އެމެރިކާގެ މަޝްހޫރު ފޭޝަން ބްރޭންޑްތަކެއް ޗައިނާގެ ބްލެކްލިސްޓަށް

މިދިޔަ އަންގާރަ ދުވަހު، ޗައިނާގެ މާލިއްޔާ ވުޒާރާއިން ވަނީ އެމެރިކާގެ މަޝްހޫރު ފޭޝަން ބްރޭންޑްތަކެއް ކަމުގައިވާ ޓޮމީ ހިލްފިގަރ އަދި ކެލްވިން ކްލައިންގެ ޕޭރެންޓް ކުންފުނި ޕީވީއެޗް (PVH) "އަންރިލަޔަބަލް އެންޓިޓީސް ލިސްޓް" އަށް އިތުރުކޮށްފައެވެ. މިއީ އެމެރިކާ އާއި ޗައިނާ އާ ދެމެދު ހިނގަމުންދާ ވިޔަފާރީގެ ހަނގުރާމައިގެ ތެރެއިން އައި ފިޔަވަޅެކެވެ.

ޗައިނާގެ ވިޔަފާރީގެ ވުޒާރާގެ ތަރުޖަމާނެއް ވިދާޅުވި ގޮތުގައި، ޕީވީއެޗް އިން ވަނީ ޗައިނާގެ ކުންފުނިތަކާ މެދު ތަފާތުކުރުން ގެންގުޅެ، އެފަރާތްތަކުގެ ޙަރަކާތްތަކަށް ހުރަސްއަޅާފައެވެ. ނަމަވެސް މި ލިސްޓަށް ޕީވީއެޗް އިތުރުކުރި ވަކި ސަބަބެއް ހާމަކުރުމަށް އިންކާރުކުރެއްވިއެވެ.

މި ނިންމުމަކީ އެމެރިކާގެ ރައީސް ޑޮނަލްޑް ޓްރަމްޕް ޗައިނާއިން އިމްޕޯޓްކުރާ މުދަލަށް %10 ޓެރިފް އިތުރުކުރުމަށްފަހު އެޅުނު ފިޔަވަޅެކެވެ. މީގެ އިތުރުން، ޗައިނާއިން ވަނީ އެމެރިކާގެ ދަނޑުވެރިކަމުގެ އާލާތްތަކާއި އެނަރޖީ އިމްޕޯޓްތަކަށް އިތުރު ޓެކްސް ނެގުމާއި، ގޫގުލްގެ މައްޗަށް އެންޓިޓްރަސްޓް ތަޙްޤީޤެއް ފެށުން ފަދަ އިތުރު ފިޔަވަޅުތަކެއްވެސް އަޅާފައެވެ.

މި ލިސްޓަށް އިތުރުކުރުމުގެ ސަބަބުން، ޗައިނާއަށް ލިބިގެންދަނީ ޕީވީއެޗްގެ ފިހާރަތައް ބަންދުކުރުމާއި، އޮންލައިންކޮށް ޗައިނާގެ ކަސްޓަމަރުންނަށް އެ ކުންފުނީގެ އުފެއްދުންތައް ވިއްކުން މަނާކުރުމުގެ ބާރެވެ. އަދި މީގެ އިތުރުން، ޖޫރިމަނާކުރުމާއި، އިމްޕޯޓް އަދި އެކްސްޕޯޓް މަނާކުރުމާއި، މުވައްޒަފުންގެ ވާރކް ޕާމިޓް ބާޠިލްކޮށް އެމީހުން އަނބުރާ ފޮނުވާލުމުގެ ބާރުވެސް ލިބިގެންދެއެވެ.

ޕީވީއެޗް އިން ވަނީ މި ނިންމުމާމެދު ފާޑުކިޔާ، މައްސަލަ ޙައްލުކުރުމަށް ޗައިނާގެ އިދާރާތަކާއެކު މަސައްކަތްކުރާނެ ކަމަށް ބުނެފައެވެ.