Ads by Exprox

ޚަބަރު

ފެބުރުވަރީ މަސް ނިމުމުގެ ކުރިން ފްލެޓު ލިސްޓު އާންމުކުރައްވާނެކަމަށް ރައީސުލްޖުމްހުރިއްޔާ ވިދާޅުވެއްޖެ

ފެބުރުވަރީ މަސް ނިމުމުގެ ކުރިން ފްލެޓު ލިސްޓު އާންމުކުރައްވާނެކަމަށް ރައީސުލްޖުމްހުރިއްޔާ ވިދާޅުވެއްޖެ

ހުޅުމާލެ---

މިފްތާޙް މުޙައްމަދު

މިފްތާޙް މުޙައްމަދު

06 ފެބްރުއަރީ 2025، 12:29

06 ފެބްރުއަރީ 2025، 12:29

ކުރީ ސަރުކާރުން މާލޭ ސަރަޙައްދުގައި އިމާރާތްކުރަން ފަށާފައިވާ 4،000 ފްލެޓު ލިބޭ މީހުންގެ ލިސްޓުގެ ސައްޙަކަން ކަށަވަރުކުރުމަށްފަހު، މި ހިނގާ ފެބުރުވަރީ މަސް ނިމުމުގެ ކުރިން އެ ލިސްޓު އިޢުލާން ކުރައްވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

އެ މަނިކުފާނު މިހެން ވިދާޅުވީ، މި އަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ކުރިން ނެރުނު ފްލެޓު ލިސްޓާ ގުޅިގެން އެންޓި ކޮރަޕްޝަން ކޮމިޝަނުން ފާހަގަކޮށްފައިވާ ނުކުތާތަކާ ގުޅިގެން، އެ ލިސްޓުގެ ޞައްޙަކަން ބެލުން އޮތީ މި ސަރުކާރުން ހައްލުކުރަން ޖެހިފައި އޮތް ވަރަށް ހައްސާސީ މައްސަލައެއްގެ ގޮތުގައި ކަމަށެވެ.

އެގޮތުން ލިސްޓުގެ ސައްޙަކަން ބެލުމަށްފަހު ފެބުރުވަރީ މަސް ނިމުމުގެ ކުރިން ފްލެޓް ލިސްޓު އާންމުކުރުމަށް ނިންމާފައިވާއިރު، ސެޕްޓެންބަރު މަހުގެ ނިޔަލަށް ފްލެޓުގެ ޙައްގުވެރިންނަށް ފްލެޓުތައް ހަވާލުކޮށް ނިންމޭނެކަމަށް ވެސް ވިދާޅުވިއެވެ. 

މާތްالله ގެ އިރާދަފުޅާއެކު ލިސްޓުގެ ޞައްޙަކަން ބެލުމަށް ކުރެވެމުންދާ މަސައްކަތް ނިމި މި ފެބްރުއަރީ މަސް ނިމުމުގެ ކުރިން ލިސްޓު އިޢުލާނު ކުރެވޭނެ. އަދި ފްލެޓްތައް ނިމެމުންދާ ނިސްބަތުން ފްލެޓް ލިބޭ ފަރާތްތަކާ ފްލެޓް ޙަވާލު ކުރަމުން ގޮސް މި އަހަރުގެ ސެޕްޓެންބަރު މަސް ނިމުމުގެ ކުރިން ހުރިހާ ފްލެޓެއް އޭގެ ޙައްޤުވެރި ފަރާތްތަކާ ޙަވާލުކޮށް ނިންމާލެވޭނެ.

ރައީސުލްޖުމްހޫރިއްޔާ ވިދާޅުވިއެވެ.

ކުރީގެ ލިސްޓުގެ ސައްޙަކަމާމެދު އެންމެ ބޮޑަށް ޝައްކުކުރެވުނީ، މާލޭގައި އުޅޭތާ 15 އަހަރުވިކަމަށް ދެއްކުމަށް ދޮގު ލިޔެކިއުންތަކެއް ކައުންސިލްތައް މެދުވެރިކޮށް އުފެއްދިކަމުގެ ވާހަކަތަކާ ގުޅިގެންނެވެ.

މި މައްސަލަ އެންޓި ކޮރަޕްޝަން ކޮމިޝަން (އޭސީސީ) ތަހުޤީޤު ކުރަމުންދާއިރު، މައްސަލައިގައި ހިމެނޭ ފަރާތްތަކުގެ މައްޗަށް ދައުވާކޮށްދިނުމާއި މެދު ގޮތެއް ނިންމުމަށް ޕްރޮސެކިއުޓަރ ޖެނެރަލްގެ އޮފީހާއިއެކު ރަސްމީކޮށް އޭސީސީން ވަނީ ޑިއުޓީ ޕްރޮސެކިއުޝަން ފަށާފައެވެ. 

މީގެ އިތުރުން، ކުރީގެ ސަރުކާރުން ފުލެޓު ދޭން ނިންމާފައިވާ މީހުންގެ ތެރެއިން 60 އިންސައްތަ މީހުންގެ ޝަރުތު ހަމަނުވާކަމަށް އޭސީސީން ހާމަކޮށްފައިވެއެވެ.

މި ލިޔުން ކިޔާލުމުން

Ads by MSS