Ads by Exprox

ޚަބަރު

ރާއްޖޭގެ އެކި ކަންކޮޅުތަކުގައި 134 ސްކޫލް އިންފްރާސްޓްރަކްޗަރ މަޝްރޫޢު މިއަހަރު ކުރިއަށްދާނެ: ރައީސް މުޢިއްޒު

ރާއްޖޭގެ އެކި ކަންކޮޅުތަކުގައި 134 ސްކޫލް އިންފްރާސްޓްރަކްޗަރ މަޝްރޫޢު މިއަހަރު ކުރިއަށްދާނެ: ރައީސް މުޢިއްޒު

ހުޅުމާލޭ ސަރުކާރު ސްކޫލެއް ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

07 ފެބްރުއަރީ 2025، 03:02

07 ފެބްރުއަރީ 2025، 03:02

ރާއްޖޭގެ އެކި ކަންކޮޅުތަކުގައި ސްކޫލްތަކުގެ އިންފްރާސްޓްރަކްޗަރ ޤާއިމުކުރުމުގެ 134 މަޝްރޫޢު މިއަހަރު ކުރިއަށްދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މި މަޝްރޫޢުތައް ކުރިއަށްދާނީ ސަރުކާރުގެ ބަޖެޓުން ޚަރަދުކޮށްގެންނެވެ.

ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް މުޢިއްޒު މި ވާހަކަ ވިދާޅުވިއެވެ. އަދި ތަޢުލީމީ ދާއިރާއިން މިއަހަރަށް ހުރި މުހިންމު ކަންކަންވެސް ހިއްސާކުރެއްވިއެވެ.

ރައީސް މުޢިއްޒު ވިދާޅުވީ، ރާއްޖެއަކީ ތަޢުލީމަށް ލޯބިކުރާ، ތަހުޒީބު މުޖުތަމައެއް ބިނާކުރަން ބޭނުންވާ ރައްޔިތުންތަކެއް ދިރިއުޅޭ ޤައުމެއްކަމުން، ޤައުމު އާރާސްތުކޮށް ދެމެހެއްޓެނިވި ގޮތެއްގައި ބިނާކުރެވޭނީ، ޤައުމުގައި ދެވޭ ތަޢުލީމުގެ ފެންވަރު މަތިކޮށްގެންކަމަށެވެ.

މިވަގުތު ސަރުކާރުން ތަޢުލީމީ ދާއިރާ ކުރިއަރުވައި ވަރުގަދަކުރުމަށް އެތައް މަސައްކަތްތަކެއް ކުރައްވަމުންގެންދަވާކަމަށް ރައީސް ވިދާޅުވިއެވެ. އޭގެ ތެރޭގައި ޕްރައިމަރީ ތަޢުލީމު ހަރުދަނާކުރުމަށް ޓެކްނިކަލް ފެންވަރުގައި ކުރަންޖެހޭ މަސައްކަތްތައް ކުރިއަށްދާކަމަށާއި، ދަރިވަރުން ކިޔަވާ މަންހަޖުގެ މަޢުލޫމާތުތައް އަލުން މުރާޖާކުރުމާއެކު، މުދައްރިސުންގެ ފަންނީ ޤާބިލުކަން އިތުރުކުރުމުގެ ޚާއްޞަ މަސައްކަތްތަކެއް މިއަހަރުގެ ޖަނަވަރީ މަހުން ފެށިގެން ކުރިއަށްގެންދެވޭކަމަށްވެސް ފާހަގަކުރެއްވިއެވެ.

މީގެއިތުރުން، "ކޫލް ސްކޫލް" ޕްރޮޖެކްޓުގެ ދަށުން ސަރުކާރުން ހިންގާ ސްކޫލުތަކުގެ 3700 އަށްވުރެ ގިނަ ކްލާސްރޫމަށް މިއަހަރު އޭސީ ފޯރުކޮށްދީ، މި އަހަރުގެ ތެރޭގައި މި މަޝްރޫޢު ނިންމަން މަސައްކަތްކުރައްވާކަމަށް ރައީސް ވިދާޅުވިއެވެ. އަދި މާލެ ސަރަހައްދުގައި ސާނަވީ ތަޢުލީމުދޭ އިތުރު ސްކޫލުތައް އެޅުމުގެ މަޝްރޫޢެއް މިއަހަރު ފެށުމަށްޓަކައި ތައްޔާރުވަމުންދާކަމަށްވެސް ވިދާޅުވިއެވެ.

ރައީސް މުޢިއްޒުގެ ރިޔާސީ ބަޔާނުގައި ދިވެހި ކިޔަވާކުދިންގެ ތަޢުލީމަށް ސަރުކާރުން ވަރަށް ބޮޑު އިސްކަމެއް ދެއްވާނެކަމުގައި ވިދާޅުވިއެވެ. އެގޮތުން ފާއިތުވި އަހަރު 15,300 އަށްވުރެ ގިނަ ދަރިވަރުންގެ މަތީ ތަޢުލީމު ހާސިލުކުރުމަށް 1.26 ބިލިޔަން ރުފިޔާގެ މާލީ އެހީ ދީފައިވާކަމަށާއި، ޤައުމުގެ ތަރައްޤީއަށް ބޭނުންވާ ދާއިރާތަކުން މަތީ ތަޢުލީމާއި ތަމްރީނުގެ ފުރުޞަތުތައް ހޯދައިދިނުމަށް ކުރު މުއްދަތުގެ ތަމްރީނުތަކަށް 1000 ފުރުސަތު ދެވިފައިވާކަމަށް ރައީސް ވިދާޅުވިއެވެ.

ހަމައެހެންމެ 640 އަށްވުރެ ގިނަ ސްކޮލަރޝިޕް ފުރުސަތު މަތީ ތަޢުލީމު ހާސިލްކުރާ ދަރިވަރުންނަށް ފަހިކޮށްދެވިފައިވާކަމަށްވެސް ރައީސް ފާހަގަކުރެއްވިއެވެ.

މުދައްރިސުންގެ ދުޅަހެޔޮކަމަށް އިސްކަންދިނުމަކީ އެމަނިކުފާނުގެ ވައުދެއްކަމުގައި ރައީސް ވިދާޅުވިއެވެ. މި ވައުދު ފުއްދެވުމުގެ ގޮތުން، ސްކޫލުގައި ހޭދަކުރާ މަސައްކަތުގެ ވަގުތު ވަކި މިންގަނޑެއްގައި ހިފެހެއްޓެވުމާއެކު، ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމްކޮށްފައިވާ ހެލްޕްލައިންގެ ޚިދުމަތް މުދައްރިސުންނަށްވެސް ބޭނުންކުރެވޭނެ ގޮތް ހަމަޖައްސާފައިވާކަމަށް ވިދާޅުވިއެވެ.


                    


                    

މި ލިޔުން ކިޔާލުމުން

Ads by MSS