ދުނިޔެ
ޔަމަނުގައި ބޮމެއް ގޮއްވާލައިގެން އަލްޤައިދާގެ އިސް މެމްބަރަކު މަރުވެއްޖެ

ބޮންގޮއްވާލި ސަރަޙައްދު ފޮޓޯ:އިންޓަނެޓް
ޔަމަނުގައި ހަރަކާތްތެރިވާ އަލްޤައިދާގެ އިސް މެމްބަރެއް ކަމަށްވާ އަބޫ ޔޫސުފް އަލްމުޙައްމަދީ އަލްޙަދްރަމީ، ބޮމެއް ގޮވައިލައިގެން މަރުވެއްޖެއެވެ. މި މަޢުލޫމާތު ހާމަކޮށްފައިވަނީ ގިނަ ބޮޑެތި ޓެރަރިސްޓް ޙަމަލާތަކުގެ ފަހަތުގައިވާ މި ހަރުކަށި ޖަމާޢަތުންނެވެ.
އަލްޙަދްރަމީ މަރުވެފައިވަނީ ޔަމަނުގެ ވެރިކަން ދެކޮޅު ބަޣާވާތްތެރިން ހިފަހައްޓާފައިވާ ވެރިރަށް ޞަންޢާގެ އިރުމަތީގައިވާ މަރިބް ސަރަޙައްދުގައި އޭނާ މަސައްކަތްކުރާ ތަނާ ކައިރީގައި ބޮމް އަޅާފައިވާ މޮޓޯސައިކަލެއް ގޮވައިލުމުންނެވެ.
އަރަބިއްޔާ ތުންފަތުގައި ހަރަކާތްތެރިވާ އަލްޤައިދާ (އޭކިއޭޕީ) ގެ ނަމުގައި މަޝްހޫރު މި ޖަމާޢަތަކީ އެމެރިކާއިން ދެކޭގޮތުގައި އަލްޤައިދާގެ އެންމެ ނުރައްކާތެރި ގޮތްޕެވެ. 2009 ވަނަ އަހަރު އުފެދުނު މި ޖަމާޢަތް ކުރިއަރައި ގޮސްފައިވަނީ ޔަމަނުގެ ހަނގުރާމައިގެ ހާސްކަމުގެ ތެރެއިންނެވެ.
އޭކިއޭޕީއަކީ ގިނަ ޓެރަރިސްޓް ޙަމަލާތަކުގެ ޒިންމާ ނަގާފައިވާ ޖަމާޢަތެކެވެ. އޭގެ ތެރޭގައި 2000 ވަނަ އަހަރު ޢަދަނުގެ އައްސޭރިފަށުގައި އެމެރިކާގެ ޔޫއެސްއެސް ކޯލް އަށް ދިން ޙަމަލާގައި 17 އެމެރިކާ ސިފައިން މަރުވި ޙަމަލާވެސް ހިމެނެއެވެ. އަދި 2015 ވަނަ އަހަރު ޗާލީ ހެބްދޯ މަޖައްލާގެ އޮފީހަށް ދިން ޙަމަލާގައި 12 މީހުން މަރާލި ދެ ފަރަންސޭސި މީހުން އެކަން ކުރީ އެ ޖަމާޢަތުގެ ނަމުގައި ކަމަށްވެސް އޭކިއޭޕީއިން ބުނެފައިވެއެވެ.