ޚަބަރު
މި އަހަރު ބާއްވާ ފުރަތަމަ ބައި-އިލެކްޝަންސްތަކުގެ ވޯޓުލުން ކުރިޔަށްދަނީ
ބައި-އިލެކްޝަންސްތަކުގައި ވޯޓުލުން، ފޮޓޯ: އިލެކްޝަންސް ކޮމިޝަން
ޤާނޫނަށް ގެނައި އިސްލާހުގެ ދަށުން މި އަހަރު ބާއްވާ ފުރަތަމަ ބައި-އިލެކްޝަންތައް ފަށައިގެން ކުރިޔަށް އެބަދެއެވެ.
ވޯޓުލާން ކަނޑައަޅާފައިވާ މަރުކަޒުތަކުގައި ވޯޓުލުމަށް ފަށާފައިވަނީ މިއަދު ހެނދުނު 8:00 ގައެވެ. އަދި ވޯޓު ފޮށިތައް ބަންދުކުރުމަށް އިލެކްޝަންސް ކޮމިޝަނުން ކަނޑައަޅާފައިވަނީ ހަވީރު 16:00 ގައެވެ.
މިއަދު ކުރިޔަށްދާ ބައި-އިލެކްޝަންތަކުގައި 12 ދާއިރާއަކުން ވޯޓުލުން ކުރިއަށް އެބަދެއެވެ. މީގެ ތެރޭގައި 2 ރަށެއްގެ ކައުންސިލް ބައި-އިލެކްޝަނާއި، 10 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންތައް ހިމެނެއެވެ.
މިއަދު ކުރިޔަށްދާ ބައި-އިލެކްޝަން ފުރަތަމަ ހުޅުވާލީ 5 ރަށެއްގެ ލޯކަލް ކައުންސިލާއި 28 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތަކަށެވެ. ނަމަވެސް 21 ރަށެއްގެ ބައި-އިލެކްޝަންތަކުގައި އެންމެ ކެންޑިޑޭޓަކު ވާދަކުރުމުން އެ ރަށްތަކުގެ ބައި-އިލެކްޝަންތައް ނުބާއްވައެވެ.
މިއަދު ކުރިއަށްދާ ބައި-އިލެކްޝަންތައް
- ހދ. މަކުނުދޫ ކައުންސިލް މެންބަރު
- ނ. ލަންދޫ ކައުންސިލް އަންހެނުންނަށް ހާއްސަކޮށްފައިވާ ގޮނޑި
- ހދ. ހިރިމަރަދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ނ. މިލަދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ނ. ފޮއްދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ރ. އިންނަމާދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ބ. ގޮއިދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- އދ. ހަންޏާމީދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ދ. ހުޅުދެލި އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ލ. ގަން އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ތ. ބުރުނި އަންހެނުންގެ ތަރައްގީއަށް މަސައްކަތް ކުރާ ކޮމިޓީ
- ގއ. ކަނޑުހުޅުދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީ
މާލޭގައި ދިރިއުޅޭ މި ބައި-އިލެކްޝަންތަކުގައި ވޯޓުލެވޭ ފަރާތްތައް ވޯޓުލުމަށް ހަމަޖެހިފައިވަނީ މާފަންނު މަދަރުސާގައެވެ. އެގޮތުން 4 ވޯޓު ފޮއްޓެއް ވަނީ މާފަންނު މަދަރުސާގައި ބަހައްޓާފައެވެ.
ޤާނޫނަށް ގެނައި އިސްލާހުގައި ބުނެފައިވާ ގޮތުން ކައުންސިލް އަދި އަންހެނުންގެ ކޮމިޓީތަކުގެ ބައި-އިލެކްޝަންތައް ދެން ބާއްވަނީ އަހަރަކު ދެ ފަހަރުއެވެ. ކުރިން މި އިންތިހާބުތައް ބާއްވަމުން އައީ، ގޮނޑި ހުސްވާތާ ވަކި މުއްދަތެއްގެ ތެރޭގައެވެ.
