ސަޢޫދީ އަރަބިއްޔާ އާއި ޓާޓާ ގްރޫޕާ ދެމެދު މިލިޓަރީ، އޭވިއޭޝަން އަދި އިލެކްޓްރޯނިކްސްއާ ގުޅޭ މަޝްވަރާތަކެއް

ސަޢޫދީ އަރަބިއްޔާގެ ނޫސް އެޖެންސީން ރިޕޯޓުކޮށްފައިވާ ގޮތުގައި، ސަޢޫދީ އަރަބިއްޔާއިން ވަނީ އިންޑިއާގެ އެންމެ ބޮޑު ވިޔަފާރި ކުންފުނި ކަމުގައިވާ ޓާޓާ ގްރޫޕާއެކު މިލިޓަރީ، އޭވިއޭޝަން އަދި އިލެކްޓްރޯނިކްސް ފަދަ އެކި ދާއިރާތަކުގައި އެއްބާރުލުން އިތުރުކުރުމުގެ ފުރުސަތުތައް ބަލައި ދިރާސާކުރަން ފަށާފައެވެ.

ސަޢޫދީ އަރަބިއްޔާގެ އިންޑަސްޓްރީ އަދި މިނަރަލް ރިސޯސަސް މިނިސްޓަރު ބަންދަރު އަލްޚުރައިފް ވަނީ ޓާޓާ ގްރޫޕުގެ ދަށުން ހިންގާ ޓާޓާ އެއަރޯސްޕޭސް އެންޑް ޑިފެންސް، ޓާޓާ އިލެކްޓްރޯނިކްސް އަދި ޓާޓާ ސްޓީލްގެ އިސްވެރިންނާ ބައްދަލުކޮށް، އެއްބާރުލުން އިތުރުކުރެވިދާނެ ދާއިރާތަކާ ގުޅޭގޮތުން މަޝްވަރާކުރައްވާފައެވެ.

މި ބައްދަލުވުމުގައި ސަޢޫދީ މިނިސްޓަރު ވަނީ ވިޝަން 2030 ޕްރޮގްރާމުގެ ދަށުން އިޤްތިޞާދު ތަފާތު ދާއިރާތަކަށް ފުޅާކުރުމުގެ ލަނޑުދަނޑިތަކާއި، އެ ޤައުމުގެ ސިނާޢީ ދާއިރާގައި އިންވެސްޓްކުރުމުގެ ފުރުސަތުތަކާ ބެހޭ މަޢުލޫމާތު ހިއްސާކުރައްވާފައެވެ.

ޓާޓާ ގްރޫޕުގެ ދަށުން ހިންގާ ޓާޓާ މޯޓަރސް މިހާރުވެސް ވަނީ ސަޢޫދީ އަރަބިއްޔާގައި ވިޔަފާރި ފަށާފައެވެ. އަދި ނޮވެމްބަރު މަހު އެ ކުންފުނިން ވަނީ ސަޢޫދީ އަރަބިއްޔާގައި ވިޔަފާރިކުރާތާ 30 އަހަރު ފުރުނު ކަމުގެ ފާހަގަކުރުމުގެ ރަސްމިއްޔާތެއް ބާއްވާފައެވެ.

އިންޑިއާ އާއި ސަޢޫދީ އަރަބިއްޔާއާ ދެމެދު ވަރުގަދަ ވިޔަފާރީގެ  ގުޅުމެއް އޮވެއެވެ. ޖެނެރަލް އޮތޯރިޓީ ފޯ ސްޓެޓިސްޓިކްސްގެ އެންމެ ފަހުގެ ރިޕޯޓުގައިވާ ގޮތުން، ނޮވެމްބަރު މަހު ސަޢޫދީ އަރަބިއްޔާއިން ތެޔޮ ނޫން އެހެނިހެން އުފެއްދުންތައް އެންމެ ގިނައިން އެކްސްޕޯޓުކޮށްފައިވަނީ އިންޑިއާއަށެވެ. މިގޮތުން އިންޑިއާއަށް ކުރި އެކްސްޕޯޓުގެ އަގަކީ 2.52 ބިލިއަން ސަޢޫދީ ރިޔާލް (670 މިލިއަން އެމެރިކާ ޑޮލަރު) އެވެ.