ރިހެބިލޭޝަން ފަރުވާ ނުދެވި ތިބި މީހުންގެ އަދަދު ބޮޑުތަނުން ދަށަށް

ޑރ. މުޙައްމަދު މުޢިއްޒުގެ ދައުރު ފެށުނުއިރު، މަސްތުވާތަކެތީގެ މައްސަލައިގި ފަރުވާއަށް ހުކުމްކޮށް ފަރުވާގެ ނިޒާމަށް ނުވައްދާ ތިބި 700 މީހުންގެ ތެރެއިން 600 މހުން މިހާރު ނިޒާމަށް ވެއްދިފައިވާކަމަށް ނެޝަނަލް ޑްރަގް އެޖެންސީއިން ވިދާޅުވެއްޖެއެވެ

މަސްތުވާތަކެތީގެ މައްސަލައަކި ރާއްޖޭގެ ހުރިހައި ރަށެއްގައިހެން އޮތް މައްސަލައަކަށް ވީއިރު، މި މައްސަލައަށް ރަނގަޅު ހައްލެއް ބެނުންވެފައިވާކަމަށް ދާޚިލީ ސަލާމަތާ ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛާ ލުބްނާ ޒާހިރު ވިދާޅުވެފައިވެއެވެ. ސްޓޭޓް މިނިސްޓާރ މިހެން ވިދާޅުވެފައި ވަނީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަދައްކަވަމުންނެވެ. 

ފަރުވާގެ ނިޒާމަށް މީހުން ވެއްދުމުގެ މަސައްކަތް އަވަސްކުރުމަށް، އެންޑީއޭގެ ތެރޭގައި ޚާއްސަ ޓާސްކްފޯހެއް އެކުލަވާލާ އެ މަސައްކަތް އަވަހަށްކޮށް ބޮޑު ކުރިއެރުމެއް ލިބިފައިވާކަމަށް ސްޓޭޓް މިނިސްޓަރ ލުބްނާ ޒާހިރު ވިދާޅުވިއެވެ.

"ފަރުވާއަށް ނުދެއްވި 700 އަށްވުރެ ގިނަ މީހުން ތިބިއިރު، މި އަދަދު މިހާރު 150 އަށްވުރެ ދަށްކުރެވިއްޖެ. އެމީހުންވެސް ފަރުވާއަށް ގެނައުމަށް ކުރަންޖެހޭ މަސައްކަތްތައް އަވަސްކޮށް، އޭގެ ފަހުގެ މަރުޙަލާގެ މަސައްކަތްތައް އެ ކުރިއަށްދަނީ." ދާޚީލީ ސަލާމަތާ ބެހޭ ވުޒާރާގެ ސްޓޭޓް މިނިސްޓަރ ލުބްނާ ޒާހިރު ވިދާޅުވިއެވެ.

އެންޑީއޭގެ ރިހެބް ޕްރޮގްރާމްތައްވެސް ވަނީ ވަރަށް ބޮޑަށް ހަރުދަނާކޮށްފައެވެ. 3 މަސް ދުވަހުގެ މި ރިހެބް ސެޝަންތަކުގައި އެމީހުންނާ ސިއްޙީ ފަރުވާއާއި ކައުންސިލިންއާއި ދީނީ އަގީދާ ވަރުގަދަކުރުމާއި އަދި ފަރުވާގެ ނިޒާމު ނިންމާ ނިކުންނަ މީހުން މޮނިޓަރކޮށް އެމީހުންނަށް ބޭނުންވާ އިތުރު އެހީތައްވެސް ދަނީ ފޯރުކޮށްދެމުންނެވެ. މީގެތެރޭގައި ވަޒީފާގެ ހުނަރުތައް ދަސްކޮށްދިނުންފަދަ މަސައްކަތްތައް ހިމެނެއެވެ.