ޚަބަރު
ދިވެހި ޤައުމާއިމެދު ފަޚުރުވެރިވާނެ ދިވެހި ދަރީންތަކެއް އުފައްދަން އިންތިހާޔަށް ބޭނުންވޭ: ރައިސުލްޖުމްހޫރިއްޔާ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުޑަކުދިންތަކަކާއި އެކު/ފޮޓޯ: ސޯޝަލް މީޑިއާ
ހުލާސާ
ޤައުމެއް ކުރިއަރައި ދިއުމުގައި އަރަމުން އަންނަ ޖީލުގެ މުހިންމުކަން ފާހަގަކުރެއްވި
މި ލޮބުވެތި ދިވެހި ޤައުމާއި މެދު ފަޚުރުވެރިވާނެ ދިވެހި ދަރީންތަކެއް އުފައްދަން އިންތިހާޔަށް ބޭނުންފުޅުވާ ކަމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. ރައީސް މިފަދައިން ވިދާޅުވީ، މިއަހަރަށް ރައްޔިތުންގެ މަޖިލީސް ހުޅުއްވައިދެއްވުމަށް ބޭއްވެވި ޖަލްސާގައި ރިޔާސީ ބަޔާން އިއްވަވަމުންނެވެ.
ރައީސް ވިދާޅުވީ، ދިވެހީންގެ ރާއްޖެ ދިވެހިންގެ މިލްކެއްގެ ގޮތުގައި ދެމި އޮންނާނީ ދިވެހި ޤައުމާއި މެދު ފަޚްރުވެރިވާނެ ދިވެހި ދަރިންތަކެއް އުފެއްދިގެން ކަމަށެވެ. ހަމަ އެހެންމެ، ޤައުމިއްޔަތަކީ ކޮންމެ ޤައުމެއްގެ ވެސް އެންމެ އަސާސީ ޤައުމީ މަޞަލަޙަތުކަމަށް ވިދާޅުވެ، ދިވެހީން ދެމިތިބުމަށްޓަކާ ދިވެހި ޤައުމިއްޔަތާއި ދިވެހީންގެ އަމިއްލަވަންތަކަން ދިރުވައި އިއާދަކުރުމަށް މިދިޔަ އަހަރު ކުރެވުނު ބައެއް ކަންކަމުގެ ވާހަކަ ރައީސް ވަނީ ފާހަގަކުރައްވާފަ އެވެ. އެގޮތުން، ދިވެހި ޤައުމިއްޔަތުގެ އިސްވަރު އުފައްދަވައި، ދިވެހި ތަރިކަ ރައްކާތެރިކުރާ ޤައުމީ މަރުކަޒު އުފައްދަވައި، ވިލަރެސްވެރީން ނަންގަވައި، ދިރާސާތައް ފަށްޓަވާފައިވާކަމަށް އެމަނިކުފާނު ވިދާޅުވިއެވެ.
މީގެ އިތުރުން ރައީސް ވިދާޅުވީ، ޒަމާނީ ވަސީލަތްތައް ބޭނުންކުރައްވައިގެން އާސާރީ ތަންތަން ތްރީ ޑީ ސްކޭންކޮށް، ދިވެހިރާއްޖޭގެ މާއްދީ ތަރިކަ ދަފްތަރުކުރުމުގެ މަސައްކަތް އިތުރަށް ހަލުވިކޮށް، އާންމުންނާއި ކިޔަވާ ކުދިންނާއި ދިރާސާކުރާ ފަރާތްތަކަށް ފަސޭހައިން ފެންނާނެ ޑޭޓާބޭސްއެއް ޤާއިމު ކުރެވިފައިވާ ކަމަށެވެ. ހަމަ އެހެންމެ، ތަރިކައިގެ ދާއިރާ ޑިޖިޓައިޒުކުރުމުގެ ސިޔާސަތުގެ ދަށުން އުސްގެކޮޅާއި ކަޅުއޮށްފުންމީގެ އިތުރުން އުސްގެކޮޅާ ގުޅިފައިވާ ޕާކު އިންޓަރެކްޓިވް އަދި އިމަރސިވް އެކްސްޕީރިއަންސް ފޯރުކޮށްދޭ ޒަމާނީ މިއުޒިއަމަކަށް ބަދަލުކުރެއްވުމުގެ މަސައްކަތް މި އަހަރު ފައްޓަވާނެކަމުގެ އުފާވެރި ޚަބަރު ރައީސް ވަނީ ދެއްވަވާފައެވެ.
ރައިސުލްޖުމްހޫރިއްޔާ ވިދާޅުވީ، ދިވެހި ޤައުމިއްޔަތުގެ ދާއިރާއިން ހިންގޭ ޚާއްޞަ މަޝްރޫޢެއްގެ ގޮތުގައި ޣާޒީ ބަންޑާރައިންގެ އަސަރުތައް ހިމާޔަތްކުރުމުގެ ޤައުމީ މަޝްރޫޢެއް ހއ. އަތޮޅުގައި މި އަހަރު ފަށްޓަވާނެ ކަމަށެވެ. އަދި، އެ މަޝްރޫޢުގެ ފުރަތަމަ ފިޔަވަހީގައި ހއ. އުތީމު، ބާރަށް، އަދި ތަކަންދޫގައި ހިމެނޭ މާއްދީ އެހެނިހެން ތަރިކަތައް ވެސް ހިމަނައިގެން، ދިވެހީންގެ އަމިއްލަވަންތަކަން އިޢާދަކުރުމަށާއި ތަރިކައިން އާމްދަނީ ހޯދުމުގެ މަސައްކަތްތަކެއް ކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ރިޔާސީ ބަޔާނުގައި ރައިސުލްޖުމްހޫރިއްޔާ ވަނީ، ރާއްޖޭގެ މުސްތަޤްބަލުގައި ކުރެއްވުމަށް ހުރި މުހިންމު ގިނަ މަސައްކަތްތަކަކަށް އަލިއަޅުއްވާލާފަ އެވެ.