މި ޤައުމާއި ދިވެހި ރައްޔިތުންގެ މިނިވަންކަން ހިމާޔަތްކުރުމަކީ އެންމެ ބޮޑު ޢަޒުމް: ރައީސުލްޖުމްހޫރިއްޔާ

ދިވެހިރާއްޖެއާއި މި ޤައުމުގައި ދިރިއުޅޭ އެންމެހާ ރައްޔިތުންގެ މިނިވަން ހިމާޔަތްކޮށްދެއްވުމަކީ އެމަނިކުފާނުގެ އެންމެ ބޮޑު އެއް ޢަޒުމް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. ރައީސް މިފަދައިން ވިދާޅުވީ، މިއަހަރުގެ ރައްޔިތުންގެ މަޖިލިސް ހުޅުވުމަށް ބޭއްވެވި ފުރަތަމަ ޖަލްސާގައި އެމަނިކުފާނުގެ ރިޔާސީ ބަޔާން އިއްވަވަމުންނެވެ. 

ރައިސުލްޖުމްހޫރިއްޔާ ވިދާޅުވީ، އެމަނިކުފާނު ރާއްޖޭގެ ރައީސްކަމަށް އިންތިޚާބުވެ ރައްޔިތުންނާއި މުޚާތަބުކުރައްވާ ދެއްކެވި ވާހަކަފުޅުގައި، އެމަނިކުފާނަށް މި ލޮބުވެތި ޤައުމުގެ މިނިވަންކަމާއި އިސްތިޤްލާލު މުހިންމުވާ މިންވަރު ހާމަކުރައްވާފައިވާ ކަމަށެވެ. އެހެންކަމުން، މިއަދުވެސް، އަދި ކުރިއަށް އޮތް ދުވަސްތަކުގައި ވެސް އެމަނިކުފާނަށް އެންމެ މުހިންމު މަސައްކަތަކީ މި ޤައުމުގެ މިނިވަންކަމާއި އަމިއްލަވަންތަކަން ހިމާޔަތްކޮށްދެވުންކަން ރައީސް ވަނި ފާހަގަކުރައްވާފަ އެވެ. ރައީސް ވިދާޅުވީ، ރާއްޖޭގެ މިނިވަންކަމަށް ކުޑަ ވެސް ލޮޅުމެއް އަރައިފާނެ ކަމަކަށް ދޫނުދިނުމަކީ އެމަނިކުފާނުގެ ވަރުގަދަ ޢަޒުމެއް ކަމަށެވެ.

ރައީސް ވިދާޅުވީ، ކަނޑާއި އެއްގަމާއި ވައިގެ މަގުން އަމިއްލަ ޤައުމު އަމިއްލައަށް ދިފާޢުކުރެވޭނެވަރުގެ ޤާބިލުކަން އުފެއްދެވުމަށް މި ސަރުކާރުން މަސައްކަތްކުރައްވާ ކަމަށެވެ. އެގޮތުން، ރާއްޖޭގެ ކޯސްޓްގާޑުގެ ޚިދުމަތް ފުޅާ ކުރެއްވުމުގެ މަސައްކަތް މިހާރު ފަށާފައިވާ ކަމަށް ރައީސް ވިދާޅުވިއެވެ. ހަމަ އެހެންމެ، ރާއްޖޭގެ ކޮސްޓްގާޑުގެ ޙާއްޞަ އޮޕަރޭޝަންތަކުގައި ބޭނުންކުރެއްވުމަށް، "ސްޕެޝަލް ބޯޓް ސޮކޮޑްރަން" 03 ނޮވެމްބަރު 2024 ގައި އުފައްދައި، ޚިދުމަތަށް ނެރުއްވާފައިވާ ކަމަށް ރައީސް ވިދާޅުވިއެވެ. 

ރައިސުލްޖުމްހޫރިއްޔާ ވިދާޅުވީ، ވައިގެ މަގުން އަސްކަރީ ޤާބިލުކަން އިތުރުކުރެއްވުމަށް މުހިންމު މަސައްކަތްތަކެއް ކުރައްވާފައިވާ ކަމަށެވެ. އެގޮތުން، އެމް.އެން.ޑީ.އެފް ގެ އެއަރ ކޯރ ވަނީ 15 މާރިޗު 2024 ގައި އުފައްދަވާފައެވެ. އެއާއިއެކު، އަންމޭންޑް އޭރިއަލް ވެހިކަލްތަކުގެ ޚިދުމަތް ފަށްޓަވާފައިވާކަން ރައީސް ވަނީ ފާހަގަކުރައްވާފަ އެވެ. އަދި، މިކަމުގެ ސަބަބުން ރާއްޖޭގެ ކަނޑުގެ ސަރަޙައްދުގައި ޤަވާއިދާއި ޚިލާފަށް ހަރަކާތްތެރިވަމުން ދިޔަ ގިނަ އުޅަނދުތަކެއް ހޯދިފައިވާކަން އެމަނިކުފާނު ވަނީ ފާހަގަކުރައްވާފަ އެވެ. މީގެ އިތުރުން، ދިވެހިރާއްޖޭގެ ހުރިހާ ސަރަޙައްދެއް ބެލެހެއްޓުމަށްޓަކައި، ރާއްޖޭގެ އުތުރާއި ދެކުނުގައި އެއަރ ސްޓޭޝަން ޤާއިމްކުރުމުގެ ޢަމަލީ މަސައްކަތް ފައްޓަވާފައިވާކަމަށް އެމަނިކުފާނު ވަނީ ވިދާޅުވެފަ އެވެ. 

ރައީސް ވިދާޅުވީ، މިއަހަރުގެ ތެރޭގައި ގިރިފުށީ ޓްރެއިނިންގ ސެންޓަރުގެ ޖާގައާއި ވަސީލަތްތައް އިތުރުކުރެވިގެންދާނެ ކަމަށެވެ. ހަމަ އެހެންމެ، އެމް.އެން.ޑީ.އެފް ގެ ފަޔަރ އެންޑް ރެސްކިއުއަށް ބޭނުންވާ ގިނަ ވަޞީލަތްތަކެއް މިއަހަރުގެ ތެރޭގައި ފޯރުކޮށްދެއްވާނެ ކަމުގެ ޔަޤީންކަން ރައީސް ވަނީ ދެއްވާފައެވެ. މީގެ އިތުރުން ރައީސް ވިދާޅުވީ، ޤައުމުގެ އަމަން އަމާންކަމާއި، ލޯ އެންޑް އޯޑަރ ބެލެހެއްޓުމުގައި ފުލުހުންގެ ޚިދުމަތަށް ކުރިއެރުން ގެނެސްދެއްވުމަށް ގިނަގުނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އެގޮތުން، 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން މިއަދާއި ހަމައަށް ޖުމްލަ 27 ރަށެއްގައި ޕޮލިސް ސްޓޭޝަން ހުޅުވާފައިވާކަން ރައީސް ވަނީ ފާހަގަކުރައްވާފަ އެވެ. ހަމަ އެހެންމެ، މިއަހަރުގެ ތެރޭގައި އިތުރު 39 ރަށަކަށް މި ޚިދުމަތް ފުޅާކޮށް، މިއަހަރު ނިމޭ އިރު ފުލުހުންގެ ޚިދުމަތް ޤާއިމްކުރެވިފައި ނުވާ އެއްވެސް ރަށެއް ނުހުންނާނެކަމަށް ރައީސް ވިދާޅުވިއެވެ. 

ރައީސް ގެ ރިޔާސީ ބަޔާނުގައި ވަނީ، ރާއްޖޭގެ ކޮންމެ ދާއިރާއަކުން ވެސް އަމިއްލަވަންތަކަން ފެންނާނެ ފަދަ ގޮތަކަށް ކަންކަން ބައްޓަންކުރެއްވުމަށް މަސައްކަތް ކުރައްވާކަން ފާހަގަކުރައްވާފަ އެވެ.