މިއަހަރު 6 ރިސޯޓް ހުޅުވި، 1290 އެނދު އިތުރުވާނެ: މިނިސްޓަރ ޠާރިޤު

މިއަހަރު ތެރޭ 6 ރިސޯޓް ހުޅުވިގެންދާނެ ކަމަށް ލަފާކުރެވޭ ކަމުގައި ފަތުރުވެރިކަމާއި ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ރޭ ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުންނެވެ.

ދާދި ފަހުން ފަތުރުވެރިކަމުގެ ވުޒާރާ އާއި ހަވާލުވެވަޑައިގަތް ވަޒީރު ޠާރިޤު ވިދާޅުވީ މިހާރުވެސް ރާއްޖޭގައި 176 ރިސޯޓްގެ އޮޕަރޭޝަންތައް ހިންގަމުންދާ ކަމަށެވެ. އޭގެ އިތުރުން 165 ރިސޯޓް ހެދުމުގެ މަސައްކަތް އެބަކުރިއަށްދާ ކަމަށް ވަޒީރު މައުލޫމާތު ދެއްވިއެވެ. ނަމަވެސް ބައެއް ރިޒޯޓްތަކުގެ މަސައްކަތް ހުއްޓިފައިވާކަން ވަޒީރު ހާމަކުރެއްވިއެވެ.

އަޅުގަނޑުމެން ވަރަށް ގާތުން މި ބަލަނީ  ޝެޑިއުލްތަކުންނާއި އެބޭފުޅުން ކުރައްވާ މަސައްކަތްތަކަށް. މިދެންނެވި އަހަރަށް ހުޅުވޭއިރު އިތުރު 1290 އެނދު އިތުރުވެގެންދާނެ

ވަޒީރު ޠާރިޤު އިބްރާހީމް 

ވަޒީރު ވިދާޅުވީ މި ކުރިއެރުމާއެކު ވަޒީފާގެ ފުރުސަތުތައްވެސް އިތުރުވެގެންދާނެ ކަމަށެވެ. މިހާތަނަށް ތިމާވެށީގެ ވުޒާރާ ހިންގަވަމުން ގެންދެވި ވަޒީރު ޠާރިޤު ވަނީ ތިމާވެއްޓާ ރައްޓެހި އަދި ދެމެހެއްޓެނިވި ގޮތަކަށް ފަތުރުވެރިކަން ކުރުމަށް އިސްކަން ދެއްވުން މުހިންމުކަމަށް ވިދާޅުވެފައެވެ. އަދި އެފަދަ ރިޒޯޓްތަކަށް ޒިޔާރަތްކުރުމަކީ ފަތުރުވެރިންގެ މެދުގައި މަގްބޫލު ޓްރެންޑެއްގެ ގޮތުގައި ވަޒީރު ސިފަކުރެއްވިއެވެ.

ދާދި ފަހުން ފަތުރުވެރިކަމާއި ބެހޭ ވުޒާރާ އާއި ތިމާވެއްޓާއި ބެހޭ ވުޒާރާ އެއްކުރި ވާހަކައަށްވެސް ވަޒީރު ވަނީ މި ޕްރޮގްރާމް ތެރެއިން އިޝާރާތްކުރައްވާފައެވެ. އެގޮތުން، ދެ ވުޒާރާ އެއްކޮށްލި ނަމަވެސް ފަތުރުވެރިކަމަށް ސަރުކާރުން ދޭ އަހައްމިއްޔަތުކަން ކުޑަނުވާނެ ކަމުގެ ޔަގީންކަން ވަޒީރު ދެއްވާފައި ވެއެވެ. ދެ ވުޒާރާ އެއްކޮށްލީމަ، މަސައްކަތުގެ ދާއިރާގައި އަދި ރާއްޖޭގެ ތިމާވެށީގެ ދާއިރާއަށް ލިބޭ ފައިދާ މާ ބޮޑުކަމަށް ގަބޫލުކުރައްވާ ކަމަށް ވަޒީރު ވިދާޅުވެފައި ވެއެވެ.