އިތުރު ވައިޑް ބޮޑީ މަތިންދާބޯޓެއް ހޯދުމުގެ މަސައްކަތް ފަށައިފި

ޔޫރަޕްގެ މަންޒިލްތަކަށް ދަތުރުތައް ފެށުމަށް، މޯލްޑިވިއަންއަށް ވައިޑް ބޮޑީގެ އިތުރު މަތިންދާ ބޯޓެއް ހޯދުމުގެ މަސައްކަތް ފަށައިއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދުފުޅާއި އެއްގޮތަށް މޯލްޑިވިއަންގެ ދަތުރުތަކުގައި ބޭނުންކުރުމަށް ފުރަތަމަ ފަހަރަށް ވައިޑް-ބޮޑީ މަތިންދާ ބޯޓެއް (އެއަރބަސް އޭ330-200 މަރުކާގެ މަތިންދާ ބޯޓެއް) ގެނައީ މިދިޔަ މަހުގެ 6 ވަނަ ދުވަހުއެވެ. މި މަތިންދާބޯޓު ގެނައުން ފާހަގަކުރުމަށް ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ ވައިޑް ބޮޑީ އިތުރު މަތިންދާބޯޓެއް މި އަހަރުގެ އޮކްޓޫބަރުމަހު ގެނައުމަށް މަސައްކަތްކުރައްވަމުން ގެންދަވާކަން ހާމަކުރައްވާފައެވެ.

އެއާބަސް އޭ330-200 މަރުކާގެ މަތިންދާބޯޓެއް ހޯދުމަށް، މޯލްޑިވިއަން ހިންގާ އައިލޭންޑް އޭވިއޭޝަން ކުންފުނިން މިހާރު ވަނީ އިޢުލާންކޮށްފައެވެ. އެ ކުންފުނީގެ އިއުލާނުގައިވާ ގޮތުން އެ މަތިންދާބޯޓު ކުއްޔަށް ނަގާނީ 5 އަހަރުގެ ދުވަހުގެ މުއްދަތަކަށެވެ. އެހެންކަމުން، އެކަމަށް ޝައުގުވެރިވާ ފަރާތްތަކުން އަންނަ މަހުގެ 7 ވަނަ ދުވަހާ ހަމައަށް ޕްރޮޕޯސަލް ހުށައެޅުމުގެ ފުރުޞަތު ވަނީ ހުޅުވާލާފައެވެ.

މޯލްޑިވިއަނަށް މިދިޔަމަހު ގެނައި 264 މީހުންގެ ޖާގައިގެ ވައިޑް-ބޮޑީ މަތިންދާބޯޓާއެކު އެ އެއަރލައިންގެ ސީދާ ދަތުރުތައް ވަނީ ޗައިނާގެ ބެއިޖިން، ޝަންހާއީ އަދި ޗެންގްޑޫއަށް ވަނީ ފަށާފައެވެ. މިއަދު ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ މޯލްޑިވިއަންއަށް ގެންނަ ދެވަނަ ވައިޑް ބޮޑީ މަތިންދާބޯޓާއެކު އެ އެއަރލައިންގެ ދަތުރުތައް ޔޫރަޕްގެ މަންޒިލްތަކަށް ފެށިގެންދާނެކަމަށެވެ.

މި ވައިޑުބޮޑީ އެއަރލައިން ރާއްޖެ ގެނައުމަކީ ރާއްޖޭގެ ފަތުރުވެރިކަމުގެ ސިނާޢަތަށް ބޮޑު ކުރިއެރުމެއް ލިބިގެން ދާނެ ބަދަލަކަށް ވުމަކީ އެކަށީގެންވާ ކަމެއްކަމަށް ސަރުކާރުން ޤަބޫލުކުރައްވައެވެ.