ޚަބަރު
ޤަވާއިދާ ޚިލާފަށް އެމެރިކާގައި އުޅެމުން ދިޔަ އިންޑިއާގެ ރައްޔިތުންތަކެއް، އެ ޤައުމުން ބޭރުކޮށްފި

އެމެރިކާއިން ބޭރުކޮށްލި އިނޑިއާގެ ރައްޔިތުން/ ފޮޓޯ: ޕީޕަލްސް ޑިސްޕެޗް
އެމެރިކާގައި ޤަވާޢިދާ ޚިލާފަށް އުޅެމުންދިޔަ، 100 އަށް ވުރެ ގިނަ އިންޑިޔާ މީހުން، އަސްކަރީ މަތިންދާބޯޓެއްގައި އަނބުރާ އިންޑިޔާއަށް ފޮނުވާލައިފިއެވެ.
އެމެރިކާގައި ޤަވާޢިދާ ޚިލާފަށް ދިރިއުޅޭ ބޭރު ޤައުމުތަކުގެ މީހުން އަނބުރާ ފޮނުވައިލުމުގެ ވަރުގަދަ އޮޕަރޭޝަނެއް ޑޮނާލްޑް ޓްރަމްޕު ވަނީ ފަށާފައެވެ. ކުރީގެ ސަރުކާރުތަކުގައި ވެސް، އެމެރިކާގައި ޤަވާޢިދާ ޚިލާފަށް އުޅޭ އިންޑިޔާ މީހުން ޑިޕޯޓުކޮށްފައި ވީނަމަވެސް، މިއީ މިކަމަށް އަސްކަރީ މަތިންދާބޯޓެއް ބޭނުންކުރި ފުރަތަމަ ފަހަރެވެ.
އިންޑިޔާގެ ޕަންޖާބު ސްޓޭޓުގެ އަމްރިތުސަރަށް އިންޑިޔާގެ 104 މީހުން ގޮވައިގެން އައި އެމެރިކާގެ އަސްކަރީ މަތިންދާބޯޓު ޖައްސާފައިވާ ކަމަށް ޕަންޖާބުގެ މިނިސްޓަރު ކުލްދީޕް ސިންގ ދަލިވާލް ވިދާޅުވިއެވެ. މި ރައްޔިތުން ފޮނުވާލާފއިވާއިރު، އަންނަ ހަފްތާގައި އިންޑިއާގެ ބޮޑުވަޒިރު ނަރެންދުރަ މޯދީ އާއި، ޑޮނާލްޑް ޓްރަމްޕުގެ ބައްދަލުމެއް އެމެރިކާގައި ބޭއްވުމަށް ރާވާފައިވާކަން ފާހަގަކޮށްލެވެއެވެ.
އެމެރިކާއިން އަނބުރާ ފޮނުވައިލި މީހުންގެ ތެރޭގައި، ގުޖުރާތަށް ނިސްބަތްވާ 33 މީހުންނާއި، ޕަންޖާބަށް ނިސްބަތްވާ 30 މީހުން ހިމެނޭ ކަމަށް ޕަންޖާބުން ބުނެފައިވެއެވެ. ހަމައެހެންމެ އެމެރިކާގައި ޤަވާޢިދާ ޚިލާފަށް އުޅޭ މީހުންނާ ދެކޮޅަށް ޓްރަމްޕްގެ ސަރުކާރުން ފަށާފައިވާ މަސައްކަތަށް ފުރިހަމައަށް އެއްބާރުލުން ދޭނެ ކަމަށް އިންޑިޔާ ސަރުކާރުން ވަނީ ބުނެފައެވެ. މި އެއްބާރުލުން އިންޑިއާއިން ދެއްވިނަމަވެސް އިންޑިޔާގެ މަސައްކަތްތެރިންނަށް އެމެރިކާއިން ވިސާ ދިނުމުގައި ލުއިތަކެއް ހޯދުމަށް އިންޑިޔާއިން ބޭނުންވާކަން ހާމަކޮއްފައިވެއެވެ.