ނިއުޒިލޭންޑްގެ ގަވަރުނަރ ޖެނެރަލަށާއި ބޮޑުވަޒީރަށް ވައިޓެންގްއީ ޑޭގެ ތަހުނިޔާ ރައިސުލްޖުމްހޫރިއްޔާ ފޮނުއްވައިފި

ނިއުޒިލޭންޑުގެ ޤައުމީ ދުވަސް ނުވަތަ އެ ޤައުމުގެ ވައިޓެންގްއީ ޑޭ ގެ މުނާސަބަތުގައި، އެ ޤައުމުގެ ގަވަރުނަރ ޖެނެރަލަށާއި ބޮޑުވަޒީރަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާ ފޮނުއްވައިފ އެވެ.  

ރައީސުލްޖުމްހޫރިއްޔާ ވަނީ، ގަވަނަރ ޖެނެރަލް އޮފް ނިއުޒީލަންޑް، ނިއުޒީލަންޑް އޯޑަރ އޮފް މެރިޓް (ޖީ.އެން.ޒީ.އެމް)، ކިންގްސް ސަރވިސް އޯޑަރ (ކޭ.އެސް.އޯ) ހަރ އެކްސަލަންސީ ޑޭމް ސިންޑީ ކީރޯ އަށާއި، ނިއުޒީލަންޑްގެ ބޮޑުވަޒީރު ހިޒް އެކްސަލަންސީ ކްރިސްޓޮފަރ ލަކްސޯންއަށް ވަކިވަކިން ސިޓީފުޅެއް ފޮނުއްވާ ތަޙުނިޔާ ވިދާޅުވެފަ އެވެ. ރައިސުލްޖުމްހޫރިއްޔާ ފޮނުއްވެވި މި ސިޓީފުޅުގައި ވަނީ، ދިވެހިރާއްޖެއާއި ނިއުޒީލަންޑާއި ދެމެދު އޮތް އެކުވެރިކަމުގެ ގުޅުން ފާހަގަކުރައްވާފަ އެވެ. މީގެ އިތުރުން، ތަރައްޤީގެ ކަންކަން ހިމެނޭ އެކި ދާއިރާތަކުން އެއްބާރުލުން ދެއްވާނެކަމުގެ ޔަޤީންކަން ރައީސް ވަނީ ދެއްވަވާފަ އެވެ.

ރައީސް ވިދާޅުވީ، މޫސުމީ ނޭދެވޭ ބަދަލުތަކާއި ދެކޮޅަށް ފިޔަވަޅު އެޅުއްވުމަށް ކުރައްވާ މުހިންމު މަސައްކަތްތަކުގައި އެހީތެރިކަން ފޯރޮކޮށްދެއްވާ، އެއްބާރުލުން ދެއްވާނެ ކަމަށެވެ. ހަމަ އެހެންމެ، ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާ ކުރެއްވުމަށް އަބަދުވެސް މަސައްކަތް ކުރައްވާނެ ކަމަށް ރައީސް ވަނީ ވިދާޅުވެފަ އެވެ. މީގެ އިތުރުން، ރައީސުލްޖުމްހޫރިއްޔާ ވަނީ ގަވަރުނަރު ޖެނެރަލާއި ބޮޑުވަޒީރަށް ތަނަވަސްކަމާއި، ދުޅަހެޔޮ ޞިއްޙަތަކަށް އެދިވަޑައިގެންފައެވެ. 

ނިއުޒިލޭންޑުގެ ވައިޓަންގްއީ ދުވަހުގެ ގޮތުގައި ކޮންމެ އަހަރެއްގެ ވެސް ފެބުރުވަރީ މަހުގެ 6 ވަނަ ދުވަސް، އެ ޤައުމުން އަންނަނީ ފާހަގަކުރަމުންނެވެ. ދިވެހިރާއްޖެއާއި ނިއުޒީލަންޑާއި ދެމެދު ސިޔާސީ ގުޅުން ޤާއިމްކޮށްފައިވަނީ 10 އޮކްޓޯބަރ 1974 ގައެވެ.