Ads by Exprox

ޚަބަރު

ދިވެހިންގެ ހިތްތަކުގައި އިސްލާމްދީނަށް ލޯބި ޖެއްސެވުމަށް ގިނަ މަސައްކަތްތަކެއް ފާއިތުވި އަހަރު ކުރެވުނު: ރައީސް

ދިވެހިންގެ ހިތްތަކުގައި އިސްލާމްދީނަށް ލޯބި ޖެއްސެވުމަށް ގިނަ މަސައްކަތްތަކެއް ފާއިތުވި އަހަރު ކުރެވުނު: ރައީސް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔާން އިއްވެވުން/ފޮޓޯ: ރައްޔިތުންގެ މަޖިލިސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

06 ފެބްރުއަރީ 2025، 11:05

06 ފެބްރުއަރީ 2025، 11:05

ހުލާސާ

އިސްލާމްދިނާއި ގުޅުންހުރި މުހިންމު ޕްރޮގްރަމްތަކެއް މިއަހަރު ވެސް ކުރިއަށް ދާނެ

ދިވެހިންގެ ހިތްތަކުގައި އިސްލާމްދީނަށް ލޯބި ޖެއްސެވުމަށް ފާއިތުވި 2024 ވަނަ އަހަރު ގިނަ މަސައްކަތްތަކެއް ކުރެވުނު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. ރައީސް މިފަދައިން ވިދާޅުވީ، މިއަހަރުގެ ރައްޔިތުންގެ މަޖިލިސް ހުޅުވުމަށް ބޭއްވި ފުރަތަމަ ޖަލްސާގައި އެމަނިކުފާނުގެ 2 ވަނަ ރިޔާސީ ބަޔާން އިއްވަމުންނެވެ.

ރައީސް ވިދާޅުވީ، އިސްލާމްދީނާއި އިސްލާމީ އަޚުވަންތަކަމުގެ މަތީގައި ސާބިތުވެތިއްބެވުމަކީ ކޮންމެ މުސްލިމެއްގެ މައްޗަށް ވާޖިބުކުރައްވާފައި ވާ ކަމެއް ކަމަށެވެ. ހަމަ އެހެންމެ، އިސްލާމީ ޝަރީޢަތުގެ މަތީގައި ފައިތިލަ ސާބިތުކޮށް، އިސްލާމްދީނަށް ދިވެހިންގެ ހިތްތަކުގައި ލޯބި ޖެއްސެވުމަށް ގިނަ މަސައްކަތްތަކެއް ކުރެވިފައި ވާކަން އެމަނިކުފާނު ވަނީ ފާހަގަކުރައްވާފައެވެ. އެގޮތުން، ރާއްޖޭގެ އެކި ކަންކޮޅުތަކަށް ހުޅުވާލައިގެން "ރިސާލަތު ޕްރޮގްރާމް" ގެ ނަމުގައި ފެށި ޚާއްޞަ ޕްރޮގްރާމަކީ ރައްޔިތުންނަށް  ހެޔޮ ބަދަލުތަކެއް ގެނުވައިދިން ޕްރޮގްރާމެއް ކަން އެމަނިކުފާނު ވަނީ ފާހަގަކުރައްވާފައެވެ. އަދި، މި ޕްރޮގްރާމް މިއަހަރު ވެސް ކުރިއަށްދާނެ ކަމުގެ އުފާވެރި ޚަބަރު ރައީސް ވަނީ ރައްޔިތުންނަށް ދެއްވާފައެވެ.

ރައީސްގެ ރިޔާސީ ބަޔާނުގައި ވަނީ، އިސްލާމްދީނުގެ އެންމެ މުހިންމު އެއް އަސާސްކަމުގައި ވާ "ނަމާދު" ގެ މުހިންމުކަމަށް އަލިއަޅުވާލައްވާފަ އެވެ. އެގޮތުން، ނަމާދަކީ ހުރިހާ މުންކަރާތްތަކުން މީހާ ސަލާމަތްކޮށްދެއްވާނެ މާތް މަތިވެރި އަޅުކަމެއް ކަން އެމަނިކުފާނު ވަނީ ފާހަގަކުރައްވާފައެވެ. ހަމަ އެހެންމެ، މި މާތް އިސްލާމީ ތަބުގެ މަތީގައި ދިވެހިންގެ ފައިތިލަ ސާބިތުކުރެއްވުމަށް ގިނަގުނަ މަސައްކަތްތަކެއް ޢަމަލީ ގޮތުން ކުރައްވާނެކަމަށް ރައީސް ވިދާޅުވިއެވެ. އެގޮތުން، "ނަމާދު މަތިވެރިކުރުން" މި ނަމުގައި ޚާއްޞަ މަޝްރޫޢެއް ފައްޓަވާފައިވާ ކަމަށް ރައީސް ވިދާޅުވިއެވެ. 

މީގެ އިތުރުން ރައީސުލްޖުމްހޫރިއްޔާ ވިދާޅުވީ، މުސްލިމުންގެ ކިބައިގައި އިސްލާމީ ލީޑަރޝިޕް ހުރުމަކީ މުހިންމު ކަމެއް ކަމަށެވެ. އެހެންކަމުން، ރާއްޖޭގައި ކޮންމެ މަސައްކަތެއްގައި ވެސް ލީޑަރެއްގެ ގޮތުގައި ހުންނަ ފަރާތަކީ އިސްލާމީ ރިވެތި އުޞޫލުތަކުގެ މައްޗަށް ބޯލަނބައި، ކަންކަމުގައި ގޮތް ނިންމާ ފަރާތްތަކަކަށް ވުމަށް ރައީސް ވަނީ އެދިވަޑައިގެންފައެވެ. އެގޮތުން، ސަރުކާރުން މިކަމަށް ބާރު އަޅުއްވާ އެހީތެރިކަން ފޯރުކޮށްދެއްވުމުގެ ގޮތުން، "އިސްލާމީ ލީޑަރޝިޕް މެނޭޖްމެންޓް" ގެ ނަމުގައި ޕްރްގްރާމެއް މިއަހަރު ކުރިއަށް ގެންދަވާނެކަން ރައީސް ވަނީ ފާހަގަކުރައްވާފަ އެވެ.

ރައީސްގެ ރިޔާސީ ބަޔާނުގައި ވަނީ، ރާއްޖޭގެ މިސްކިތްތަކުގެ ޙާލަތާއި ބެހޭގޮތުން މުހިންމު ވާހަކަތަކެއް ހިއްސާކުރައްވާފަ އެވެ. އެގޮތުން، ފާއިތުވި 2024 ވަނަ އަހަރުގައި މިސްކިތްތައް މަރާމާތުކޮށް، މިސްކިތްތަކަށް ބޭނުންވާ ވަޞީލަތްތައް ހޯއްދެވުމަށް ދައުލަތުގެ ބަޖެޓުން ޖުމްލަ 7.8 މިލިއަން ރުފިޔާ ޚަރަދުކޮށްފައިވާ ކަމަށް ރައީސް ވަނި ވިދާޅުވެފަ އެވެ. މީގެ އިތުރުން، މިސްކިތްތަކުގެ ހާލަތު ގާތުން ބެއްލެވުމަށް މިސްކިތްތަކާއި ބެހޭ ޤައުމީ މަޖިލިސް އަލުން އުފައްދަވާފައިވާ ކަމަށް ރައީސް ވިދާޅުވިއެވެ. އަދި، ރާއްޖޭގެ އެކި ކަންކޮޅުތަކުގައި ޖުމްލަ 35 މިސްކިތް މަރާމާތުކުރުމުގެ މަޝްރޫޢު މިއަހަރުގެ ތެރޭގައި ފެށިގެންދާނެކަމުގެ އުފާވެރި ޚަބަރު ރައީސް ވަނީ ދެއްވަވާފައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގައި ޒަކާތު ހައުސް އެއް އުފެއްދުމަކީ އެމަނިކުފާނަށް ކުރެވުނު އެންމެ މުހިންމު އަދި ފައިދާ ހުރި އެއް މަސައްކަތް ކަމަށެވެ. އެގޮތުން، ޒަކާތު ހައުސްގެ ސަބަބުން ފަޤީރުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ޢާމްދަނީ ހޯދޭނޭ ވަޞީލަތްތައް ފެންނަމުންދާކަން ރައީސް ވަނީ ފާހަގަކުރައްވާފައެވެ. މިކަމުގެ ސަބަބުން، ދިވެހިރާއްޖޭގައި ދިރިއުޅެމުންދާ ރައްޔިތުންގެ މާލި ފުދުންތެރިކަން އުފެދި، ކޮންމެ ފަރުދަކީ ވެސް އަމިއްލަ ފައިމައްޗަށް ތެދުވެ އުޅެވޭނެ ވަރުގެ ބަޔަކަށް ވާނެކަމަށް ރައީސް ވިދާޅުވިއެވެ. ރައީސް ވަނީ، ޒަމާނީ ޓެކޮންލޮޖީ އާއި އެކުގެ ޒަކާތު ހައުސް ގެ މަސައްކަތްތައް ކުރިއަށް ގެންދެވުމަށް މަސައްކަތްކުރައްވާކަން ފާހަގަކުރައްވާފަ އެވެ. އަދި، މިކަމުގެ ސަބަބުން މުޖްތަމަޢުގައި އާންމު ފޯރުންތެރިކަން އިތުރުވެގެންދާނެކަމަށް އެމަނިކުފާނު ވަނީ ވިދާޅުވެފައެވެ.

ރައީސްގެ ރިޔާސީ ބަޔާނުގައި ވަނީ، ރާއްޖެއަށް މުހިންމު ހުރިހާ ދާއިރައަކުން ވެސް ކުރައްވާފައިވާ މަސައްކަތްތަކާއި، ކުރިއަށް ކުރެއްވުމަށް ނިންމަވާފައިވާ މަސައްކަތްތައް ވިދާޅުވެފައެވެ. މިއަހަރުގެ ރައްޔިތުންގެ މަޖިލިސްގެ ފުރަތަމަ ޖަލްސާގައި ޖުމްލަ 88 މެންބަރުން ވަނީ ބައިވެރިވެވަޑައިގެންފައެވެ. ނަމަވެސް، މީގެ ތެރެއިން 9 މެންބަރުން ވަނީ މަޖިލީހުގެ ޤަވާއިދާއި ޚިލާފުވުމުގެ ސަބަބުން މަޖިލީހުން ނިކުތުމަށް އަމުރުކުރައްވާފަ އެވެ. 

މި ލިޔުން ކިޔާލުމުން

Ads by MSS