހު އަލަށް ފަށާ ސާރޖަރީތަކާއެކު އަންހެނުންގެ ބަލިތަކުގައި އެމީހުން އިހުސާސްކުރަންޖެހޭ ތަދުތަކަށް ލުޔެއް ލިބޭނެކަމަށެވެ.
ޖެނުއަރީ 26 އިން މި މަހުގެ 5 އަށް ކުރިޔަށް ގެންދިޔަ މި ވޯކްޝޮޕްގައި އައިޖީއެމްއެޗްގެ ޑޮކްޓަރުންގެ އިތުރުން، ހުޅުމާލެ ހޮސްޕިޓަލާއި އޭޑީކޭ ހޮސްޕިޓަލުގެ ޑޮކްޓަރުންވެސް ވަނީ ބައިވެރިވެފައިވެފައެވެ.
މި ވޯކްޝޮޕް ކުރިއަށް ގެންދިއުމަށް ޗައިނާގެ ބެއިޖިންގައި މަސައްކަތްކުރާ ތަޖުރިބާކާރު ޕްރޮފެސަރެއްކަމަށްވާ ޑރ. ޝިއައުމިންގް ގޮންގް ވަނީ ރާއްޖެ ވަޑައިގެންފައެވެ. ޕްރޮފެސަރ ޑރ. ޝިއައުމިން ގޮންގްއަކީ މިނިމަލް އިންވޭސިވް ގައިނަކޮލޮޖިކް ސަރޖަރީ (އެމް.އައި.ޖީ.އެސް) ގެ ރޮނގުގައި ފާހަގަކޮށްލެވޭ ދުނިޔޭގެ ފެންވަރުގެ މާހިރެކެވެ.