ގަވާއިދާ ޚިލާފު ބިދޭސީންގެ މައްސަލަ ހައްލުކުރުމުގައި މިސަރުކާރު އެތައް ގުނައެއް ކުރީގައި

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މި ސަރުކާރުން އަޅަމުންދާ ފިޔަވަޅުތަކުގެ ސަބަބުން ވޭތުވެދިޔަ އަހަރެއްހާ ދުވަހުގެ ތެރޭގައި 6000 އަށްވުރެ ގިނަ ބިދޭސީން އަނބުރާ އެމީހުންގެ ގައުމަށް ފޮނުވާލެވިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ފެށުމަށް ބޭއްވި ޖަލްސާގައި ރައީސުލްޖުމްހޫރިއްޔާ  އިއްވެވި ރިޔާސީ ބަޔާނުގައި މި މަޢުލޫމާތު ހާމަކުރެއްވިއެވެ. ރައީސް މުޢިއްޒު ވިދާޅުވީ 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން މިއަދާ ހަމައަށް ގަވާއިދާ ޚިލާފަށް ރާއްޖޭގައި އުޅުނު 6076 ބިދޭސީއަކު އަނބުރާ އެމީހުންގެ ޤައުމަށް ފޮނުވާލާފައިވާ ކަމަށެވެ.

ރައީސް މުޢިއްޒު އިތުރަށް ވިދާޅުވީ ނިމިދިޔަ ސަރުކާރުގެ 5 އަހަރުގެ ދައުރުގެ ތެރޭގައި ގަވާއިދާ ޚިލާފުވެގެން އަނބުރާ ގައުމަށް ފޮނުވާލެވިފައިވަނީ 2649 ބިދޭސީން ކަމަށެވެ. މީގެ އިތުރުން، މި ސަރުކާރުން ވޭތުވެދިޔަ އަހަރެއްހާ ދުވަހުގެ ތެރޭގައި 24540 ބިދޭސީން ރެގިއުލަރައިޒްކުރެވިފައިވާ ކަމަށްވެސް ރައީސް ފާހަގަކުރެއްވިއެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި "އޮޕަރޭޝަން ކުރަނގީގެ" ނަމުގައި ޚާއްޞަ އޮޕަރޭޝަނެއް 2024 ވަނަ އަހަރު ފަށާފައިވާ ކަމަށް ރައީސް ވިދާޅުވިއެވެ. މި އޮޕަރޭޝަންގެ ދަށުން މިހާތަނަށް 59 ރަށެއްގައި ދިރިއުޅޭ ހުރިހާ ބިދޭސީ މަސައްކަތްތެރިންގެ މަޢުލޫމާތު އެއްކުރެވި، ޖުމްލަ 43،294 ބިދޭސީންގެ މަޢުލޫމާތު ރެކޯޑުކުރެވިފައިވާ ކަމަށް ރައީސް ހާމަކުރެއްވިއެވެ.

މީގެ އިތުރުން، ގަވާއިދާ ޚިލާފަށް އުޅޭ ބިދޭސީންނާއި އިމިގްރޭޝަނާ ގުޅޭ މައްސަލަތައް ރިޕޯޓު ކުރުމަށް ތަޢާރަފުކުރެވިފައިވާ "އިމިގްރޭޝަން ވޮޗް" އަށް 1297 މައްސަލަ ހުށަހެޅިފައިވާ ކަމަށާއި، މީގެ ތެރެއިން ނުނިމި އޮތީ އެންމެ 11 މައްސަލަ ކަމަށްވެސް ރައީސް ފާހަގަކުރެއްވިއެވެ.

ރައީސް މުޢިއްޒު ވިދާޅުވީ ޤައުމުގެ އިޤްތިޞާދު އެދެވޭ އެންމެ ހަލުވިމިނުގައި ކުރިއެރުވުމަށާއި ބޭރު ފައިސާގެ މައްސަލަ ޙައްލުކުރުމަށް އޮތް އެންމެ ބޮޑު އެއް ހުރަހަކީ ރާއްޖޭގައި ޒަމާނުއްސުރެ ހައްލު ނުވެ އޮތް ޤަވާއިދާ ޚިލާފަށް އުޅޭ ބިދޭސީންގެ މައްސަލަ ކަމަށެވެ. އެހެންކަމުން، މި މައްސަލަ ހައްލުކުރުމަށް ސަރުކާރުން އަޅަމުންދާ ފިޔަވަޅުތަކަކީ ޤައުމުގެ އިޤްތިޞާދީ ކުރިއެރުމަށް ވަރަށް މުހިންމު ފިޔަވަޅުތަކެއް ކަމަށް ރައީސް ފާހަގަކުރެއްވިއެވެ.

މޯލްޑިވްސް އިމިގްރޭޝަނާއި ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން މި މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ. އެގޮތުން، ގަވާއިދާ ޚިލާފަށް އުޅޭ ބިދޭސީން ދެނެގަތުމަށް އިމިގްރޭޝަނުން މާލެ ސަރަހައްދުގެ އިތުރުން އަތޮޅުތެރޭގައިވެސް ޚާއްޞަ އޮޕަރޭޝަންތަކެއް ހިންގަމުންދާ ކަމަށް ރައީސް ވިދާޅުވިއެވެ.