އައި.ޖީ.އެމް ހޮސްޕިޓަލުގެ އީ.އާރުގައި ފަރުވާދެމުންދިޔަ ޙާއްސައެހީއަށް ބޭނުންވާ މީހަކު ނިޔާވި މައްސަލަ ތަޙުޤީޤުކުރަނީ

ރޭގެ 11:30 ހާއިރު އައި.ޖީ.އެމް ހޮސްޕިޓަލުގެ ކުއްލި ފަރުވާދޭ ބައިގައި ފަރުވާދެމުން ދިޔަ ނުކުޅެދުންތެރިކަން ހުންނަ މީހަކު ނިޔާވިކަމަށް ބުނެ ފުލުހުންނަށް ރިޕޯޓުކޮށްފިއެވެ.

މި މައްސަލައާ ގުޅޭގޮތުން ފުލުހުން މަޢުލޫމާތު ދިންގޮތުގައި، މި މީހާ ހޮސްޕިޓަލަށް ފަރުވާދިނުމަށް ގެންގޮސްފައިވަނީ ތަނަކުން ވެއްޓި ލިބުނު އަނިޔާއަކާ ގުޅިގެންނެވެ. ނަމަވެސް ފުލުހުން ބެލި ބެލުމުން، ހަށިގަނޑުގައި ފަރުވާ ދިނުމުގެ ތެރޭގައި ހުރި ނިޝާނެއް ފިޔަވައި ހަށިގަނޑަށް ގެއްލުމެއް ލިބިފައި ހުރި ކަމުގެ ނިޝާނެއް ފެންނަން ނެތެވެ. އަދި އާއިލާގެ ފަރާތުން ވެސް މިހާތަނަށް، ތުހުމަތު ތަކެއްކޮށް އެފަދަ ޝަކުވާއެއް ފުލުހުންނާ ހިއްސާ ކޮށްފައި ނުވެއެވެ.

ހޮސްޕިޓަލުން ދީފައިވާ މަޢުލޫމާތުގައި، އެ މީހާއަށް ފަރުވާދިނުމަށް މަސައްކައް ކުރަމުން ދަނިކޮށް ކުއްލިއަކަށް ތެދުވެގެން ދުއްވައިގަނެގެން ދަނިކޮށް ވެއްޓުނު ކަމަށް ބުނެފައިވެއެވެ.

މި މައްސަލައާ ގުޅޭ ގޮތުން އިތުރަށް ބަލަންޖެހޭ ކަންކަން ފުލުހުން ދަނީ ބަލަމުންނެވެ. ފުލުހުންނަށް މި މައްސަލަ ރިޕޯޓުކޮށްފައިވަނީ އައި.ޖީ.އެމް ހޮސްޕިޓަލުންނެވެ.

ފުލުހުން މަޢުލޫމާތު ދިންގޮތުގައި، ފުލުހުންނަށް ހުށަހެޅޭ ކޮންމެ މަރުގެ މައްސަލައެއްގައިވެސް އަމަލުކުރާ އުސޫލަކީ، ތުހުމަތު ކުރެވޭ އެއްވެސް ކަމެއް ފާހަގަ ނުވި ނަމަވެސް ތަހުލީލުތައް ހެދުމަށް ބޭނުންވާ ސާމްޕަލް ނެގުމެވެ. މިއީ އުސޫލުގެ ގޮތުން ފުލުހުން އަމަލު ކުރަމުންދާ ގޮތެވެ.ކޭސް ފައިލް ކުރާނީ ތަހުލީލުތަކުގެ ނަތީޖާއަށް ބެލުމަށް ފަހުއެވެ.