Ads by Exprox

ޚަބަރު

ޣާޒާ އިން ފަލަސްޠީނުގެ ރައްޔިތުން ބޭލުމަށް އެއްވެސް ފަރާތަކުން ކުރާ އެއްވެސް ކަމަކަށް ރާއްޖެއިން ދުވަހަކުވެސް ތާޢީދެއް ނުކުރާނަން: ރައީސް މުޢިއްޒު

ޣާޒާ އިން ފަލަސްޠީނުގެ ރައްޔިތުން ބޭލުމަށް އެއްވެސް ފަރާތަކުން ކުރާ އެއްވެސް ކަމަކަށް ރާއްޖެއިން ދުވަހަކުވެސް ތާޢީދެއް ނުކުރާނަން: ރައީސް މުޢިއްޒު

ރައީސުލްޖުމްހޫރިއްޔާ ފަލަސްޠީނުގެ ރައިސްއާއި ބައްދަލުކުރެއްވުން/ފޮޓޯ: ރައީސް އޮފީސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

06 ފެބްރުއަރީ 2025، 03:10

06 ފެބްރުއަރީ 2025، 03:10

ހުލާސާ

އިސްރާއިލުން ފަލަސްޠީނުގެ ރައްޔިތުންނާއި މެދު ހިންގަމުން އަންނަ ޖަރީމާތައް ރައީސް ވަނީ ކުށްވެރިކޮށްފަ

ފަލަސްޠީނުގެ ޣާޒާގެ ރައްޔިތުން މިހާރު ދިރިއުޅެމުންދާ ފަސްގަނޑުން ބޭލުމަށް އެއްވެސް ފަރާތަކުން ކުރާ އެއްވެސް ކަމަކަށް ރާއްޖެއިން ދުވަހަކުވެސް ތާޢީދެއް ނުކުރައްވާނެ ކަމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. ރައީސް މިފަދައިން ވިދާޅުވީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާގައި އެމަނިކުފާނު އިއްވެވި ރިޔާސީ ބަޔާނުގައެވެ.

ރައީސްގެ ރިޔާސީ ބަޔާނުގައި ވަނީ، އިސްރާއިލުން ފަލަސްޠީނުގެ ރައްޔިތުންނާއި މެދު ހިންގަމުން އަންނަ ޖަރީމާތައް ކުށްވެރިކޮށްފަ އެވެ. އެގޮތުން، އިސްރާއިލާއި ދެކޮޅަށް ދެކުނު އެފްރިކާއިން އިންޓަރނޭޝަނަލް ކޯޓް އޮފް ޖަސްޓިސް އަށް ހުށައަޅާފައިވާ އެޕްލިކޭޝަނަށް ރާއްޖެއިން ވަނީ، މިދިޔަ އަހަރު ޑެކްލަރޭޝަން އޮފް އިންޓަރވެންޝަން ހުށައަޅާފައިކަމަށް ރައީސް ވިދާޅުވިއެވެ. މީގެ އިތުރުން، އަނިޔާ ލިބެމުންދާ ފަލަސްޠީނުގެ ރައްޔިތުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށް އދ. އާއި، ބައިނަލްއަޤްވާމީ ޖަމިއްޔާތަކާއި، ދުނިޔޭގެ އެކި ޤައުމުތަކުން ކުރިއަށްގެންދަވާ ޙަރަކާތްތަކާއި ގުޅިގެން، އިސްރާއިލުން އުފުލަންޖެހޭ ޒިންމާތަކާއި ބެހޭގޮތުން އިންޓަރނޭޝަނަލް ކޯޓް އޮފް ޖަސްޓިސް ގެ ލަފައަށް އެދި 19 ޑިސެންބަރު 2024 ގައި އދ. ގެ އާންމު މަޖިލީހުން ފާސްކުރި ޤަރާރު ދިވެހިރާއްޖެއިން ކޯސްޕޮންސަރ ކޮށްފައި ވާ ކަމަށް ރައީސް ވިދާޅުވިއެވެ. 

ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ޣާޒާ ގެ ބިމަކީ ފަލަސްޠީނުގެ ރައްޔިތުންގެ މިލްކެއް ކަމަށެވެ. އަދި، ދިވެހިރާއްޖެއިން އަބަދުވެސް ވަކާލާތުކުރާނީ 1967 ގެ ކުރީގެ ބޯޑަރުތަކަށް ތަބާވެ، ޖެރުސަލަމްއަކީ ފަލަސްޠީނުގެ ވެރި ރަށް ކަމަށް ޤަބޫލުކުރައްވާ، ފަލަސްޠީނުގައި ވަކި ދައުލަތެއް އުފައްދަވަން ކަމަށް ރައީސް ވަނި ފާހަގަކުރައްވާފަ އެވެ. ހަމަ އެހެންމެ، ފަލަސްޠީނުގެ ރައްޔިތުން ވަކި ދައުލަތެއް ޤާއިމުކުރުމަށްޓަކައި ދެކިލައްވަމުން ގެންދަވާ ހުވަފެންތަކުގައި ކުލަޖެއްސެވުމަށް ދިވެހިރާއްޖެއިން އެހީތެރިކަން ފޯރުކޮށްދެއްވާނެ ކަމަށް ރައީސް ވިދާޅުވިއެވެ. މީގެ އިތުރުން ރައީސް ވިދާޅުވީ، ފަލަސްޠީނުގެ ރައްޔިތުންނަށް ދިމާވާ ކޮންމެ ކަމެއްގައި ވެސް މި ސަރުކާރުގެ ތާއީދާއި، އެހީތެރިކަމާއި، އެއްބާރުލުން އަބަދުވެސް ދެއްވާނެ ކަމަށެވެ.

ރައިސުލްޖުމްހޫރިއްޔާ މީގެ ކުރިން ވެސް ވަނީ، ފަލަސްޠީނުގެ ރައްޔިތުންގެ ޙައްޤުގައި ގިނަގުނަ މުހިންމު މަސައްކަތްތަކެއް ކުރައްވާފަ އެވެ. 

މި ލިޔުން ކިޔާލުމުން

Ads by MSS