ފަސް އަހަރު ފަހުން ފުރަތަމަ ފަހަރަށް އިންޑިއާގެ އިންޓަރެސްޓް ރޭޓް ދަށްކޮށްފި

އިންޑިއާގެ އިޤްތިޞާދީ ދުވެލި މަޑުޖެހެމުންދާތީ، އެކަމަށް ހައްލެއް ހޯދުމުގެ ގޮތުން އިންޑިއާގެ ސެންޓްރަލް ބޭންކުން ފަސް  އަހަރު ފަހުން ފުރަތަމަ ފަހަރަށް އިންޓަރެސްޓް ރޭޓް ދަށްކޮށްފިއެވެ.

ރިޒާވް ބޭންކް އޮފް އިންޑިއާ (އާރްބީއައި) އިން ހުކުރު ދުވަހު ބުނެފައިވާ ގޮތުގައި، ވިޔަފާރި ބޭންކުތަކަށް ދޫކުރާ ލޯނުތަކުގެ އިންޓަރެސްޓް ރޭޓް ކަމުގައިވާ ރެޕޯ ރޭޓް 0.25 އިންސައްތަ ދަށްކޮށް 6.25 އިންސައްތައަށް ބަދަލުކޮށްފައިވެއެވެ. އާރްބީއައި އިން އެންމެ ފަހުން އިންޓަރެސްޓް ރޭޓް ދަށްކޮށްފައިވަނީ 2020 ވަނަ އަހަރުގެ މެއި މަހުގައެވެ.

އާރްބީއައިގެ ގަވަރުނަރު ސަންޖޭ މަލްހޯޓްރާ ވިދާޅުވީ، މިހާރުގެ "އިޤްތިޞާދީ ދުވެއްޔާއި އަގުތައް މައްޗަށް ދިއުމުގެ ހާލަތަށް" ބަލާއިރު، މަނިޓަރީ ޕޮލިސީ ލުއިކޮށްލުމަކީ އެންމެ އެކަށީގެންވާ ގޮތް ކަމުގައެވެ.

އަޅުގަނޑުމެން މަސައްކަތް ކުރަނީ މަނިޓަރީ ޕޮލިސީ ތަންފީޒުކޮށް، އެކަށީގެންވާ ފިޔަވަޅުތައް އަޅައި، އަގުތައް ސްޓޭބަލްކޮށް، އިޤްތިޞާދީ ދުވެލި ދެމެހެއްޓެނިވި ގޮތެއްގައި އިތުރުކޮށް، އަދި މާލީ ސްޓެބިލިޓީ ހިފެހެއްޓުމަށް މަގުފަހިކޮށްދޭ މެކްރޯ އިކޮނޮމިކް ހާލަތެއް ގާއިމުކުރުމަށް

 މަލްހޯޓްރާ 

އިންޑިއާގެ އިޤްތިޞާދު ދަނީ އެހެން ބޮޑެތި އިޤްތިޞާދުތަކަށްވުރެ ބާރު ދުވެއްޔެއްގައި ކުރިއަރަމުންނެވެ. ނަމަވެސް ފާއިތުވި މަސްތަކުގައި ކާބޯތަކެތީގެ އަގުތައް މައްޗަށް ދިއުމާ ގުޅިގެން ޚަރަދުކުރުން މަޑުޖެހި، އިޤްތިޞާދީ ދުވެލި ވަނީ ލަސްވެފައެވެ.

ޖުލައި-ސެޕްޓެމްބަރު ކުއާޓަރގައި ޖީޑީޕީ ކުރިއަރާފައިވަނީ އަހަރީ ގޮތުން 5.4 އިންސައްތައިންނެވެ. އޭގެ ކުރީ ކުއާޓަރުގައި މި ނިސްބަތް ހުރީ 6.7 އިންސައްތައިގައެވެ. އަދި އޭގެ ކުރީ ކުއާޓަރުގައި 7.8 އިންސައްތައިގައެވެ.

ބަޖެޓް ހުށަހެޅުމުގެ ގޮތުން ފާއިތުވި ހަފްތާގައި ބޮޑެތި ޓެކްސް ލުއިތަކެއް ވަނީ އިޢުލާންކޮށްފައެވެ. މީގެ ތެރޭގައި އާމްދަނީން ޓެކްސް ނެގޭ މިންވަރު 8,000 ޑޮލަރުން 14,800 ޑޮލަރަށް މަތިކުރުން ހިމެނެއެވެ.