19 އަހަރުން ދަށުގެ ޔޫތު ޗެމްޕިއަންޝިޕް މުބާރާތް މި މަހުގެ 13 އަށް ފަސްކޮށްފި

19 އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތް މި މަހުގެ 13 ވަނަ ދުވަހު ފެށުމަށް ފަސްކޮށްފި އެވެ. ފުޓްބޯލް އެސޯސިއޭޝަން އޮފް މޯލްޑިވްސް، އެފްއޭއެމް އިން ހާމަކުރިގޮތުގައި، މި މުބާރަތް ފެށުމަށް އެންމެ ފުރަތަމަ ތާވަލުކުރެވިފައި ވަނީ މި ހިނގާ ފެބްރުއަރީ މަހުގެ 2 ވަނަ ދުވަހު އެވެ. 

މި މުބާރަތް ފެށުމަށް ހަމަޖެހިފައިވާ ތާރީޚް ފަސްކުރެވިފައިވާ ކަން ކުލަބުތަކަށް އަންގާފައިވަނި އަންގާރަ ދުވަހު، ފުޓްބޯލް އެސޯސިއޭޝަން އޮފް މޯލްޑިވްސް އިން އާންމުކޮށްފައިވާ ސާރކިއުލާއެއްގަ އެވެ. 

19 އަހަރުން ދަށުގެ ޔޫތު ޗެމްޕިއަންޝިޕުގައި، ނިމިގެންދިޔަ ޔޫތު ލީގުގައި ކުޅުނު ކުލަބުތަކުން ވާދަކުރާނެ އެވެ. އޭގެ ތެރޭގައި، ވިކްޓްރީ ސްޕޯޓްސް ކްލަބާއި، އަލަށް ޕްރޮމޯޓްވި އޮޑީ ސްޕޯޓްސް ކުލަބުގެ އިތުރުން، އެންމެ ފަހު ޔޫތު ޗެމްޕިއަންޝިޕްގައި ސަސްޕެންޑުކޮށްފައި ވާ ވެލެންސިއާ ވެސް މިއަހަރުގެ މުބާރާތުގައި ވާދަކުރާނެ އެވެ.

މި މުބާރަތަކީ، ފުޓްބޯލް އެސޯސިއޭޝަން އޮފް މޯލްޑިވްސް އިން އިސްނަގައިގެން 2011 ވަނަ އަހަރު ބާއްވަން ފެށި މުބާރާތެކެވެ. ޔޫތު ޗެމްޕިއަންޝިޕް މިއަހަރުގެ މުބާރާތް ޖޫންމަހުގެ ތެރޭގައި ބޭއްވުމަށް އެފްއޭއެމް ގެ ކަލަންޑަރު އެކުލަވާލި އިރު ވަނީ ނިންމާފައެވެ. ނަމަވެސް، އެ ތާރީޚު ފެބްރުއަރީ މަހުގެ 2 ވަނަ ދުވަހަށް އޭރު ބަދަލުކޮށް، މިހާރު މި މުބާރަތް ފެށުމަށް ހަމަޖެހިފައި މި ވަނީ މި މަހުގެ 13 ވަނަ ދުވަހު އެވެ. 

މިދިޔަ އަހަރުގެ ޔޫތު ޗެމްޕިއަންޝިޕް މުބާރާތުގައި ޗެމްޕިއަންކަން ހޯދީ، ޓީސީ ސްޕޯޓްސް ކުލަބުންނެވެ. އެއީ، ފައިނަލްގައި އެއްވެސް ޓީމަކަށް ލަނޑެއް ނުޖެހި، ޕެނަލްޓީގައި ސުޕަ ޔުނައިޓެޑް ސްޕޯޓްސް އަތުން މޮޅުވެގެންނެވެ.